Read Vute Nùb Èféès 1 Bible Online

Nùb Èféès 1 - Vute bible

Nùb Èféès 1

¹Mɨ Pôl, mɨ nò Mèín ya ca dù nò tómé Yésù Krístùù, mɨ ɨ́ tɨin káàtà rè ru. Mɨ tɨnna nyí gbàŋ Mèèín du dùnɨ Èfês á nyí nùb ə́mnɨ Mèín ɓe ɨ́r ju ɓaín nyí du dùnɨ ɓe Yésù Krístùù.

²Mɨ yóóŋ Mèín nò du Tá nɨ́mè, ɓe Yésù Krístù nò du Kéké nɨ́mè, ŋgáb nà nyí faám ɓe ju ɗóóŋ.

³Nɨ́m ŋgə̀mná Mèín, ŋgə́ nò du Tá Yésù Krístù nò du Kéké nɨ́mè. Ɓe ɨ́r ju ɓaín nɨ́m du ti còmné ɓe Krístùù, ŋgə́ yi naá nɨ́m faám lâs Nyéhè Sarîn du nàniì.

⁴Ɓetí Mèín ɗɔ̀ɔ́b nyààŋɓàyèwá, ŋgə́ yi cakɨ́cií nɨ́ nɨ́m, nɨ́m a dù no íhín járkɨ́ták kum kù só ɗàà, ɓe ɨ́r ju ɓaín nɨ́m du ɓe Krístùù. Mèín á nɨ́m ɗúɓànɨ,

⁵ŋgə́ ya takɨ́cií nɨ́ tíí ɨnayâna ní ɓa ndɨ̀ŋnɨ nɨ́m sèì munɨ́b níì á, ɓe ɨ́r ju ɓaín nɨ́m du ɓe Yésù Krístùù. Ŋgə́ ya ɗú nɨ́m kɨ́ ndɨ̀ŋ u̧ àm yi nyaŋ ŋgə́ sumíì á.

⁶Hȩ dùnɨ u̧nèé, nɨ́m ŋgə̀mná Mèín ɓe ndɨ̀ŋnyàáŋ kàm ŋgə́ túumna nɨ́m ɓe nyàŋnjɔ̧̀ àm nɨ́m du ɓaín ɓe Mwin ɗûnɨ́mí noò rè.

⁷Ɓetí cwá Krístù kú hȩ satɨgà rè céínhó̧tɨ́ nɨ́m ɓáŋhɨ́nne, cuum nɨ́mè á cè tɨ́in. Ɓe ndɨ̧̀ɨ̧́ u̧nè kɨ́, Mèín túumnaá nɨ́m ndɨ̀ŋnyàáŋ kàm ŋgə́ du ɓe kíí.

⁸Ŋgə́ túumnaɓatɨ́ nɨ́m ndɨ̀ŋyàáŋ kɨ́ ɓe nàá ŋgə́ naɓa nɨ́m kɨ̀cáàb ɓe ɗɨɨ́ŋ ndè.

⁹Ŋgə́ ndɨŋtɨ́ nɨ́m ɗə̀ŋhɨ̀ ɓwáár noò yi du yo̧né. Ŋgə́ ya ɓwáíkɨ́cií nɨ́ ɨnayâna ní ɓa nɨ́m túùmnànɨ kɨ̀cáàb no kɨ́ Krístù ya á.

¹⁰Ɓwáár no ŋgə́ ɓa túùmnɨ ɓwâ ɗɔ̀ɔ́b kwá cɔ̧́ré kɨ́ du ɨnayâna ní ɓáàkɨ́ nɨ́ɨ́b lâs; kɨ́b ɓɨllɨnne ɓe kɨ́b ɗɔ̀bɨ́nné cúk, ɗà nɨ̀vɨ́tè mwi̧ a kɨ̂ na á. Nò kɨ́ cè Krístù á.

¹¹Ɓe ɨ́r ju ɓaín nɨ́m du ɓe Krístùù, nɨ́m ducɨ nɨ nùb ɓáin á, ɓetí Mèín yi cakɨ́cií nɨ́ nɨ́m ɗóhîn ɓe ɓwáár noò, ŋgə́ ndɨŋháce nɨ́ nɨ́ɨ́b noò hȩ ŋgə́ nɨ̀mɨ́r ɓwáíɓa ndɨ̀ŋniì.

¹²Hȩ dùnɨ u̧nèé, nɨ́m nùb ya səŋyaye gíí ɓe Krístùù, nɨ́m ŋgə̀mná ŋgə́ ɓetí ŋgə́ á ɓe mgbíí.

¹³Nyí ɓwê, ɓwâ nyí ya ók Kìn àmɨrì, Kìn nyɔ̧ɔ̧́ yi gewona nyí ɓə́rì, nyí yi ə́əmtɨ́ Krístù, àm kɨ́ á Mèín yi kɨ́klé lɨ̀m ŋgə́ nɨ̀mɨ́rí nyínè só ɓe nàá ŋgə́ na nyí Nyéhè Sarîn ŋgə́ ya ɓwáí nàniì rè ru.

¹⁴Nyéhè Sarîn kɨ́ nyaaŋkɨ́nacɨ nɨ nɨ́m nyɔ̧ɔ̧́ Mèín ɓa nɨ́m nàniì á. Ŋgə́ ɓa nɨ́m nànɨ nyɔ̧ɔ̧́ kɨ́ ɓwâ nɨ́m ɓa dùɓàcɨ̀ nɨ céin kɨ́ gwìí mwi̧í̧ rɨ á. Hȩ dùnɨ u̧nèé, nɨ́m ŋgə̀mná Mèín ɓetí ŋgə́ á ɓe mgbíí.

¹⁵Ɓe ɨ́r vùùm nɨ́ɨ́b kíì lâs, ɗàrò hȩ mɨ ók kùb nyìnnɨ ɓe ɨ́r ə́ə́m nyí ə́mne Yésù nò du Kéké nɨ́mè, dùgɨ̀ ɓe ɨ́r ɗûnɨ́m nyí ɗú nùb lâs ók ɓe Mèèín,

¹⁶mɨ mɨ ùwèènɨ sáktèé Mèín ɓe ɨ́r nyínè ɗàà. Ɓwâ mɨ du Mèín yóŋniì, mɨ á nyí lə́ə̀mnɨ.

¹⁷Mɨ á cè ɓwèìnɨ Mèín, Tá Yésù Krístù nò du Kéké nɨ́mè, ŋgə́ nò du Tá du ɓe mgbíhɨ́rí, ŋgə́ nà nyí Nyéhè ɓa ndɨ̀ŋnɨ nyí dù ɓe kɨ̀cáblì, ŋgə́ a túùmnàɓwê nyí Mèín, ɗà nyí a ɗə̀ŋhȩ̀ ŋgə́.

¹⁸Mɨ yóóŋ Mèín, ŋgə́ kùùmnà nyí njɔ̧̀, ɗà nyí a ɗə̀ŋhȩ̀ àmɨɨr, àm nyí a ɗə̀ŋhȩ̀ gíí Mèín ɗú nyí dù ɓe kíí, nyí a ɗə̀ŋhȩ̀ nyɔ̧ɔ̧́ kàm ŋgə́ gə́tɨkɨ́na nùb ók ɓe ŋgéé.

¹⁹Nyí a ɗə̀ə̀ŋɓwéhè nyòm kàm Mèín túmne àm kpɔ́k nɨ́m, nɨ́m nùb ə́mnɨ ŋgéé.

²⁰Nyòm kɨ́ ŋgə́ ya túmnií Krístù ya ɓwâ ŋgə́ ya səəmcuhó̧ ŋgə́ cwéé, ŋgə́ ɨ́ ndɨ̀ŋ ŋgə́ gɨ̀ dùnɨ ɓɨllin no ŋgáár lame rè.

²¹Nyòm kàm ŋgə́ du ŋgáŋnɨ ɓe kíí ndóŋtɨ́ nyòme lâs.

²²Mèín yi ndɨŋtɨ́ Krístù kɨ́k nɨ́ɨ́b lâs, ŋgə́ ɨ́ ndɨ̀ŋ Krístù du mvèìn mɨ̀kwìn nùb ə́mní.

²³Mɨ̀kwìn nùb ə́mní du síí Krístùù á. Mɨ̀kwìn nùb ə́mní kɨ́ no á Krístù duce dùɓà nɨ ru, ŋgə́ nò duɓa ɗɔ̀ɔ́b lè bɨ̂ŋ.