Read Vute 2 Nùb Kòréèntə̀ 8 Bible Online

2 Nùb Kòréèntə̀ 8 - Vute bible

2 Nùb Kòréèntə̀ 8

¹Mwin yàá bɨ ə́mní, nɨ́m á ɗúnɨ nyí ɗə̀ŋhɨ̀ hȩ Mèín túmnɨ ndɨ̀ŋnyàáŋ noò mɨ̀kwìn nùb ə́mní bɨ du ɗɔ̀ɔ́b Màsèduwáàn noò.

²Jábɨ́r ví̧i̧ kəhɨɓatɨ́ ŋgáb, ɨ́dù ŋgáb tɨ á ɓà bɨ mɨ̀tùú cei. Ŋgáb naɓwéeceé nyər ŋgábè sum mwi̧, dugɨ hȩ ŋgáb duɓa tiri.

³Mɨ tànà nyí, ŋgáb natɨ́ nɨ́m ŋgáb tɨ fɨ́tɨ nàniì, ɨ́ ààŋɓàcéyè nyòm ŋgábè. Nò kù tɨ nɨ ŋgáb kpɔ́hîn kpɔ́ɔ̀wá.

⁴Ŋgáb ɓottɨ́ nɨ́m, ŋgáb ɨ́ nòmhâ ɨnayâna vúm ɗúú nàɓwênɨ nyər, kpɔ́knɨ nùb ə́mní Yèrúsàlèèm.

⁵Nɨ́m ŋgáb ndɨŋ kɨ́ ndóŋtɨ́ kɨ́ nɨ́m tɨ lə́mne ŋgáb ɓa ndɨ̀ŋniì. Tíí yàyè, ŋgáb leeréé síí ə́nnàá Kékéé no, ŋgáb ɨ́ ə́ə̀mkwà ndɨ̀ŋnɨ nɨ́m nɨ́m ta ŋgáb ndɨ̀ŋte, hȩ Mèín ɗúré.

⁶Àm kɨ́ á nɨ́m tɨ yóŋ Tît, hȩ ŋgə́ tɨ yaré ə́r ɓáhèé mònéè yɨ́ nyínè, ŋgə́ gɨ̀cù cáàŋnɨ ə́r nyɔ̧ɔ̧́ kɨ́ ru.

⁷Nyí á ɓà ɓe nɨ́ɨ́b lâs: nyí á ɓe ə́ə́m, nyí á ɓe nyindí nyɔ̧ɔ̧́ ɓɔ̧ɔ̧, nyí á ɓe ɗɨɨ́ŋ, nyí á kə́sə́k ə́nnànɨ Mèín, nyí á nɨ́m ɗúɓànɨ. Hȩ dùnɨ u̧nèé, nyər nyí du nànɨ kɨ́, nanáam sum mwi̧.

⁸Mɨ mɨ nyí kpɔ́hîn kpɔ́ɔ̀wá, ɨ́dù mɨ tana nyí hȩ nùb kù du bɨ́ nàɓàniì á, àm mɨ a pê ɗûnɨ́m àmɨɨr nyí du ɓe kí ɓe ɨ́r nùb kwè.

⁹Ɓetí nyí ɗəəŋtɨ́ ndɨ̀ŋnyàáŋ Yésù Krístù nò du Kéké nɨ́mè du ɓe kíí. Ŋgə́ á ɓe nɨ́ɨ́b lâs, ɨ́dù ŋgə́ ɨ́ sèttɨ̀kî síí nò tiri ɓe ɨ́r nyínè, àm tii no kɨ́ a nà nyí njɔdìì.

¹⁰Kɨ́ moò nɨ́m mɨ lə́mne ɓe àm kíì á rè: hȩ nyí dùnɨ nùb yàyɨ̀rí nayaye nùb ə́mní Yèrúsàlèèm nyərí, nyí ɨ́ dukwa nùb cábyaye dáín ndóŋkɨ́ rè ndɨ̀ŋnɨ u̧nèé ru, du mîn á.

¹¹Ɗàrò, gɨnáhácɨm ɓe ɗɨ́m kɨ́ tíí há̧á̧ cáŋhɨ̀rí, ɗóhîn ɓe nɨ́m nyí du ɓe kíí. Ɓwâ nyí tɨ cáb ndɨ̀ŋnɨ u̧nèé, nyí tɨ túmnɨ ɗûnɨ́m á.

¹²Mèín nɨ ɓwèìnɨ nɨ́m nɨ́m du ɓe kí ɗàwáá ɗàà. Kɨ́ nɨ́m du ɓe kíí, nɨ́m ɨ́ nà ŋgə́ sum mwi̧, ŋgə́ á gàmnɨ.

¹³Nɨ tàwá nyí nàkɨ́ nɨ́m nyí du ɓe kíí lâs ɗà nyí a mècù ɓe tii, ɨ́dù mɨ ta nyí nà nyər àm nò kù tɨ̀ tuŋ nɨ́m kwè á.

¹⁴Ɓwâ nyí ndɨŋ u̧ rɨ, nɨ́m nyí du ɓe kí cei lɨ, ɓace kpɔ́knɨ nùb du ɓe kí cei ɗàwáá á. Ye kù cè nɨ́m kù ɨ́ tùŋ nyí, ŋgáb duú ɓe kí ví̧i̧, ŋgáb ɓa nyí kpɔ́knɨ á. U̧ á nyí lâs ɓa dùnɨ hàrák,

¹⁵ɗóhîn ɓe nɨ́m káàtà Mèèín wáhe ɨnè rè: «Nùb ya árɨɓa ceí ya bɨ́ gàmndóòŋwá ɓwâ gɔ̀ɔ́, nùb ya árɨce ŋgóbí ya fubháá bɨ́.»

¹⁶Nɨ́m sáktɨ̀ná Mèín, ɓetí njɔ̧̀ kpɔ̂ nyínè ŋgə́ yi na mɨ rè, ŋgə́ naɓwéetɨ́ Tît.

¹⁷Nɨ́m tɨ taá Tît gɨ̀ yɨ́ nyínè. Hȩ ŋgə́ duɓacéye nɨ́ ɓe njɔ̧̀ kpɔ́k nyínè ceí, ŋgə́ ɨ́ ə́mnè gìnɨ ɓetí ŋgə́ nɨ̀mɨr tɨ ɓwáícií nɨ́ gùr kɨ́.

¹⁸Mwin yàá ə́mní kù á nɨ́m tómso ɓe Tît ɗàrɨ́. Mɨ̀kwìn nùb ə́mní á kúùmɓànɨ mwin yàá kɨ́ ɓe ɨ́r ɓéhèé Kìn Nyɔ̧né.

¹⁹Cáŋhȩ̀ kɨ́ nɨ kí sé, mɨ̀kwìn nùb ə́mní yi caɓwéetɨ́ ŋgə́, ŋgáb ɨ́ tà ŋgə́ yə̀ŋtèè ɓe nɨ́m, nɨ́me ŋgáb a éíɓáhè ə́r kpɔ̂ɔ́ kùb mwin yàá ə́mní rè. Ɗú nɨ́m éí ə́r kɨ́, mgbíìnɨ Kéké nɨ́mè á. Ɓe ndɨ̧̀ɨ̧́ u̧nèé á nɨ́m du túùmnɨ ɗûnɨ́m nɨ́m du ɓe kíí ru.

²⁰Mwèìn kàm kùb naré nɨ́m ŋgáré rè, nɨ́m ɗúwa kùb njà̧nɨ̀ nɨ́m ɓe ɨ́r gɔ̀ɔ́ mwèìn kíì.

²¹Nyɔ̧ɔ̧́ nɨ́m du ɗúnɨ ndɨ̀ŋniì, nɨ tàhó̧ɗóòwá Mèèín tíí á, duɓwée nɨ nɨ̀vɨ́tɨ̀bì tíí á.

²²Mwin yàá nɨ́mè kù á kwà nɨ́m tómso ɓe ŋgáb ɗàrɨ́. Nɨ́m tɨ góomtɨ́ ɗɨ́m ŋgéé gwì ví̧i̧, nɨ́m ɨ́ pê ŋgə́ á ɗúɓànɨ kpɔ̂ɔ́ kùb mwin yàá. Ɗàrò ŋgə́ á ɗúndóŋɓàgɨ̀nɨ ə́r kɨ́ tíí, ɓetí ŋgə́ ɗəəŋtɨ́ ɨnayâna nyí ɓa ŋgə́ óknɨ á.

²³Kɨ́ Tît, nɨ́me ŋgə́ ɨ́ yəŋlɨ́ŋ ndu, nɨ́m ə́nnace nyí á. Kɨ́ mwin yàá bɨ gɨso ɓe ŋgə́ ɗàrɨ́, ŋgáb du bɨ nùb mɨ̀kwìn nùb ə́mní bɨ tómsoré á. Ə́r ŋgáb du ə́nnɨ kɨ́ du àm Krístù a kwà mgbíhɨ́rí á.

²⁴Túumnanáam ŋgáb ɨnayâna nyí á ŋgáb ɗúmèɓànɨ, àm mɨ̀kwìn nùb ə́mní bɨ a ɗə̀ə̀ŋmèɓà ɨnayâna mɨ̀tù nɨ́m du óknɨ ɓe ɨ́r nyínè á mè ɓà hàrák.