Read Vute 2 Nùb Kòréèntə̀ 4 Bible Online

2 Nùb Kòréèntə̀ 4 - Vute bible

2 Nùb Kòréèntə̀ 4

¹Mèín, ɓe nyàŋnjɔ̧̀ ŋgə́ du ɓe kíí, ŋgə́ naréé nɨ́m ə́r kɨ́ ŋgáré, àm kɨ́ á nɨ́m du nɨ́ óknɨ yəré ɓe ə́r kɨ́ ɗàà ru.

²Nɨ́m leetɨ́ nɨ́ɨ́b sə̀réé kùb ndɨŋtee yoó rɨ lâs. Nɨ́m á nɨ ndɨ̀ŋɓànɨ nɨ́ɨ́b nɨ́mè lâs hàrák, nɨ́m cè nɨ́ ŋgə̀ə̀mkɨ́nɨ nyindí Mèèín ɗàà. Nɨ́m á nɨ́ túùmɓàcéyènɨ àmɨɨr laŋtɨ̧ɨ̧́. Ɓe ndɨ̧̀ɨ̧́ u̧ kɨ́, nɨ́m ɗú nùb lâs ɗə̀ə̀ŋɓà Mèèín tíí ɨnayâna nɨ́m nùb ɗɨ́ɗɨ̧́ á na á.

³Kìn Nyɔ̧ɔ̧́ nɨ́m du tànɨ kɨ́ ɨ́ dù nɨ́ wááŋ ɗàà, ma duna nɨ nùb du bɨ́ lɔ̧́nɨ lɔ̧́ne á.

⁴Ŋgáb du bɨ ə́ə̀mnɨ ɗàà àm mèín ɓáŋhîn ɗàá hò̧neè tuklɨkɨ́ nɨ́ kɨ̀cáàb ŋgábè á, mèín kɨ́ á hàrɨ̀nɨ ŋgáb pə́ mwa̧ mgbíí Krístùù Kìn Nyɔ̧ɔ̧́ du nàniì, Krístù nò du ɓɨ̀m Mèín nɨ̀mɨ́rí.

⁵Ɓetí kìn nɨ́m du tàniì nɨ ɓe ɨ́r nɨ́m nɨ̀mibi sé, du nɨ ɓe ɨ́r Yésù Krístùù nò du Kékéé á. Kɨ́ nɨ́mè, nɨ́m wáaɓatɨ́ ɨnayâna nɨ́m du nɨ nùb éína nyínè á, ɓe ɨ́r Yésùù.

⁶Mèín mwi̧ yi ta: «Ɗú mwa̧ ɓə̀ə̀hó̧ sɨ́mnɨ̀rí á.» Rɨ, Mèín mwi̧ kɨ́ ɨ́ ndɨŋɓwée mwa̧ nóò ɓə̧̀ nɨ́mè sumí ru, àm na nɨ́m ɗɨɨ́ŋ mgbíí noò du ɓə̀nɨ ɓɨ̀m Krístùù ya rè.

⁷Nɨ́m nùb Mèín naré kúúŋ nyɔ̧ɔ̧́ kàm kɨ́ sumíì, nɨ́m á nɨ́ hȩ nɔk vɨ́tè, àm kùb a pə́nyààŋɓà mîn ɨnayâna kúúŋ nyòm kàm kíì ók nɨ́ ɓe Mèín á, nɨ ɓe nɨ́m sé.

⁸Nɨ́vɨ́tɨ̀b á nɨ́m ɓállɨ̀nɨ péín lâs, ɨ́dù kùb bɨ nɨ́m tə̀mkɨ́nɨ ɗàà. Ŋgáb á nɨ́m túùmnɨ jábɨ́r cei, ɨ́dù sum nɨ́mè nɨ yènnɨ ɗàà.

⁹Kùb á nɨ́m túùmnɨ jábɨ́r ɓe ɨ́r ə́mní, ɨ́dù Mèín nɨ nɨ́m lèènɨ ɗàà. Kùb á nɨ́m lòmnɨ, ɨ́dù kùb bɨ nɨ́m kwíìnɨ ɗàà.

¹⁰Jábɨ́r Yésù ya pə́ré á ɓwâ lâs nɨ́mè só, kí ɨ́ duce túùmnɨ ɨnayâna Yésù á nɨ́ nɨ́mè só jáŋ ndu.

¹¹Ju mèè nɨ́mè no, nɨ́m á ɓwâ lâs kə́sə́k ɓe cwé ɓe ɨ́r Yésùù, àm kùb a pê mè Yésùù síí nɨ́mè ɓa kúnɨ kú̧u̧ rè nokwe.

¹²U̧ á cwé du ɓwâ lâs ə́ré nɨ́mè só, kɨ́ nyínè cè mè á.

¹³Káàtà Mèèín wáatɨ́ ɨnè: «Mɨ ə́əmtɨ́, àm kɨ́ á mɨ nyince ru.» Nɨ́m ɓwêcé, ɓe àm nɨ́m ə́əmɓwéeré á nɨ́m duce nyìnnɨ ru.

¹⁴Nɨ́m ɗəəŋtɨ́ ɨnayâna Mèín mwi̧ ya səəmcuhó̧ Yésù cwéé rɨ ɨ́ ɓace nɨ́m sə̀ə̀mcùhó̧ɓwênɨ cwéé ru, nɨ́me Yésù bɨ, ɗà ŋgə́ a gè nɨ́me nyí gín nóò.

¹⁵Nɨ́m du féínniì lâs du ɓe ɨ́r nyínè á, àm ndɨ̀ŋnyàáŋ Mèèín du gìnɨ tíí tíí rè a dù ɓe nùb lâs, nyí a dùɓà ví̧i̧ sáktɨ̀nɨ Mèín, ɗà nyí lâs ɓáhîn, nyí a mgbíhè ŋgə́.

¹⁶Àm kɨ́ á nɨ́m du nɨ́ óknɨ yəré sumí ɗàà ru. Dùgɨ̀ ɓè síí nɨ́mè du múnɨ ŋgóbti ŋgóbti, nɨ́m du nɨ́mè sumíì á nɨ́ sènnɨ ye lâs nɨ́m heé.

¹⁷Yíìnɨ́m ndóŋ ndó̧ne nɨ́m du ókndóŋlɨ́ŋnɨ ɓwâ kù rɨ á nɨ́m nyààŋkɨ́nànɨ mgbíí kàm mɨ̀cɨ̧̀, ndóŋɓacéye yíìnɨ́m kíì.

¹⁸Ɓetí nɨ́m kɨ́k nɨ́ njɔ̧̀ nɨ́mè nɨ́m kùb du pénɨ ɗàwáá ya á, nɨ kɨ́ kùb du péniì ya sé. Nɨ́m kùb du péniì á nɨ́ yə̀ŋhó̧ɗóònɨ ŋgób, ɨ́dù nɨ́m kùb du pénɨ ɗàwáá dulɨ́ŋ nɨ́ tɨ́k á.