Read Vute 2 Nùb Kòréèntə̀ 3 Bible Online

2 Nùb Kòréèntə̀ 3 - Vute bible

2 Nùb Kòréèntə̀ 3

¹Nɨ nɨ́m nɨ̀miib sé ɨ́ ɓa nyí tɨ̀ìncùnàkwànɨ káàtà, tànànɨ nyí, nyí gàm nɨ́m mîn. Nùb kù á nyí tɨ̀nnànɨ káàtà kɨ́ u̧, kɨ́ kù ŋgáb a fɔ̂ nyí káàtà kɨ́. Nyí ɗú nɨ́m ndɨ̀ŋɓwênɨ u̧ á à?

²Nyí nɨ̀miib ɨ́ duɓa nɨ́ hȩ káàtà nɨ́mè, du tɨín nɨ́mè sumí, kùb fɨ́tɨ ɗə̀ə̀ŋnɨ kùb a fànné ru.

³I̧i̧, á ɓà wááŋ ɨnayâna nyí du hȩ káàtà Krístù nɨ̀mɨr tɨinɓaré á, nɨ́m ɨ́ duce nùb hain káàtà kíì ru. Káàtà kɨ́ nɨ tɨín ɓe âŋkɨ̀rə̀[2] ɗàà, du nɨ tɨín ɓe Nyéhè Mèín nò du jááŋ á. Cè nɨ́ tɨín sɨkli ya ɗàà, du nɨ tɨín nɨ̀vɨ́tɨ̀bì njɔ̧̀ɔ̧ á.

⁴Nɨ́m wáa nɨ u̧ ɓe àm gíí nɨ́m du ɓe kí Mèèín tíí ɓe ɨ́r Krístùù rè á.

⁵Nɨ ɓe nyòm nɨ́m nɨ̀mibi sé á nɨ́m fɨ́tɨ ndɨ̀ŋnɨ nɨ́m kù, Mèín ɨ́ du nɨ́ nɨ́m nànɨ nyòm ndɨŋ nɨ́mí ru,

⁶ɓetí ɓe nyòm ŋgéé á nɨ́m sei nùb éí ə́r ɓe ɨ́r jin nyàŋ hehí ru. Jin nyàŋ hehí kɨ́ nɨ ɗòŋwòwá ɓíì du tɨnné ya, ɗoŋwo nɨ Nyéhè Sarîn ya á. Ɓíì du tɨnné á gèrénɨ cwéé, ɨ́dù Nyéhè Sarîn á cè nɨ́ nànɨ mè.

⁷Nyindí bɨ ɓíì kɨ́ no kwe yaá tɨín sɨkli ya, ɓíì du gèrénɨ cwéé kɨ́. Dugɨ nɨ́ u̧, mwa ɓíì kíì ɨ́ ndɨ̀ŋ ɓɨ̀m Mòyíìs ɓə̀ɓà cei, ɗà ŋgèrèé ɓɨ̀m ŋgéé kíì ɨ́ yɔ̂ nùb Ísràyéèl lu, u̧ kɨ́ mwa kɨ́ yi nɨ́ yə̀ŋwá.

⁸Ɓíì du gèrénɨ kùb jɨ̀r cwéé noò ma dùgɨ̀ ɓe kúúŋ mwa kíì, ɗóògɨ̀ mwa Nyéhè Sarɨ́nne à?

⁹Ə́r ɓíhì, nɨ́m du gèrénɨ kùb jɨ̀r cwéé á ɓe mwa kàm u̧, ɨ́dù ə́r Nyéhè Sarɨ́nne nò du nɨ́ ndɨ̀ŋnɨ kùb dù ɗɨ́ɗɨ̧́ Mèèín tíí á ɓàgɨ̀ nɨ ɓe mwa kàm aŋhɨ kíí.

¹⁰Kí du mwa kàm kɨ́ aaŋɓatɨ́ nɨ́ kɨ́ tɨ ɓəyaye tíí yáá na á.

¹¹Nɨ́m tɨ yəŋhó̧ɗóo ŋgóbí ma tɨ dùgɨ̀ ɓe mwa u̧, ɗóògɨ̀ jin nyàŋ hehí nɨ́m ɓa dùlɨ́ŋnɨ tɨ́k kɨ̀ tɨ́ɨ́ à?

¹²Ɓe àm nɨ́m du ɓe gíí sumí u̧ kɨ́ á nɨ́m du nyìnɓànɨ àm jin nyàŋ hehí kɨ́ u̧ wááŋ, vùù ɗàà ru.

¹³Nɨ́m nɨ hȩ Mòyîs nò yi ɓomkɨ́kom ɓɨ̀m tíí ɓe júk àm nùb Ísràyéèl tɨ̀ pə́ hȩ mwa du nɨ́ yə̀ŋnɨ ɗàà kɨ́ ɓa cɔ̧́niì rɨ sé.

¹⁴Ɨ́dù kɨ̀cáàb ŋgábè ɨ́ ɗèìn nɨ́. Há̧á̧ ɗàrò, ɓwâ ŋgáb du fàìnnɨ káàtà jin nyàŋ fɨ̀nní rɨ, júk kɨ́ á háyè nɨ ku. Nò júk kɨ́ éíkɨ́ tíí sé nò du nɨ́ ɓaín ɓe Krístù rɨ.

¹⁵Dùgɨ̀ nɨ há̧á̧ mwáín, ɓwâ nùb Ísràyéèl du fàìnnɨ káàtààb Mòyíìs lɨ, kɨ̀cáàb ŋgábè á há nɨ ɗeín.

¹⁶Ɨ́dù káàtà Mèèín wáatɨ́ ɨnè: «Ɓwâ lâs Mòyîs du ɓàndɨ̀cùrénɨ Mèín noò, júk kɨ́ a éíkî.»

¹⁷Yɨ́ rè hò̧, ɨ́r Kéké rè, kùb ɓé bɨ́ Nyéhè Sarîn á. Yɨ́ Nyéhè Sarîn duceré, ju mvòŋsòòŋ á ɓè.

¹⁸Nɨ́m lâs, ɓɨ̀m nɨ́mè nɨ júk ya ɓomkí̧i̧ ɗàà, á cè sàmàìn kùb pə́ mwa Kékéé nɨ́mè tíí. Kéké nò duce Nyéhè á ndɨ̀ŋnɨ nɨ́m dù hȩ ŋgə́, ɓe mwa kàm du gɨ̀ndóŋnɨ tíí tíí rɨ.