Read Vute Nùb Gàlàtíì 5 Bible Online

Nùb Gàlàtíì 5 - Vute bible

Nùb Gàlàtíì 5

¹Krístù ya céíntɨ́ nɨ́m àm nɨ́m a dùɓà mvòŋsòòŋ. Ə́əŋnáam kpéín ju mvòŋsòòŋ kɨ́ no, nyí a gə́tè nò kù tɨ̀ ndɨŋ nyí a dùcù mbɔ́klɨ́b ɓíì Mòyíìs.

²Mɨ Pôl, ókná mɨ. Mɨ tànà nyí, nyí ɨ́ ndɨ̀ŋ kùb lə́nà nyí ndɨ̀, nɨ́m Krístù ndɨŋ ɓe ɨ́r nyínè rè ma tɨ̀ nɨ nyí kpɔ́kkwacɨ̀r.

³Mɨ wáacunakwatɨ́ nò lâs ndɨŋ kùb lə́nà ŋgə́ ndɨ̀ɨ́ ɨnayâna, ɗú ŋgə́ jə̀ŋɓà ɓíì Mòyíìs lâs á.

⁴Nyí nùb du mánɨ dùnɨ Mèèín íhín nùb ɗɨ́ɗɨ̧́ ɓe jə̧̀ə̧́ ɓíì Mòyíìs, nyí cɔ̧́tɨ́ ɓe Krístù, nyí məmtɨ́ ndɨ̀ŋnyàáŋ Mèèín, nyí nɨ̀miib ɨ́ máɓa nɨ́ ru.

⁵Kɨ́ nɨ́mè, nɨ́m á ɓe gíí ɨnayâna Mèín ɓa ndɨ̀ŋnɨ nɨ́m sèì nùb ɗɨ́ɗɨ̧́ no íhín á, ɓe nyòm Nyéhè Sarîn du nɨ́m nànɨ nyòme ə́ə́m nɨ́mè noò, nɨ́m móŋkɨ́ kí á.

⁶Ɓetí nɨ́m ɨ́ dù ɓaín ɓe Yésù Krístù, wu lə́gɨ̀ ndɨ̀, wu dùgɨ̀ ndɨ̀ lə́wa, nɨ jábɨ̀nɨ ɗàà: nɨ́m du nɨ́ tíí á ə́ə́m du ndɨ̀ŋnɨ ɨnayâna nɨ́m ɗú kùŋ mwin yàá.

⁷Nyí yi yarényaaŋɓaháá mîn, na ɨ́ ndɨŋ nɨ́ nyí mbɨ́k jə̧̀ə̧́ Kìn àmɨrìí?

⁸Nò ndɨŋ nyí mbɨ́k jə̧̀ə̧́ Kìn àmɨrì kɨ́, nɨ Mèín nò du nyí ɓéniì sé ɨ́ tómwo ŋgə́.

⁹Kùb á tànɨ: «Mvùùŋ ti ŋgób á múndɨ̀nɨ fàrîn.»

¹⁰Ɨ́dù kɨ́ moò, ɓe ju ɓaín nɨ́me nyí duná dùnɨ ɓe Kékéé, gíí moò á nyí ya. Mɨ ɗəəŋtɨ́ mɨ̀lə́m nyínè ɓa dùɓwênɨ hȩ kɨ́ moò á. Ɨ́dù nò du nyí kɨ̀cáàb ŋgwȩ́ȩ́ tùùkɨ́nɨ kɨ́, ŋgə́ dùgɨ̀ na, Mèín ɓa ŋgə́ túùmnɨ jábɨ́r á.

¹¹Kɨ́ moò, mwin yáà bɨ ə́mní, ɨ́ tà mɨ á ɓéèkwànɨ ɨnayâna kùb lə́ ndɨ̀, kùb ma túumkwacɨ mɨ jábɨ́r ɓe àm ə́mní àm níì? Óo duú u̧, Kìn mɨ du tànɨ ɓe ɨ́r Krístù kùb yi kpáŋwú bɨ̧̀ɨ̧́ rè tɨ̀ nɨ kùb njù̧ nàcɨ̀r.

¹²Nùb du gèrénɨ jábɨ́r mvókín nyínè no ɓe àm lê ndɨ̀ɨ́ kɨ́, ŋgáb bɨ ndɨ̀ lə́hó̧ɗóò, ŋgáb nyòkkɨ́hácɨ̀ kɨ́ me rɨ́ ye!

¹³Kɨ́ nyínè, mwin yàá bɨ ə́mní, Mèín ya ɓéé nyí, nyí gò dùɓà nɨ mvòŋsòòŋ. Nɨ́m duré á, nɨ ɗúwa àm nyí tɨ ducɨ nɨ́ mvòŋsòòŋ, nyí ndɨ̀ŋ nɨ́ɨ́b ɓáŋhɨ́b hȩ mɨ̀lə́m nyí nɨ̀mibi ɗúré. Ɗú nɨ́ nyí dù ɓe ɗûnɨ́m á, àm nyí a kpɔ̂ kùŋ mwin yàá mvókín nyínè no.

¹⁴Ɓíì á tànɨ ɨnè: «Ɗúum kùŋ ɓwà woò hȩ wu ɗú síí wu nɨ̀mɨrí.» Ɓíhɨ̀b lâs fó̧ kɨ́ mwi̧ kɨ́ no á.

¹⁵Ɨ́dù nyí ɨ́ yà ndɨ̀ŋnɨ nɨ́ɨ́b hȩ nyèém, nò rè ɗə́mɨ kùùŋ, nò rè jóktɨ kùùŋ. Nyí ma gə́tìi, duú u̧ ɗàà nyí ɓa ndùùcùɓànɨ síí mvókín nyínè á.

¹⁶Nɨ́m mɨ tana nyínè á rè: mbɨ́knáam Nyéhè Sarîn gè mè nyínè, nyí a dù nɨ́ nɨ́m mɨ̀lə́mkáín ɓáŋhɨ́b nyí nɨ̀mibi ɗúré ndɨ̀ŋcɨ̀r.

¹⁷Ɓetí mɨ̀lə́m nɨ́m nɨ̀mibi nɨ hȩ kɨ́ Nyéhè Sarɨ́nne ɗàà, mɨ̀lə́m Nyéhè Sarɨ́nne cè nɨ́ hȩ kɨ́ nɨ́m nɨ̀mibi ɗàà: ɓe kùùŋ nɨ su á, àm kɨ́ á du sàmàìn nyí ndɨŋ nɨ́m nyí ɗúré ɗàà ru.

¹⁸Nyéhè Sarîn ɨ́ dù nyí gènɨ, sàmàìn nyí du mbɔ́klɨ́b ɓíì Mòyíìs ɗàà.

¹⁹Nɨ́ɨ́b mɨ̀lə́mkáín ɓáŋhɨ́b nɨ́m nɨ̀mibi du tànɨ nɨ́m ndɨ̀ŋte, nɨ́m ɗəəŋɓatɨ́ mîn. Ŋgə́ á tànɨ: nɨ́m ndɨ̀ŋ ŋguùŋ du nànɨ nɨ́m sə̀réé, nɨ́m dù ju du hàrák ɗàwáá, nɨ́m a ndɨ̀ŋtèèsòɓà nɨ́ɨ́b ɗàá ku hȩ nɨ́m ɗúré.

²⁰Nɨ́m yóŋtèè mèín saai, nɨ́m a éítèè ə́rɨ́b májɨ̀ɨ̀. Ɓi̧í̧ lə́ mvókín nɨ̀vɨ́tɨ̀bì, ŋgáb ndàìtèè mɨ̀ndárɨ̀b. Nɨ́m kùùŋ ndɨŋndé íhín nyɔ̧ɔ̧́ dùr, ŋgáb a dù njɔ̧̀ ɓə́ndîn, mɨ̀lə́m ŋgábè a dù màjundè.

²¹Ŋgáb á ɓe sunɨ̀b, ŋgáb mbirúúb á, ŋgáb á ɓe tɔ̧̀, ɓe nɨ́ɨ́b kù tèè fɨ́tɨ kíí. Mɨ takɨ́na nyí ɗàá ɗàrò hȩ mɨ tɨ tacɨ rɨ́ á, nùb du ndɨ̀ŋnɨ u̧nèé kwá bɨ Haam Mèèín no lə̂r.

²²Ɨ́dù nɨ́m Nyéhè Sarîn du nàniì á ɗûnɨ́m, mɨ̀tù, ju ɗóóŋ, jíhɨ́r, mwàm, nyàŋnjɔ̧̀ ɓe jɨ̧.

²³Njɔ̧̀ kerîn ɓe bìí múb síhé. Ɓe ndɨ̧̀ɨ̧́ nɨ́ɨ́b kíì, nɨ́m nɨ jààŋkɨ́nɨ ɓíì ɗàà.

²⁴Nùb du bɨ́ óknɨ ɓe Krístùù ndɨŋtɨ́ ɨnayâna mɨ̀lə́m ɓáŋhɨ́b ɓe ɗûnɨ́m síí ŋgáb nɨ̀mibi kútɨ.

²⁵Hȩ Nyéhè Sarîn nànɨ nɨ́m mèè, nɨ́m mbɨ́kná Nyéhè kɨ́ gè nɨ́m.

²⁶Nɨ ɗúwa nɨ́m dùná ɓe wútèé síhé, nɨ́m nɨ ɓe mɨ̀nùúm dùnâr, nɨ́m nɨ ɓe ɓi̧í̧ dùnâr.