Read Vute 2 Nùb Kòréèntə̀ 5 Bible Online

2 Nùb Kòréèntə̀ 5 - Vute bible

2 Nùb Kòréèntə̀ 5

¹Nɨ́m ɗəəŋɓatɨ́ u̧, síí nɨ́mè du hȩ njáàŋ nɨ́m du nó dùnɨ ɗɔ̀bín ndè ɨ́ ɓáŋhȩ̀, nɨ́m á ɓe dúú kù du tə̀mnɨ təə́m ɗàwáá Mèín nyaaŋkɨ́na nɨ́mè ɓɨllin. Dúú kɨ́ nɨ ŋgáár ə́ré nɨ̀vɨ́tɨ̀bì sé.

²Ɗàrò, nɨ́m á cè yɨ́ɓànɨ só, ɓetí nɨ́m á ɗúɓànɨ ɓè nɨ́m tɨ lə́ye dúú ɓɨllɨnne kɨ́ noò naa.

³Ɓetí nɨ́m ɨ́ lê dúú ɓɨllin kɨ́ no, Mèín tɨ̀ nɨ nɨ́m laŋtɨ̧ɨ̧́ kwà.

⁴Ɓwâ nɨ́m duye njáàŋ ɗɔ̀bín hò̧ rè noò, nɨ́m á nyàmnɨ hȩ ɓwâ ha̧á̧ lúhîn ndóŋne nɨ́mè. Á mè u̧, nɨ́m ɗúwa mbɨ́knɨ síí nɨ́mè, ɨ́dù nɨ́m á ɗúɓànɨ ɓè nɨ́m tɨ lə́ye dúú ɓɨllin kɨ́ noò, ɗà dúú ɓɨllin kɨ́ a cə́ndɨ̀kî njáàŋ ɗɔ̀bín hò̧ nɨ́m du nó rè.

⁵Mèín nɨ̀mɨr ɨ́ nyaaŋkɨ́ nɨ́m ɓe ɨ́r mè kíì ru. Ŋgə́ naá nɨ́m Nyéhè Sarîn, túùmmèɓànɨ ɨnayâna ní ɓa nɨ́m nàɓwênɨ nyɔ̧ɔ̧́ bɨ kù ní kɨ́kna nɨ́mè á.

⁶Ɨ́dù nɨ́m á nɨ ɓwâ lâs ə́ŋhîn kpéín. Nɨ́m mwi̧ nɨ́m ɗəəŋtɨ́ ɨnayâna ɓwâ nɨ́m duháye nɨ́ dúú ɗɔ̀bɨ́nné rè noò, nɨ́m á nɨ cóo ɓe Kéké.

⁷Ɗɨ́m nɨ́mè á ɓà túùmnɨ nɨ́m ə́əmtɨ́ Kéké, nɨ́m mwi̧ nɨ́m nɨ ŋgə́ pə́yèwá.

⁸Àmɨrì ɓàì, nɨ́m á ɓà ə́ŋhîn kpéín, nɨ́m á ɗúɓàcéyènɨ ɓè nɨ́m tɨ mbɨ́k síí ɗɔ̀bɨ́nné rè, nɨ́m a gì nɨ́ dùnɨ gín Kékéé.

⁹Ɨ́dù nɨ́m á ɗúyàɓàyènɨ ndɨ̀ŋnɨ nɨ́m nyaŋ ŋgə́ sumíì, nɨ́m mbɨ́kgɨ̀ síí kɨ́, nɨ́m dùgɨ̀ síí kɨ́ mbɨ́kwa.

¹⁰Nɨ́m lâs, nɨ́m ɓa fó̧nánɨ ŋgù̧ní Krístùù tíí á. Nò lâs a kwà lɔ̀ɔ́ nóò ɗóhîn ɓe nɨ́m ŋgə́ ya ndɨŋ ɗɔ̀bɨ́nné, dùgɨ̀ kɨ́ nyɔ̧ɔ̧́, dùgɨ̀ kɨ́ ɓáŋhîn.

¹¹Nɨ́m ɗəəŋtɨ́ nɨ́m kùb du tànɨ jə̧̀ə̧́ Kékéé rè, nɨ́m á cè mánɨ ndɨ̀ŋnɨ nɨ̀vɨ́tɨ̀b ə́mnɨ̀ àm nɨ́mè ɓɔ̧ne. Mèín ɗəəŋɓatɨ́ nɨ́m mîn, nɨ́m ɗəəŋceé ɨnayâna nyínè njɔ̧̀ɔ̧ nyí ɗəəŋɓwéeɓatɨ́ nɨ́m mîn.

¹²Kɨ́ nɨ́mè, sàmàìn nɨ́m tanakwacɨ nyí ta̧né ɗàà, nɨ́m ɗúɗóo nyí ók mɨ̀tù ɓe nɨ́m na á. U̧ á nyí ɓa ɗə̀ə̀ŋnɨ nɨ́m nyí piina nùb du bɨ́ ánɨ síí ɓe nɨ́ɨ́b laŋtɨ̧né, ɨ́ ndôŋ nɨ́ɨ́b du ŋgábè sumíì ru.

¹³Nɨ́m dùgɨ̀ yɨŋmɨ́b hȩ nyí lə́mne ɗàrɨ́ yoo, nɨ́m duna nɨ Mèín á. Ɨ́dù nɨ́m ɨ́ dùcê ɓe kɨ̀cáàb hàrák, du ɓe ɨ́r nyɔ̧ɔ̧́ nyínè á.

¹⁴Ɓetí Krístù á nɨ́m ɗúɓànɨ cei, nɨ́m nùb ɗəəŋɓa ɨnayâna nɨ̀vɨ́tè mwi̧ yi kúú ɓe ɨ́r nùb lâs lè. Kí ɗú tànɨ ɨnayâna nùb lâs yi kúɓáatɨ́ ɓe ŋgə́ yáá na á.

¹⁵Ŋgə́ ya kúú ɓe ɨ́r nùb lâs, hȩ dùnɨ u̧nèé, nùb duye jááŋ bɨ dùwá ɓe ɨ́r ŋgáb nɨ̀mibi, ŋgáb du bɨ ɓe ɨ́r Krístùù á, ŋgə́ nò ya kú ɓe ɨ́r ŋgábè ŋgə́ ɨ́ sə̀ə̀mcùcê ɓe ɨ́r ŋgábè.

¹⁶Àm kɨ́ á, ɗàrò, nɨ́m du nɨ́ pə́cɨ̀nɨ nò kù hȩ nɨ̀vɨ́tè sam ɗàà ru. Duú ɓè nɨ́m ya pə́kom Yésù u̧ ɓwâ ya tíí, ɗàrò nɨ́m nɨ ŋgə́ pə́cɨ̀nɨ u̧ ɗàà.

¹⁷Nɨ̀vɨ́tè ɨ́ dùcì nɨ́ ɓaín ɓe Krístù, nò kɨ́ ducɨ nɨ nò heé á. Ɓwâ kɨ́ ɓè nɨ́m fɨ̀ìn nɨ ɗàcɨ̀wá, ducɨ nɨ kɨ́ heé á.

¹⁸Nɨ́ɨ́b kɨ́ lâs Mèín ɨ́ du ndɨ̀ŋnɨ ru, ŋgə́ nò tómwo Krístù gò nyààŋcùnɨ nɨ́me ŋgáb, ŋgə́ ɨ́ ɗòbkwà nɨ́m ə́r nɨ́m ɓéena nɨ̀vɨ́tɨ̀b kìn ŋgə́ ɗú vúme ŋgáb nyàŋcùte.

¹⁹Ɓetí nò Mèín yi tóm nyààŋcù nɨ̀vɨ́tɨ̀b ɓe ŋgéé du Krístù á. Ŋgə́ nɨ góòmcɨ̀ nɨ íí kum ŋgábè ya ɗàà. Ŋgə́ ɗobceé nɨ́m ə́r nɨ́m ɓéena nɨ̀vɨ́tɨ̀b kìn ŋgə́ ɗú vúme ŋgáb nyàŋcùte.

²⁰Ɓe ɨ́r Krístùù á nɨ́m gam nyindí ru. Ɓe tàá àmɨrìí, nɨ́mè ɓɔ̧ɔ̧ á Mèín tómndéwo kìn ɓə́r ŋgə́ du nyí ɓéniì ru. Ɓe ɨ́r Krístùù, ə́əmnáam nyàŋcùnɨ ɓe Mèín.

²¹Krístù ya nɨ́ cum só ɗàà, ɨ́dù Mèín ɨ́ njóòwû ŋgə́ cum nɨ́mè só. Ɗàrò, ɓe ɨ́r Krístùù á Mèín ndɨŋgɨ nɨ́m sèì no íhín nùb ɗɨ́ɗɨ̧́ ru.