Read Vute 2 Nùb Kòréèntə̀ 7 Bible Online

2 Nùb Kòréèntə̀ 7 - Vute bible

2 Nùb Kòréèntə̀ 7

¹Ɓwàjììb moò mɨ ɗúɓa ceí, vùùm ɓwáár kíì lâs duna nyí á. Hȩ dùnɨ u̧nèé, nɨ́m kɔ̀kkɨ́ná nɨ́ɨ́b lâs du síí nɨ́mè ɓe mè nɨ́mè jɨ́nɨ̀mkɨ́niì. Nɨ́m máná lèèrénɨ síí Mèèín ŋgáré nɨ́m a jə̀ŋ ŋgə́.

²Tananáam nɨ́m nɨ́m nyínè njɔ̧̀ne lâs. Nɨ́m nɨ nò kù ɓáŋhîn ndɨ̀ŋwá. Nɨ́m nɨ nò kù mbáàŋwá, nɨ́m cè nò kù yíwa.

³Mɨ mɨ nyìnwá u̧ àm mɨ yom nyínè. Hȩ mɨ tɨ wáana nyí rɨ u̧, nyí ɓà njɔ̧̀ nɨ́mè ɓɔ̧ne á, àm kɨ́ á nɨ́m duná ɓwâ lâs cúk lu. Tàgɨ̀ nɨ́m kúná kú̧u̧, tàgɨ̀ nɨ́m dùná jáŋ.

⁴Ɓe ɨ́r nyínè, mɨ á nyìnɓànɨ wááŋ mɨ vùù lùnɨ ɗàà, mɨ á ókɓànɨ mɨ̀tù cei ɓe nyí. Mɨ á tàmɓànɨ njɔ̧̀, mɨ a ókɓà mɨ̀tù ɓwâ jábɨ́r kwa nɨ́mè.

⁵Kí du ɓwâ nɨ́m tɨ féín Màsèduwáàn, nɨ́m tɨ nɨ ùwèèɓàcéyèwá. Nɨ́m tɨ kwaɓatɨ́ jábɨ́r nyiín nyin: mɨ̀ndárɨ̀b ɓe nɨ̀vɨ́tɨ̀b, nɨ́m tɨ á yíɓànɨ só.

⁶Ɨ́dù Mèín, ŋgə́ nò du tààmnànɨ nùb du yenné njɔ̧̀ɔ̧, tɨ taamnaá nɨ́m njɔ̧̀ ɓe tómè ŋgə́ tómwona nɨ́m Tît lè.

⁷Njɔ̧̀ tɨ nɨ nɨ́m tàmhó̧ɗóòwá àm ŋgə́ tɨ féínndé, ɨ́dù duɓwée àm ŋgə́ tɨ átɨna nɨ́m hȩ nyí tɨ taamnaɓwée ŋgə́ njɔ̧̀ rè á. Ŋgə́ tɨ tanaɓwéetɨ́ nɨ́m hȩ nyí du ɗúɓànɨ mɨ pə́cùniì, hȩ nyí du ókɓànɨ yəré sumíì, hȩ nyí duɓa kə́sə́k gàmnànɨ nɨ́m àmnì. Àm kɨ́ á ɗàrò mɨ du ókɓàgɨ̀nɨ mɨ̀tù cei lu.

⁸Dugɨ hȩ káàtà mɨ tɨ tɨnna nyínè tɨ na nyí yəré sumíì, nɨ mɨ jábɨ̀nɨ ɗàà. Tɨ á sàmàìn jábɨ mé, ɓetí mɨ péé káàtà kɨ́ tɨ naá nyí yəré sumí mvókín ti ŋgób.

⁹Ɨ́dù ɗàrò mɨ á ɓe mɨ̀tù sumí. Mɨ̀tɔ̀k kɨ́ nɨ àm káàtà tɨ na nyí yəréé sé, du nɨ àm yəré kɨ́ tɨ ndɨŋ nyí ɓàndɨ̀ sum ndè á. Nɨ́m kɨ́ nyaŋɓatɨ́ Mèín sumí. Hȩ dùnɨ u̧nèé, nɨ́m nɨ nyí ɓáŋhîn kù ndɨ̀ŋwá.

¹⁰Ɓetí yəré Mèín du nàniì á ndɨ̀ŋnɨ nɨ̀vɨ́tè ɓàndɨ̀ sum ɗà ŋgə́ a kwà ɓə́r, yɨ́ kɨ́ ɓè sàmàìn yəré kɨ́ jábɨré ɗàà. Ɨ́dù yəré nùb ɗɔ̀bɨ́nné du ɓe kíí á ŋgáb gèrénɨ cwéé.

¹¹Yəré Mèín tɨ naré nyí sumíì nyaŋɓatɨ́ ŋgə́ sumí, pə́náye hȩ nyí du ɗàròò! Á mè u̧, yəré Mèín naré nyí sumí kɨ́, ə́tií nyí njɔ̧̀ nyí kaaŋkɔ́he síhé. Ɗàrò nyí á só yínɨ, nyí á ɓà ɓe vùù ndɨ̧̀ɨ̧́ ɓáŋhɨ́nne, nyí á ɗúɓànɨ mɨ pə́cùnɨ, nyí á ɗúɓànɨ ndɨ̀ŋnɨ nɨ́m Mèín ɗúré, nyí á ɓà ɓe ɗɨ́m túmnɨ nò ndɨŋ ɓáŋhɨ́nne jábɨ́rí. Nyí túumɓatɨ́ ɨnayâna vúm bɨ nɨ́m kù àm kɨ́ no ɗə̀ə̀ŋwá.

¹²Hȩ mɨ tɨ tɨ̀nnɨ káàtà kɨ́ u̧nèé, tɨ nɨ àm nò tɨ ndɨŋ ɓáŋhɨ́nne sé, tɨm cè nɨ́ àm nò kùb tɨ ndɨŋ ɓáŋhɨ́nne sé ɓwê. Ɨ́dù mɨ tɨ ɗú nyí túùmnànɨ ɓe ɨ́r Mèèín ɨnayâna nyí á kə́sə́k gàmnànɨ nɨ́m àm na á.

¹³Àm kɨ́ á nɨ́m nyí ndɨŋ kɨ́ taamɓa nɨ́m njɔ̧̀ ru. Njɔ̧̀ nɨ nɨ́m tààmhó̧ɗóòwá taám, nɨ́m ókɓwéeɓatɨ́ mɨ̀tù ɓwâ nɨ́m pə́ njɔ̧̀ séé Tît ɗàá ɓe tàmé nyí lâs nyí taamna ŋgə́ njɔ̧̀ rè.

¹⁴Mɨ túumnaɓatɨ́ ŋgə́ mɨ̀tù mɨ du ɓe kí sumí ɓe ɨ́r nyínè, nyí ɨ́ dù nɨ́ mɨ sə̀ré lə́rɨ̀wá. Ɨ́dù hȩ nɨ́m tanalɨ́ŋ nyí àmɨɨr ɓwâ lâs lɨ, u̧ á ɓwê kúúm nɨ́m kúmɨ nyí Tît tíí du hàrák.

¹⁵Ŋgə́ á lə́ə̀mcùlɨ́ŋnɨ hȩ nyí yi du kə́sə́k óknɨ àm ŋgéé ɓɔ̧ne, ɓe gàmé nyí yi gam ŋgə́ ɓe mɨ̀ɨ́ŋ cúú. Àm kɨ́ á ŋgə́ du nyí ɗúɓànɨ cei lu.

¹⁶Mɨ á ókɓànɨ mɨ̀tù ɓetí gíí moò á nyí ya ɓe ɨ́r nɨ́ɨ́b lâs.