Read Vute Nùb Gàlàtíì 2 Bible Online

Nùb Gàlàtíì 2 - Vute bible

Nùb Gàlàtíì 2

¹Cùr kɨ́ no, dáín cóóŋ ɨ́ nààsɨ̀b, mɨ ɨ́ gɨ̀cù Yèrúsàlèm nɨ́me Bàrnàbâs, mɨ ɨ́ gèɓwéhè Tît.

²Mɨ yi gɨcu Yèrúsàlèm àm Mèín yi viina mɨ ɨnayâna ɗú mɨ gɨ̀cù ku yáá na rè á. Ɓwâ nɨ́me nùb ge mɨ̀kwìn nùb ə́mní ya ɓáhe nɨ́m kɨ̀ nɨ́mè, mɨ ɨ́ tànànyàŋhȩ̀ ŋgáb Kìn Nyɔ̧ɔ̧́ mɨ ya du ɓéènànɨ nùb du Jwîf séé. Mɨ yi mɨ́ ɗúwa ə́r mɨ ya ə́llé ɓe kɨ́ mɨ duye ə́nniì lɔ̧́sé ɗàá sam.

³Tît, kùŋ mo gùrí, ŋgə́ nò du Gɨréèk, nò kù yi nɨ́ ŋgə́ kpɔ́ɔ̀ɓàcéyèwá ŋgə́ lə́ ndɨ̀,

⁴dugɨ hȩ mwin yàá bɨ kàŋnì yi lə́ mvókín nɨ́mè no, ŋgáb ɨ́ ɗû ŋgə́ ndɨ̀ lə́nàniì. Nùb kɨ́ ya léé kpáín nɨ́mè no hȩ nùb mɨ̀gómkáínbí, àm góomnyaŋhȩ ju mvòŋsòòŋ nɨ́m du ɓe kí ɓe ju ɓaín nɨ́me Yésù Krístù ɓoò. Ŋgáb ya ɗúú nɨ́m sètɨ̀nɨ mbɔ́klɨ́b ɓíì Mòyíìs,

⁵nɨ́m ɨ́ dù nɨ́ ŋgáb mvókín ti mwi̧ ɓà rɨ mbɨ́knàwá, àm nɨ́m gə́tɨna nyí àmɨɨr Kìn Nyɔ̧né.

⁶Ɨ́dù nùb kùb yi pə́kom hȩ nùb ge mɨ̀kwìn nùb ə́mní kɨ́, ɨ́ dù bɨ́ tɔ̀ɔ́ heé kù kɨ́ mo kɨ́ ya kpɔ̀ɔ̀réwa. (Àm moò yi nɨ́ ɓàcéyè ɓe ju ŋgábè kɨ́ ɗàà, ɓetí Mèín nɨ cànɨ nò ŋgə́ ɓéré ca̧á̧ ɗàà).

⁷Ɓàcéyè ŋgáb ya péé ɨnayâna Mèín ya ɗobtɨ́ mɨ ə́r tana nùb du Jwîf séé Kìn Nyɔ̧ɔ̧́, hȩ ŋgə́ ya ɗobce Píyéèr ə́r tana Jwîf bɨ Kìn mwi̧ kíì.

⁸Ɓetí Mèín ya caá mɨ mɨ dù nò tómé, àm tómso mɨ yɨ́ nùb du Jwîf séé, hȩ ŋgə́ ya caɓwée Píyéèr tómsònɨ ŋgə́ yɨ́ Jwîf bɨ rè.

⁹Jâk, Píyéèr ɓe Jâŋ, ŋgáb nùb yi du hȩ ŋgób nùb ge mɨ̀kwìn nùb ə́mní, ŋgáb ɨ́ ɗə̀ŋhȩ̀ ɨnayâna Mèín ɨ́ ɗobɓa nɨ́ mɨ ə́r lè ru. Ŋgáb ɨ́ njə̀k nɨ́me Bàrnàbâs ŋgáár, túùmnɨ ɨnayâna vúm ə́əmtɨ́. Á nɨ́me ŋgáb bɨ ɓɔ̧ ɨnayâna kɨ́ nɨ́mè nɨ́m ɓa gìnɨ ə́nnɨ yɨ́ nùb du Jwîf séé á, ŋgáb a gɨ̀cè yɨ́ Jwîf bɨ.

¹⁰Ŋgáb ɨ́ tà nɨ́m lə́ə̀mhá nùb tiri mɨ̀kwìn nùb ə́mní vúmè no. Mɨ ɨ́ ndɨ̀ŋhácè u̧.

¹¹Ɨ́dù ɓwâ Píyéèr yi féínwo Àŋtìyóòs, mɨ ɨ́ yètè ŋgə́ mɨ̀kùnín, ɓetí ŋgə́ yaá nɨ kumí tə̧ə̧́.

¹²Kí du ɓwâ nùb Jâk yi tómworé yi du féínyèwáá, Píyéèr yaá tàŋɓáànɨ cɔŋ ɓe nùb du bɨ́ Jwîf séé, ɨ́dù ɓwâ nùb kɨ́ yi féínworé, ŋgə́ ɨ́ mbɨ́kcì nɨ́ tàŋɓáànɨ cɔŋ ɓe ŋgáb, ɓetí ŋgə́ yaá lùnɨ vùù nùb yi nomkom àm lê ndɨ̀ɨ́.

¹³Jwîf bɨ kù ɨ́ lə́ɓwê kum Píyéèr yi ndɨŋ kɨ́ no, há̧á̧ ɨ́ gèréndôŋ Bàrnàbâs kumí.

¹⁴Ɓwâ mɨ pə́ ŋgáb bɨ ndɨ̀ŋnɨ nɨ́m ɗɨ́ɗɨ̧́, ɗóhîn ɓe àmɨɨr Kìn Nyɔ̧né ɗàwáá, nɨ̀vɨ́tɨ̀bì tíí, mɨ ɨ́ tànà Píyéèr ɨnè: «Wu nò du Jwîf, ju wu tɨ dukom hò̧neè tɨm nɨ hȩ ɓíì Jwîf ɗúré sé, tɨm nɨ hȩ nùb du Jwîf séé dulɨ́ŋndé á. I̧ á cè wu ɓa wú kpɔ́ɔ̀nɨ nùb du Jwîf séé dù bɨ hȩ Jwîf bɨ?»

¹⁵Nɨ́m nɨ̀miib nɨ́m nɨ Jwîf fɨnni á, nɨ́m nɨ nùb ɓíì Mèèín ɗə̀ə̀ŋwáá duteewo bɨ́ tɨb kù noò sé.

¹⁶Nɨ́m mwi̧ nɨ́m ɗəəŋtɨ́ ɨnayâna ɓe ə́mnèé Yésù Krístùù á nɨ̀vɨ́tè du nɨ́ dùnɨ Mèèín tíí nò ɗɨ́ɗɨ̧́ ru, nɨ àm ŋgə́ yúhe ɓíhɨ̀b Mòyíìs sé. Àm kɨ́ á, ju ɗɨ́ɗɨ̧́ nɨ́m du Mèèín tíí, du nɨ àm nɨ́m ə́mne Yésù Krístùù á, nɨ àm nɨ́m yúhe ɓíhɨ̀b Mòyíìs kíì sé. Ɓetí nò kù kwá nɨ Mèèín tíí nò ɗɨ́ɗɨ̧́ dùr àm nò kɨ́ yi yúhe ɓíhɨ̀b Mòyíìs kíì.

¹⁷Ɨ́dù ɓe nɨ́m Krístù ndɨŋndé, nɨ́m ɨ́ dù mánɨ dùnɨ ɓaín ɓe Mèín u̧ kɨ́ nɨ́m duɓwée nɨ cɨcóòm hȩ nùb du bɨ́ Jwîf séé á, kí ma ta Krístù ndɨŋna nɨ nɨ́m kɨ́ cum á hàye? Ɗàɓàwá.

¹⁸Mɨ ɨ́ lə́cù ɗɨ́m jə̧̀ə̧́ ɓíhì mɨ tɨ ɓáaŋkɨ́ ɓáŋhɨ́nne no, mɨ nɨ̀mɨr mɨ settɨcuɓa síí móò cɨcóm á.

¹⁹Kɨ́ moò, duú péín ɓíhì, mɨ ducɨ mɨ fín á, ɓíì nɨ mɨ nɨ́m kù ndɨ̀ŋcɨ̀nɨ ɗàà, ɓíì nɨ̀mɨr ɨ́ ndɨŋce nɨ́ mɨ dù u̧ ru, àm mɨ ə́nna Mèèín. Nɨ́me Krístù ya kúú nɨ́ bɨ̧̀ɨ̧́ cúk.

²⁰Mɨ á jáŋ, ɨ́dù Krístù ɨ́ du nɨ́ jáŋ mɨ no ru, nɨ mɨ nɨ̀mɨr sé cɨ̀. Mè mɨ du ɓe kí ɗàá hò̧ ɗàròò du àm mɨ ducɨ mɨ́ ə́ə̀mnɨ Mwin Mèèín ndè á, ŋgə́ nò ya ɗú mɨ ɗà ŋgə́ ɨ́ kàìkî mè noò ɓe ɨ́r moò rè.

²¹Mɨ ɗúwa sètɨ̀nɨ ndɨ̀ŋnyàáŋ Mèèín dù nɨ́m sam. Ɓetí duú nɨ́ ɓè kùb du bɨ́ dùnɨ ɗɨ́ɗɨ̧́ Mèèín tíí àm kùb tɨ jəŋ bɨ́ ɓíì Mòyíìs, Krístù ma kúha nɨ sam á ye!