Read Vute Nùb Gàlàtíì 4 Bible Online

Nùb Gàlàtíì 4 - Vute bible

Nùb Gàlàtíì 4

¹Nɨ́m mɨ pə́ré á ɨnè: ɓwâ mwin kwíhɨ̀ duye mɨ̀ténèé, ŋgə́ du hȩ mbɔ́ɔ́ á. Ŋgə́ á móŋnɨ nɨ́ɨ́b kwíhɨ̀b tá noò há̧á̧ hȩ tá no kɨ́ kwá kúré, dugií hȩ nɨ́ɨ́b kwíhɨ̀b kɨ́ kwá ók ɓe ŋgéé.

²Ɓwâ ŋgə́ duɓaye mutíí, nɨ̀vɨ́tɨ̀b ɨ́ du ŋgə́ gə́tɨ̀nɨ ŋgə́ ɓe nɨ́ɨ́b kwíhɨ̀b kɨ́ ru, há̧á̧ hȩ tá noò ɓa pénɨ ŋgə́ gbákcií, sàmàìn ŋgə́ nɨ̀mɨr gə́tɨɓacɨ nɨ́ɨ́b kwíhɨ̀b kíì.

³Kɨ́ nɨ́mè ɓwê, ɓwâ nɨ́m yi duye àmɨɨr ɗə̀ə̀ŋyèwáá, nɨ́m yaá hȩ mbɔ́klɨ́b nɨ́ɨ́b ɓáŋhɨ́b ɗɔ̀bɨ́nné.

⁴Hȩ ɓwâ Mèín yi ɓwállé yi ɗóoré, ŋgə́ ɨ́ tómwò mwin nóò ɗɔ̀bín. Nɨ̀gwi ɨ́ fèìn mwɨi kɨ́. Mwɨi kɨ́ ɨ́ yà jə̀ŋnɨ ɓíì Mòyíìs,

⁵àm céínhó̧kɨ́ nùb yi du nì̧ì̧ ɓíì kíì noò cumí, ɗà nɨ́m a sèì munɨ́b Mèèín.

⁶Mèín yi ɗúú túùmnɨ ɨnayâna nyí dumeɓa munɨ́b níì á, á ŋgə́ ya tómwo Nyéhè Mwin nóò gò nɨ́m kɨ́ɨ́nɨ ru. Nyéhè kɨ́ á tànɨ ɨnè: «Bɨ̀bá móò!»

⁷Hȩ dùnɨ u̧nèé, wu wu mbɔ́ɔ́ sé cɨ̀, wu ducɨ wu mwin Mèèín á. Hȩ wu dùnɨ mwin Mèèín, nyər du hȩ nɨ́ɨ́b kwíhɨ̀b Mèín kɨ́kkɨ́na munɨ́b noò rè, ŋgə́ ɓa wu nànɨ á.

⁸Ɓwâ nyí ya duye Mèín mɨr ɗə̀ə̀ŋwáá, nùb kùb ya lə́əmkom mèìn bɨ á, ŋgáb ɨ́ dù bɨ́ mèín bɨ sé rɨ, nyí yɨɨ́m mbɔ́klɨ́b ŋgábè á.

⁹Ɨ́dù ɗàrò, nyí ɗəəŋcií nɨ́ Mèín, (kɨ́ kù ŋgə́ ɨ́ ɗəəŋɓacéye nɨ́ nyí ru), nɨ́m nyí yacuré tùnɨ nɨ́ɨ́b ɓáŋhɨ́b du bɨ́ ɓe nyòm kù ɗàà duce bɨ́ nɨ́m kù kpɔ́knɨ ɗàwáá ma á cè ní? Nyí ɗúce nɨ́ sèìcùkwànɨ mbɔ́klɨ́b ŋgábè ɓe àm níì?

¹⁰Nyí á dɨ̀ɨ̀mɓànɨ ye bɨ kù, njumɨb kù, ɓe mvókín dánní bɨ kù, dùgɨ̀ dáín bɨ kù.

¹¹Vùù á mɨ bìnɨ ɓe àm nyínè kɨ́: Kí du vùùm ə́rɨ́b mɨ éí ɓe ɨ́r nyínè rè lɔ̧́sé nɨ́ ɗàá sam á hàye!

¹²Mwin yàáb bɨ moò, mɨ yóóŋ nyí: dunáam hȩ mɨ, hȩ mɨ duɓwéece hȩ nyínè. Nyí ya nɨ́ mɨ ɓáŋhîn kù ndɨ̀ŋwá.

¹³Nyí ɗəəŋtɨ́, ɓwâ yə́b ya bɨré mɨ yɨ́ nyínè rɨ á mɨ ya tana nyí Kìn Nyɔ̧ɔ̧́ kɨ́ yàyɨ̀rí ru.

¹⁴Mɨ yɨ á ɓà jablîn ɓe yáb mo kɨ́, nyí ɨ́ dù nɨ́ mɨ nyá̧nɨ̀wá; nyí cè mɨ lèèwá. Nyí yi gamɓacéyetɨ́ mɨ hȩ kùb gamce dùgal Mèèín ndɨ u̧, kɨ́ kù hȩ kùb gamɓacéye bɨ Yésù Krístù rɨ u̧.

¹⁵Nyí yaáɓàhácè mɨ̀tùú ye! Á sàmàìn mɨ ta ɨnayâna yi tàgɨ̀ nyí mvéè íí ɓe ɨ́r yáb mo kíì, nyí yaá mvéèmènɨ. Ní ɨ́ kwacɨ nɨ́ nyí?

¹⁶Kèè mɨ settɨ́ mɨ́ nò nyínè ɓi̧ní àm mɨ tana mɨ́ nyí àmɨrìí à?

¹⁷Nùb du bɨ́ sə̀ŋnɨ gíí ɓe jə̧̀ə̧́ ɓíì Mòyíìs kɨ́ á ɗúɓànɨ àm nyínè cei, ɨ́dù nɨ́m ŋgáb ɗú ndɨ̀ŋniì nɨ nyɔ̧ɔ̧́ ɗàà. Ŋgáb á ɗúnɨ vúm yè gɔɔkíí nɨ́me nyí ɗà nyí a tùbɨ̂ŋcì nɨ́ vúm.

¹⁸Á ɓà nyɔ̧ɔ̧́ nɨ̀vɨ́tè túmnɨ̀ ɗûnɨ́m ɓe ɨ́r ndɨ̧̀ɨ̧́ nyɔ̧né, ɨ́dù a dù ɓwâ lâs. Nɨ tàhó̧ɗóòwá ɓwâ mɨ du mvókín nyínè noò.

¹⁹Munɨ́b cutɨ́b moò, mɨ á pə́cùkwàhánɨ jábɨ́r ɓe ɨ́r nyínè, há̧á̧ hȩ nyí ɓa tùnɨ guur gùrí Krístùù. Jábɨ́r kɨ́ á hȩ ɓwâ nɨ̀gwi du fènniì.

²⁰Ɓè nɨ́me nyí tɨ duye yɨ́ mwi̧í̧ naa! Mɨ yè ɗəəŋtɨ́ nɨ́m mɨ nyinna nyínè. Àm nyínè kɨ́ á ɓà mɨ só yínɨ.

²¹Tananáye mɨ, nyí nùb ɗúɓɔ̧́ jə̧̀ə̧́ ɓíì Mòyíìs lè, nyí nɨ óknɨ nɨ́m ɓíì Mòyíìs du tàniì ɗàwá ye!

²²Á tɨín káàtà Mèèín no ɨnayâna Àbɨ̀ràhâm ya feintɨ́ munɨ́b nɨ̀ŋgwáàb bɨrɨ́b. Mwi̧ ɓe Àgáàr nò yi du mbɔ́klí, mwi̧ cè ɓe Sárà nò yi du mbɔ́ɔ́ séé.

²³Kɨ́ ŋgə́ yi fein ɓe Àgáàr yi duɓahá mwin hȩ nùb lâs du fènniì á, ɨ́dù kɨ́ ɓe Sáràà yi du nɨ ɓwáár Mèèín á.

²⁴Á sàmàìn sà̧à̧ kɨ́ duna nyí hȩ túúm. Nɨ̀gub bɨrɨ́b ɗàrɨ́ du jin nyàáŋ bɨrɨ́b á. Jin nyàáŋ mwi̧ du kɨ́ ya jin ɓe Sìnàyíì yaà á, Àgáàr ɨ́ du túúm jin kíì ru. Munɨ́b noò du mbɔ́klɨ́b á.

²⁵Àgáàr du ɓe Sìnàyíì du ti Àráàb no rɨ á. Ŋgə́ du hȩ Yèrúsàlèm du jíìb mwánnè mbɔ́ɔ́ ɓe nùb no kwe lâs lè á.

²⁶Ɨ́dù Yèrúsàlèm ɓɨllɨnne nɨ mbɔ́ɔ́ sé, nɨ́m du nùb no kwe á, ŋgə́ du hȩ yà nɨ́mè á.

²⁷Káàtà Mèèín á wáàɓàcéyènɨ ɨnè: «Wu nò du mámmgbu̧ú̧, ók mɨ̀tù! Wu nò du yíìnɨ́m fù̧ní ɗə̀ə̀ŋwáá, ókɓam mɨ̀tù cei! Ɓetí nɨ̀gwi ŋgwáá ya mvúré ɓa fènnɨ munɨ́b ví̧i̧ a ndôŋ nò ŋgwáá du ɗúniì á.»

²⁸Kɨ́ nyínè, mwin yàá bɨ moò, nyí du nɨ munɨ́b kùb fein ɗóhîn ɓe ɓwáár Mèèín á, hȩ Ìsâk u̧.

²⁹Ɓwâ ya tíí, mwin kùb feinɓa hȩ kùb feinlɨ́ŋndé yaá nɨ jóktɨ̀nɨ mwin kùb fein ɓe nyòm Nyéhè Mèèín. Nɨ́m kɨ́ á nɨ́m ndɨ̀ŋɓwênɨ ɗàrò u̧.

³⁰Káàtà Mèèín á wáànɨ ɨnè: «Ŋgɨ́íkɨ́ɨm mbɔ́ɔ́ ɗàrɨ́ ɓe mwin nóò, ɓetí nɨ ɗúwa mwin mbɔ́klí kwàɓwê nɨ́ɨ́b kwíhɨ̀b táà hȩ mwin yà nóò du nɨ́ mbɔ́ɔ́ séé.»

³¹Mwin yàá bɨ moò, nɨ́m nɨ munɨ́b mbɔ́klí sé, yà nɨ́mè nɨ mbɔ́ɔ́ sé ndóŋ.