Read Vute Nùb Èféès 2 Bible Online

Nùb Èféès 2 - Vute bible

Nùb Èféès 2

¹Ɓwâ yi tíí, péín ə́mní, nyí yaá nɨ́ kúri ɓe ɨ́r kum ɓe cuum nyínè.

²Ɗɨ́m juu nyínè yaá nɨ́ hȩ kɨ́ nùb ɗɔ̀bɨ́nné. Nyí yaá tùnɨ gurub gùrí mvèìn nɨ̀wàtɨ̀bì, ŋgə́ nò du ŋgáŋnɨ ɗɔ̀ɔ́b lè noò, ŋgə́ nò du wútɨ̀nɨ nùb du Mèín ɓə̀ndɨ̀niì.

³Nɨ́m lâs, nɨ́m yaá ɓwê hȩ nùb kɨ́. Nɨ́m yaá ndɨ̀ŋnɨ nɨ́ɨ́b hȩ mɨ̀lə́m nɨ́m nɨ̀mibi ɗúré. Nɨ́m njɔ̧̀ nɨ́mè ɓe kɨ̀cáàb nɨ́mè ɗúré á nɨ́m yi du ndɨ̀ŋnɨ. Ɓe ɨ́r ju nɨ́m ya dukom u̧ kíì, nɨ́m yi du nùb ŋgwìn njù̧ú̧ Mèèín yi ɓa bìnɨ hȩ bɨ nùb kù rè á.

⁴Ɨ́dù Mèín á ɓà nɨ́m ɗúnɨ, ŋgə́ á cè nɨ́m ókɓànɨ mwàm.

⁵Àm kɨ́ á ɓwâ nɨ́m ya du kúri péín ə́mní ɓe ɨ́r kum nɨ́mè rè, ŋgə́ ya nacu nɨ́m mè àm nɨ́m yi du ɓaín ɓe Krístùù ru. Ndɨ̀ŋnyàáŋ Mèèín ɨ́ ɓáte nyí ru.

⁶Ɓe ɨ́r ju ɓaín nɨ́m du ɓe Yésù Krístùù, Mèín ya nacutɨ́ nɨ́m mè àm nɨ́me Krístù bɨ a ŋgâŋ ti còmné noò.

⁷Túmèé ŋgə́ ya túumna nɨ́m nyàŋnjɔ̧̀ noò ɓe ɨ́r ju ɓaín nɨ́m du ɓe Krístùù kɨ́, ŋgə́ ya ɗú nɨ́m túùmnànɨ kɨ́ gwìí mwi̧í̧ nyàŋnjɔ̧̀ kàm ŋgə́ du ɓe kí ɓe ɨ́r nɨ́mè á.

⁸Ɓetí ndɨ̀ŋnyàáŋ Mèèín ɨ́ ɓáte nyí ru, ɓe ɨ́r ə́ə́m nyí du ɓe kíí. Nɨ nyí nɨ̀miib sé ɨ́ ɓátɨɓa síí, Mèín ɨ́ ɓátɨ nɨ́ nyí ru.

⁹Nyí nɨ síí â, ɓetí ɓə́r nyí kwa kɨ́ nɨ nyí nɨ̀miib sé ɨ́ ndáŋɓa.

¹⁰Nɨ́m duná nɨ́ ŋgáár ə́ré Mèèín á. Ŋgə́ ya nyaaŋtɨ́ nɨ́m ɓe ɨ́r ju ɓaín nɨ́m du ɓe Krístùù, àm mè nɨ́mè no nɨ́m a ndɨ̀ŋ ə́rɨ́b nyɔ̧né. Ə́rɨ́b kɨ́, Mèín ya nyaaŋkɨ́cií nɨ́ ɨnayâna nɨ́m ɓa ə́nnɨ u̧ á.

¹¹Jwîf bɨ á ɓe lɨ̀m lê ndɨ̀ɨ́ só, ŋgáb á cè tànɨ vúm á bɨ́ ndɨ̀ lȩ́ȩ. Nyí nùb du Jwîf fɨnni séé nyí nɨ ɓe lɨ̀m kɨ́ só ɗàà, ŋgáb á cè nyí ɓénɨ (nùb ndɨ̀ lə́waá). Lə́əmcunáɓaye ɓwâ yi tíí hȩ nyí yi duré.

¹²Ɓwâ ya kɨ́ nyí ya nɨ́ ɓe Mèsî ɗàà, nyí ya nɨ́ nùb gbàŋ Ísràyéèl noò sé, jin nyàáŋ Mèèín ɓe ɓwáár ŋgə́ ya ɓwáína gbàŋ noò, nyí ya məmtɨ́. Ɗɔ̀bín hò̧, nyí ya nɨ́ ɓe gíí ɗàà, nyí yi nɨ́ Mèín ɗə̀ə̀ŋcéwa.

¹³Ɨ́dù ɗàrò, ɓe ɨ́r ju ɓaín nyí du ɓe Yésù Krístùù, nyí nùb yi du cóo ɓe Mèèín, cwá Krístù ya kú hȩ satɨgàà gecuróó nyí gín Mèèín.

¹⁴Ɓetí Krístù nɨ̀mɨ́r ɨ́ gewona nɨ́m ju ɗóóŋ ndu, ɓe ndɨ̧̀ɨ̧́ ŋgə́ ndɨŋ Jwîf bɨ ɓe nùb du Jwîf séé dùcù gbàŋ mwi̧ ndè. Cwá ŋgə́ kú ɓe kàré ŋgə́ kaikɨ́ síí nóò kɨ́ ɓeikíí leè yi du ŋgáb gɔ̀ɔ̀kɨ́niì, kí ta ɓi̧í̧ na á.

¹⁵Ŋgə́ waamkíí ɓíì Mòyíìs ɓe nɨ́ɨ́b nokwe lâs, àm ndɨŋ gbàŋ bɨrɨ́b kɨ́ dùcù gbàŋ heé mwi̧ du ɓaín ɓe ŋgéé; u̧ á ŋgə́ gewo ju ɗóóŋ.

¹⁶Ɓe cwá Krístù kú bɨ̧̀ɨ̧́ rè, ŋgə́ cáaŋkíí ɓi̧í̧; Ɓe cwá ŋgə́ kú bɨ̧̀ɨ̧́ kɨ́ ŋgə́ ndɨŋtɨ́ Jwîf bɨ ɓe nùb du Jwîf séé dùcù síí mwi̧, ɗà ŋgə́ ɨ́ ndɨ̀ŋ ŋgáb nyàŋcù ɓe Mèín.

¹⁷Nyí nùb yi du cóo ɓe Mèèín, ɓe nyí nùb yi du kə́sə́ə́, ŋgə́ yi tómwonaá nyí Kìn nyɔ̧ɔ̧́ yi du ɓe ɨ́r ju ɗóóŋ.

¹⁸Kí du nɨ́m lâs, dùgɨ̀ Jwîf, dùgɨ̀ Jwîf sé, á sàmàìn nɨ́m fó̧ Mèèín tíí ɓe nyòm Nyéhè Sarîn mwi̧ kíì.

¹⁹Àm kɨ́ á, nyí nùb du Jwîf séé, nyí nɨ nɨ̀gwííb sé cɨ̀, nyí nɨ nùb go go̧né sé ɓwê, nyí ducɨ nɨ nùb gbàŋ Mèèín noò á, nyí ókce nɨ́ ɓe gbàŋ Mèèín á.

²⁰Nyí duɓwée nɨ hȩ ə́r dúhéé nùb tómé ɓe tɨ́kɨ̀nɨ́b yi yarékɨ́soré á, Yésù Krístù ɨ́ duce jù̧ú̧ dúú kíì ru.

²¹Ŋgə́ ɨ́ du ndɨ̀ŋnɨ dúú kɨ́ dùɓà sáam, ɗà a hàm, a sèì dúú jíri ók ɓe Kékéé ru.

²²Ɓe ɨ́r ju ɓaín nyí du ɓe Krístùù, nyí duɓwée nɨ gbɨ́ktèìn dúú kíì á, àm nyí ɓáatɨ́ ɓe nùb kù, ɓe nyòm Nyéhè Sarɨ́nne, nyí a sèì dúú Mèín du nó dùniì.