Read Vute Nùb Gàlàtíì 3 Bible Online

Nùb Gàlàtíì 3 - Vute bible

Nùb Gàlàtíì 3

¹Ɨna nùb Gàlàtíì kɨ̀cáàb ŋgwȩ́ȩ́ ɗàwá rè! Nò kù mwánaá nɨ́ nyí cwé kèè. U̧ kɨ́ kùb tananyaaŋɓatɨ́ nyí mîn ŋgwé cwá Yésù ya kú bɨ̧̀ɨ̧́.

²Tananáye mɨ: Nyéhè Mèèín nyí yi gam ndè, yi nɨ́ àm nyí ya ók Kìn Nyɔ̧ɔ̧́ nyí ɨ́ ə́mnèé sé a? Kèè yi nɨ́ àm nyí jəŋ ɓíì Mòyíìs á?

³I̧ á nyí duce nɨ́ ɓe kɨ̀cáàb ɗàwá ɨnè? Nyéhè Mèèín ndɨŋtɨ́ nyí yàré mè heé, nyí ɗúcɨ nɨ cáàŋnɨ mè kɨ́ ɓe nyòm nyí nɨ̀mibi á à?

⁴Vùùm nɨ́ɨ́b nyí yi kwatee rè, nyí lə́mne nɨ kɨ́ samí á à? Sàmàìn du kɨ́ samí ɗàà.

⁵Mèín á nyí nànɨ Nyéhè noò, ŋgə́ a ndɨ̀ŋkwà nɨ́ɨ́b sɨ̀sɨ̀rí mvókín nyínè, ŋgə́ ma ndɨŋbɨ̂ŋ nɨ́m kɨ́ àm nyí du jə̀ŋnɨ ɓíì Mòyíìs kèè, ŋgə́ ndɨŋ àm nyí ók Kìn Nyɔ̧ɔ̧́ nyí ɨ́ ə́mnèé?

⁶Nɨ́m káàtà Mèèín du wáànɨ ɓe ɨ́r Àbɨ̀ràháàm á rè: «Ŋgə́ yi səŋtɨ́ gíí noò ɓe Mèín. Ɓe ə́ə́m ŋgə́ ya du ɓe kíí, Mèín ɨ́ â ŋgə́ nò ɗɨ́ɗɨ̧́.»

⁷Kí ta ɗú nyí ɗə̀ŋhɨ̀ ɨnayâna nùb dumeɓa ɓe ə́mní ɨ́ du bɨ́ nyȩrɨ́b Àbɨ̀ràháàm ndu na á.

⁸Káàtà Mèèín no, yaácɨ̀ nɨ tɨín ɨnayâna Mèín ɓa ndɨ̀ŋnɨ nùb du Jwîf séé dù nùb ɗɨ́ɗɨ̧́ no tíí ɓe ɨ́r ə́ə́m ŋgábè á. Àm kɨ́ á kùb ya takɨ́nacɨ bɨ́ Àbɨ̀ràhâm kìn nyɔ̧ɔ̧́ káàtà kɨ́ no ru, kìn kɨ́ á ɨnè: «Ɓe ɨ́r woò, Mèín kwá fam tɨb ɗɔ̀bɨ́nné lâs.»

⁹Àbɨ̀ràhâm yi ə́əmtɨ́ Mèín, ɗà Mèín ɨ́ fàm ŋgə́; U̧nè ɓwê, nùb lâs ə́mne Mèèín á kwànɨ faám hȩ ŋgə́.

¹⁰Ɨ́dù nùb du bɨ́ sə̀ŋnɨ gíí ɓe jə̧̀ə̧́ ɓíì Mòyíìs, ŋgáb ducɨ bɨ káá só á. Káàtà Mèèín á wáàɓàcéyènɨ ɨnè: «Nò du gɨ̀wá tíí ɓe jə̧̀ə̧́ nɨ́ɨ́b lâs du tɨín káàtà ɓíì Mòyíìs noò rɨ, Mèín káí nò kɨ́.»

¹¹Á ɓàcéyè ta̧á̧ wááŋ ɨnayâna, nò kù sàmàìn du ɗɨ́ɗɨ̧́ Mèèín tíí ɓe jə̧̀ə̧́ ɓíì Mòyíìs ɗàà, ɓetí káàtà Mèèín wáatɨ́ ɨnè: «Nò du Mèèín tíí nò ɗɨ́ɗɨ̧́ ɓe àm ə́mní kwá ɓáí.»

¹²Ɨ́dù jə̧̀ə̧́ ɓíì Mòyíìs á nɨ nyin, ə́ə́m Mèèín á cè nɨ́ nyin. Káàtà Mèèín á nɨ wáàɓàcéyènɨ ɨnè: «Nò jəŋɓa ɓíì Mèèín kwá ɓáí.»

¹³Káá du bìnɨ nò du jə̀ŋwá ɓíì Mòyíìs, Krístù yi ɓátɨhó̧tɨ́ nɨ́m káá kɨ́ no, ŋgə́ ɨ́ du nò káá kɨ́ ya bɨndóŋ ɓe ɨ́r nɨ́mè ru. Á ɓàcéyè tɨín káàtà Mèèín no ɨnè: «Nò kùb súŋwúkɨ́ yɔ̀ɔ yaà á ɓe káá só.»

¹⁴Nɨ́m kɨ́ ya ndɨŋ u̧ àm faám Mèín ya ɓwáína Àbɨ̀ràhâm ndɨ, nùb du bɨ́ Jwîf séé a kwàɓwê faám ɓe nɨ́m Yésù Krístù ndɨŋ ndè á, nɨ́m a kwàɓwê Nyéhè Mèín ya ɓwállé ɓe ə́mnèé nɨ́m ə́mnɨ Krístùù.

¹⁵Mwin yàá bɨ, nɨ́m ánáyè túúm ɗɨ́m nɨ́mè no: ɓwâ nò kù kwéí jin nyàáŋ noò rɨ, sàmàìn nò kù ɓáaŋkɨ́ jin kíì ɗàà, kɨ́ kù ɓààrénɨ nɨ́m kù ya.

¹⁶Mèín yi ɓwáínaá Àbɨ̀ràhâm ɓe nyȩ nóò ɓwáár. Káàtà Mèèín nɨ wáàwá ŋgə́ ɨ́ tà: «nyȩrɨ́b», hȩ tɨm nɨ̀vɨ́tɨ̀b ví̧i̧ rɨ u̧, ŋgə́ wáahá nɨ́ ŋgə́ ɨ́ tà: «nyȩ wóò», kí ta nɨ̀vɨ́tè mwi̧ ɗóò na á, nò kɨ́ cè Krístù á.

¹⁷Nɨ́m mɨ ɗú tàniì á rè: Mèín ya ɓwáínaá Àbɨ̀ràhâm ɓwáár ŋgə́ ɨ́ tà ní á ndɨ̀ŋmènɨ nɨ́m kɨ́. Dáín təmərì nààsɨ̀b ɨ́ yɔ̀k vɨríí ɨ́ cóóŋ cùr kɨ́ no, ɓíì Mòyíìs ɨ́ fô̧, sàmàìn ɓíì kɨ́ ɓáaŋkɨ́ ɓwáár Mèèín nɨ ɗàà.

¹⁸Ɨ́dù duú ɓè nyər Mèín du nànɨ hȩ nɨ́ɨ́b kwíhɨ̀bì ɗoŋwo nɨ́ ɓíì Mòyíìs kɨ́ ya kwe, ma nɨ kɨ́ ŋgə́ tɨ ɓwáí nàniì sé á. Mèín ya túumna nɨ Àbɨ̀ràhâm nyàŋnjɔ̧̀ noò ɓe ɓwáár ŋgə́ ya ɓwállé á.

¹⁹Mèín ma yi nawoce nɨ́ ɓíì ɓe àm níì? Ŋgə́ ya nawo nɨ ɓíì kɨ́ ɓààrénɨ ɓwáár noò ya, túùmhó̧nɨ nɨ́m du nɨ́ ɗóhîn ɓe ɗûnɨ́m nóò ɗàà nɨ̀vɨ́tè du nɨ́ ndɨ̀ŋniì á. Yaá ɗúnɨ ɓíì kɨ́ yə̀ŋ há̧á̧ hȩ nyȩ Àbɨ̀ràháàm ɓa féínniì, ŋgə́ nò kùb ya ɓwáí ɓwáár kɨ́ ɓe ɨ́r kíí. Dùgallɨb ya ókwo ɓíì kɨ́ yɨ́ Mèèín á, ŋgáb ɨ́ gò tómndéndóŋnɨ tɨ́pénè kù ɓɔ̧ɔ̧.

²⁰Tɨ́pénè duhá nɨ́ mvókín nɨ̀vɨ́tɨ̀b bɨrɨ́bí, ɨ́dù kɨ́ Mèèín, ŋgə́ á nɨ ŋgə́ mwi̧.

²¹Kí ma ɗú tànɨ ɓíì nɨ ɗóhîn ɓe ɓwáár Mèèín ɗàwá á à? Ɗàɓàwá! Ɓíì kù yi dù ku, ɓíì fɨ́tɨ nànɨ nɨ̀vɨ́tè mèè, nɨ̀vɨ́tè yè á sàmàìn du Mèèín íhín nò ɗɨ́ɗɨ̧́ ɓe ɨ́r ɓíì kíì.

²²Ɨ́dù káàtà Mèèín yi wáaɓatɨ́ nɨ́ ɨnayâna nɨ̀vɨ́tɨ̀b á bɨ nì̧ì̧ cumí no, àm nùb ə́əmndé a kwà ɓwáár Mèín ya ɓwállé ɓe ə́ə́m ŋgáb ə́mne Yésù Krístùù.

²³Ɓwâ nɨ̀vɨ́tè yi duye yàréwa ə́ə̀mnɨ Krístùù, nɨ́m yaáyè nɨ nì̧ì̧ ɓíhì no, móŋnɨ ɨnayâna Mèín vììnà nɨ́m ə́ə́m Krístùù kɨ́.

²⁴Ɓíì yaá hȩ nò du nɨ́m gə́tɨ̀tèènɨ àm nɨ́m tɨ̀ ndɨŋ ɓáŋhɨ́nne, há̧á̧ hȩ Yésù Krístù kwá féínndé, àm nɨ́m a sèì nùb ɗɨ́ɗɨ̧́ Mèèín íhín ɓe ə́ə́m nɨ́m ə́mne Krístùù.

²⁵Ɗàrò nɨ̀vɨ́tè yarécií ə́ə̀mnɨ Krístù. Nɨ́m nɨ nì̧ì̧ ɓíhì kɨ́ no ɗàcɨ̀wá.

²⁶Ɓe ɨ́r ə́ə́m nyí ə́mne Krístùù á nyí lâs nyí sei munɨ́b Mèèín ndu, àm kɨ́ á nyí duce ɓaín ɓe Yésù Krístù ru.

²⁷Nyí lâs nyí ya kɔktɨ́ kɔ ə́mní àm nyí a dù ɓaín ɓe Krístùù, ɗàrò nyí lə́récií nɨ́ ɗɨ́m ju heé só hȩ Krístù nɨ̀mɨr.

²⁸Ɗàrò, mvókín Jwîf bɨ ɓe nùb du bɨ́ Jwîf séé, mvókín mbɔ́klɨ́b ɓe nùb du bɨ́ mbɔ́klɨ́b séé, dùgɨ̀ mvókín nɨ̀ŋgwáàb ɓe nɨ̀gubì, gɔ̀ nɨ ɗàcɨ̀wá, nyí á cɨ̀ nɨ lâs mwi̧, ɓe ju ɓaín nyí du dùnɨ ɓe Yésù Krístùù.

²⁹Hȩ nyí du óknɨ ɓe Krístùù, nyí duɓagɨ nyȩrɨ́b Àbɨ̀ràháàm á. Nyər Mèín ya ɓwáí nànɨ hȩ nɨ́ɨ́b kwíhɨ̀bì ɓace óknɨ ɓe nyí á.