Read Vute Nùb Gàlàtíì 6 Bible Online

Nùb Gàlàtíì 6 - Vute bible

Nùb Gàlàtíì 6

¹Mwin yàá bɨ ə́mní, nò kù ɨ́ ndɨ̀ŋ kum, nyí nùb du ɓe Nyéhè Mèèín sóò, gecurénáam nò kɨ́ ju ɗɨ́ɗɨ̧́ɨ̧́; ɨ́dù nyí a túùmnà ŋgə́ njɔ̧̀ kerîn. Nɨ́m mɨ tanace nò lâs mvókín nyínè noò á rè: gə́tɨɓam wu nɨ̀mɨr àm wu tɨ̀ mbɨ́kɓwée síí wu nɨ̀mɨrí gùrénɨ kɨhɨri.

²Dunáam ju nò rè kpɔ́ɔ́ kùùŋ, nò rè a kpɔ́kcùcê kùùŋ há̧á̧ jábɨ́rí no. Ɓe ndɨ̧̀ɨ̧́ u̧nèé, nyí ɓa jə̀ŋnɨ ɓíì Krístùù á.

³Nò kù ɨ́ tà ní ɨ́ duɓa nɨ́ ru u̧ kɨ́ ŋgə́ nɨ nɨ́m kù sé, ŋgə́ mbáaŋɓa nɨ síí ŋgə́ nɨ̀mɨrí á.

⁴Nò lâs góòmcùɓà síí ŋgə́ nɨ̀mɨrí, duú sàmàìn ɗɨ́m kɨ́ na ŋgə́ mɨ̀tùú, mɨ̀tɔ̀k kɨ́ du nɨ kɨ́ ŋgə́ mwi̧í̧ á, nɨ kɨ́ ŋgə́ ɓɔ̧ ɓe nɨ̀vɨ́tɨ̀bì dùr.

⁵Ɓetí nò lâs kwá ndáŋɓa nɨ ɓe ha̧á̧ jábɨ́rí noò.

⁶Nò kùb du tɔ̀ɔ̀nànɨ Kìn Nyɔ̧né, nɨ́m ŋgə́ du ɓe kíí, ŋgə́ nàɓwê nò du ŋgə́ Kìn kɨ́ tɔ̀ɔ̀nàniì.

⁷Nyí nɨ síí mbáŋhɨ̀r, Mèín nɨ yɨŋmîn ɗàà. Nɨ̀vɨ́tè namhá nɨ́ nɨ́m ŋgə́ ɗoŋndé.

⁸Ŋgə́ ɨ́ ɗòŋ nɨ́m mɨ̀lə́m ŋgə́ nɨ̀mɨrí ɗúré, mɨ̀lə́m ŋgéé kɨ́ ɓa ndɨ̀ŋnɨ ŋgə́ nàm cwé á. Ɨ́dù ŋgə́ ɨ́ ɗòŋ nɨ́ nɨ́m Nyéhè Sarîn ɗúré, Nyéhè kɨ́ ɓace ndɨ̀ŋnɨ ŋgə́ nàm mè mɨ̀cɨ̧̀ á.

⁹Nɨ́m nɨ ndɨ̧̀ɨ̧́ nyɔ̧né mbɨ́knâr. Nɨ́m ɨ́ dù yəré no gèrénáwa, nɨ́m tɨ̀ namnáhá nɨ́ ɓwâ ye kɨ́ ɓa ɗóòniì.

¹⁰Hȩ dùnɨ u̧nèé, ɓwâ mvókín səmndé, nɨ́m ndɨ̀ŋnáhá nɨ nùb lâs nyɔ̧ɔ̧́, nùb kù cóóŋ sé mwin yàá bɨ ə́mní.

¹¹Ŋgáár tɨtɨnnéé nyí pə́ káàtà̧à̧ jííb jííb ɗàrɨ́, mɨ nɨ̀mɨr ɨ́ tɨinɓa ru, nɨ nò kù sé ɨ́ tɨnna mɨ.

¹²Nùb du nyí kpɔ́ɔ̀nɨ àm lê ndɨ̀ɨ́ ɗàrɨ́, ndɨŋ bɨ nɨ́m mɨ̀lə́m nɨ̀vɨ́tɨ̀bì ɗúré á, àm kùb a pê vúmè. Nùb kɨ́ ndɨŋɗóo bɨ u̧ àm kùb tɨ̀ túmnɨ vúm jábɨ́r ə́mní ɓe ɨ́r Krístùù á.

¹³Nùb du ɗúnɨ àm lə́nàá kùb ndɨ̀ɨ́ kɨ́, ŋgáb nɨ̀miib ŋgáb jə̀ŋɓàcéyènɨ ɓíì Mòyíìs ɗàà. Ŋgáb á ɗúnɨ nyí lə́ ndɨ̀, cùr kɨ́ no ŋgáb a â síí àm vúm du nùb tɨ lə́na nyí ndɨ̀ɨ́.

¹⁴Duú nɨ́ kɨ́ moò, mɨ á ɓa mɨ síí moò ɓe bàŋ Yésù Krístù nò du Kéké nɨ́mè á; ɓetí ɓe nyòm bàŋ Krístùù, nɨ́ɨ́b ɓáŋhɨ́b ɗɔ̀bɨ́nné mɨ kɨ́kcɨ̀nɨ ɗàà. Àm moò cɨ̀ ɓe nɨ́ɨ́b kɨ́ ɗàà.

¹⁵Wu lə́gɨ̀ ndɨ̀, wu dùgɨ̀ ndɨ̀ lə́wa, nɨ jábɨ̀nɨ ɗàà. Nɨ́m du nɨ́ tíí á Mèín ndɨ̀ŋ nɨ́m sèìcù nùb heé.

¹⁶Nɨ́m mɨ tana nùb lâs du jə̀ŋnɨ tɔ̀ɔ́ móò á rè, dùgɨ̀ ɓwê gbàŋ Mèèín: mɨ yóóŋ Mèín ŋgə́ nà ŋgáb ju ɗóóŋ, ŋgə́ ók ŋgáb mwàm.

¹⁷Yànɨ ɗàrò, nò kù nɨ mɨ jábɨ́r túùmcɨ̀r, ɓetí lààm bɨ mo só rè á túùmnɨ ɨnayâna mɨ ók mɨ́ ɓe Yésù á.

¹⁸Mwin yàá bɨ ə́mní, mɨ yóóŋ Yésù Krístù nò du Kéké nɨ́mè, ŋgə́ fàm nyí lâs. Àmèn!