Read Vute 2 Nùb Kòréèntə̀ 6 Bible Online

2 Nùb Kòréèntə̀ 6 - Vute bible

2 Nùb Kòréèntə̀ 6

¹Hȩ dùnɨ u̧nèé, nɨ́m nùb du ə́nnɨ ɓe Mèèín, nɨ́m yóóŋ nyí, nyí nɨ faám Mèín túumna nyínè lɔ̧́sé ɗàá sam mbɨ̂.

²Mèín wáatɨ́ káàtà noò no ɨnè: «Ɓwâ ye mɨ túumna nɨ̀vɨ́tɨ̀b ndɨ̀ŋnyàáŋ moò yi sallé, mɨ ɨ́ ô ɓə́r wóò. Ɓwâ ye mɨ ɓátɨ nɨ̀vɨ́tɨ̀bì yi sallé, mɨ ɨ́ ɓátè wu.» Àà, ye kùb ə́mne ndɨ̀ŋnyàáŋ Mèèín kɨ́ ma á gɨ̀ mwáín ndè. Ye kùb kwa ɓə́rì á mwáín ndè.

³Nɨ́m nɨ ɗúwa nɨ̀vɨ́tɨ̀b nyìnɓáàŋ ɓe ɨ́r ə́r nɨ́mè rè, àm kɨ́ á nɨ́m du nɨ́ ɗúwa ndɨ̀ŋnɨ nɨ́m ɓa jábɨ̀nɨ nɨ̀vɨ́tɨ̀bì ru.

⁴Nɨ́m á túùmɓàcéyènɨ nɨ́ɨ́b nɨ́m du ndɨ̀ŋniì lâs no ɨnayâna nɨ́m ə́nna nɨ Mèín á. Hȩ dùnɨ u̧nèé, nɨ́m á jíìɓànɨ jábɨ́r, yíìnɨ́m, vùù,

⁵jɨ̀ɨ̀m, nì̧ì̧, dùgɨ̀ ɓwâ kùb ndɨllé nɨ́m yaà. Nɨ́m á jíìɓànɨ ə́rɨ́b kàtɨ́b tamnɨ̀b lâs, dùgɨ̀ cɨ̧̀, nɨ́m á jìnɨ wum.

⁶Nɨ́m nɨ ndɨ̀ŋtèènɨ nɨ́ɨ́b sə̀réé ɗàà, nɨ́m ɗəəŋtɨ́ nɨ́ àm Mèèín, nɨ́m á nɨ ɓe jíhɨ́r, nɨ́m á ɓe nyàŋnjɔ̧̀. Nyéhè Sarîn a ə́ré ɓe nɨ́m, nɨ́m á ɓà nɨ ɓe ɗûnɨ́m àmɨɨr.

⁷Mèín á nɨ́m nànɨ nyòm nɨ́m ɓéhe kìn àmɨɨr noò. Nɨ́m ɗɨ́ɗɨ̧́ Mèín ɗúré nɨ́m du ndɨ̀ŋniì ɨ́ du kwa suu ɓe páín suu nɨ́mè ru.

⁸Kùb á nɨ́m dɨ̀ɨ̀mnɨ, nùb kù a nyinɓáaŋce ɓe ɨ́r nɨ́mè. Àm nɨ́mè sóò, nùb kù á nyìnnɨ ɓáŋhîn, nùb kù a nyince nyɔ̧ɔ̧́. Kùb á nɨ́m pénɨ hȩ tɨ́kàŋkáàŋ, u̧ kɨ́ nɨ́m wáaɓa àmɨɨr á.

⁹Nùb kù bɨ nɨ́m ə́ə̀mnɨ ɗàà, nùb kù á cè nɨ́m ə́ə̀mnɨ. Nùb kù á nɨ́m pénɨ hȩ nɨ̀kwííb, u̧ kɨ́ nɨ́m á nɨ rò jáŋ. Kùb á nɨ́m túùmnɨ jábɨ́r, kùb ɨ́ dù bɨ́ nɨ́m kwíìnɨ ɗàà.

¹⁰Kùb á nɨ́m nàrénɨ yəré sumí, ɨ́dù nɨ́m á há nɨ mɨ̀tùú; kùb á nɨ́m pénɨ tii kɨ̀ tii, ɨ́dù nɨ́m á nànɨ nɨ̀vɨ́tɨ̀b ví̧i̧ njɔdì. Nɨ́m á íhín hȩ nùb du ɓe nɨ́m kù ɗàwáá, u̧ kɨ́ nɨ́m á ɓà ɓe nɨ́ɨ́b lâs.

¹¹Ɓwàjììb nɨ́mè nùb Kòréèntə̀, nɨ́m tanaɓatɨ́ nyí àmɨɨr, nɨ́m tanatɨ́ nyí nɨ́m nɨ́mè njɔ̧̀ne lâs.

¹²Nɨ́m nɨ nyí nɨ́m nɨ́mè njɔ̧̀ne yòònàwá, nyí ɨ́ yoona nɨ́ nɨ́m kɨ́ nyínè ru.

¹³Mɨ nyinna nyí hȩ mɨ nyinnace munɨ́b moò á: ndɨŋnáɓwéem hȩ nɨ́m, tananáam nɨ́m nɨ́m nyínè njɔ̧̀ne lâs.

¹⁴Nyí nɨ ju ɓe nùb ə́ə́m sumí ɗàwáá ɓáhɨ̀r, nɨ nùb nyí fɨ́tɨ ɓáànɨ ju ɓe kíí nɨ sé. Nɨ́m nyɔ̧ɔ̧́ ɓe nɨ́m ɓáŋhîn sàmàìn du yɨ́ mwi̧í̧ ɗàà. Sàmàìn mwa ɓe mɨ̀sɨ́mnɨ̀r ɓáhe yɨ́ mwi̧í̧ ɗàà.

¹⁵Sàmàìn Krístù ɓe Sátàìn du kúu mwi̧í̧ ɗàà. Sàmàìn nò ə́ə́m sumíì ɓe nò ə́ə́m sumí ɗàwáá du kúu mwi̧í̧ ɗàà.

¹⁶Nɨ́m kù Dúú Jíri Mèèín ɓe mèín nyaŋhɨ́b ɓain yáà nɨ ɗàà, ɓetí kɨ́ nɨ́mè nɨ́m du nɨ Dúú Jíri Mèín nò du nànɨ mèè á, hȩ Mèín yi taré. Ŋgə́ ya taá ɨnè: «Mɨ kwá dulɨ́ŋ ɓe ŋgáb, Mɨ kwá du Mèín ŋgábè, ŋgáb a dùcê gbàŋ moò.»

¹⁷Àm kɨ́ á Kéké wáhe ɨnè ru: «Mbɨ́kná nɨ nùb kɨ́. Éíkɨ́ná nɨ ŋgáb ya. Nyí nɨ nɨ́m du sarîn ɗàwáá dì̧nɨ̀r. Nyí ɨ́ jə̀ŋ nɨ́m mɨ ta kɨ́, mɨ a gàm nyí.»

¹⁸Kéké nò du ɓe nyòme lâs takwatɨ́ ɨnè: «Mɨ ɓa dùnɨ Tá nyínè á, nyí a dùcê munɨ́b moò.»