Read Vute Nùb Èféès 3 Bible Online

Nùb Èféès 3 - Vute bible

Nùb Èféès 3

¹Mɨ Pôl, ɓe ɨ́r nyí nùb du Jwîf séé, mɨ á nìrì àm mɨ du nɨ̀kɨ̧́ɨ̧ Yésù Krístùù.

²Mɨ lə́mne nyí ókháá kùb nyìnnɨ àm ə́r Mèín ɗob mɨ ɓe nyàŋnjɔ̧̀ noò, mɨ ə́nnà nyínè.

³Ŋgə́ kuumnaá mɨ kɨ̀cáàb mɨ ɗəŋhɨ ɓwáár noò yi du yo̧né, mɨ tɨnnaháyeé nyí àm kɨ́ ŋgób.

⁴Ɓwâ nyí du fàìnnɨ káàtà moò, nyí á ɗə̀ə̀ŋɓànɨ ɨnayâna mɨ ɗəəŋtɨ́ nɨ́m yi du yoó ɓe ɨ́r Krístùù.

⁵Ɓwâ ya tíí Mèín ya nɨ́ nɨ̀vɨ́tɨ̀b ɓwáár yoó kɨ́ túùmnàwá, ɨ́dù ɗàrò ŋgə́ naá Nyéhè Sarîn nyòm túumna nùb tómé ɓe tɨ́kɨ̀nɨ́b du ŋgə́ ə́nnàniì ɓwáár kíì.

⁶Ɓwáár kɨ́ á ɨnè: Ɓe ɨ́r ju ɓaín nùb du Jwîf séé du ɓe Yésù Krístù àm ŋgáb ə́mne Kìn nyɔ̧né, ŋgáb kwaɓwéetɨ́ ɓwáár yoó Jwîf bɨ ya kwaɓwéeré. Ŋgáb á cɨ̀ bɨ ɓaín hȩ ŋgáb du bɨ síí mwi̧. Ŋgáb kwaɓwéetɨ́ ɓwáár Mèín ya ɓwáína gbàŋ noò.

⁷Mèín ɓe nyàŋnjɔ̧̀ noò, ɓe nyòm ŋgéé á mɨ sei nò ə́ré Krístùù, mɨ du ɓéènɨ Kìn Nyɔ̧ɔ̧́ rè ru.

⁸Mɨ mɨ nɨ́m sam á mvókín gbàŋ Mèèín no, ɨ́dù Mèín naá mɨ nyòm mɨ tana nùb du Jwîf séé kìn du ɓe ɨ́r ndɨ̀ŋnyàáŋ kàm Krístùù,

⁹mɨ a ndɨ̀ŋɓwê nɨ̀vɨ́tɨ̀b lâs ɗə̀ŋhɨ̀ ɨna á ɓwáár Mèín du ɓe kíí du fó̧nɨ hàrák. Ŋgə́ nò ya nyaŋhȩ nɨ́ɨ́b lâs, ɓwáár no kɨ́ yaáhá nɨ yo̧ó̧.

¹⁰Àm Mɨ̀kwìn nùb ə́mní a ndɨ̀ŋ nyòm kàtɨ́b du ti còmné noò lâs ɗə̀ə̀ŋgɨ̀ ɗàrò kɨ̀cáàb Mèín du ɓe kíí. Ŋgə́ á túùmnɨ kɨ̀cáàb no kɨ́ jìíb nyiín nyin.

¹¹Mèín ndɨŋ nɨ́m kɨ́ u̧ ɗóhîn ɓe ɓwáár mɨ̀cɨ̧̀ no ŋgə́ ya ɓwáí, ɗà ŋgə́ ɨ́ túmnè Yésù Krístù nò du Kéké nɨ́mè ya rɨ á.

¹²Ɓe ɨ́r ju ɓaín nɨ́m du ɓe Krístùù, ɓe ɨ́r ə́ə́m nɨ́m ə́əmkwa ŋgéé, á sàmàìn nɨ́m fó̧ ə́ə̀ŋnɨ Mèèín tíí ɓe gíí.

¹³Àm kɨ́ á mɨ ta nyí tàmhá njɔ̧̀ ɓe ɨ́r jábɨ́r du mɨ kwàtèènɨ ɓe ɨ́r nyínè ru. Kí ɨ́ du nyí nyààŋkɨ́nànɨ mgbíí kwá ók ɓe nyínè rè ru.

¹⁴Àm kɨ́ á mɨ du cáàmsénɨ ɗàá Mèèín tíí ru, ŋgə́ nò du Táà.

¹⁵Ŋgə́ nò gbàŋ lâs du óknɨ ɓe kíí, dùgɨ̀ ti còmné, dùgɨ̀ ɗɔ̀bín.

¹⁶Mɨ yóóŋ ŋgə́, hȩ ŋgə́ dùɓà nɨ ɓe ndɨ̀ŋnyàáŋ, ŋgə́ tààmnà nyí ə́ə́m nyínè ɓe nyòm Nyéhè Sarîn nóò, ɗà nyí a dùɓà nùb ə́mní tamnɨ̀b.

¹⁷Ɓe ɨ́r ə́ə́m nyí du ɓe kíí, Krístù a dù nyínè njɔ̧̀ɔ̧. Nɨ́ɨ́b nyí du ndɨ̀ŋniì lâs ɗòŋwò ɗûnɨ́m nyí du ɓe kíí ya.

¹⁸Ɗà nyíne nùb gbàŋ Mèèín lâs a ɗə̀ŋhȩ̀ hȩ ɗûnɨ́m Krístùù duɓa jírií.

¹⁹Nyí ɓa ɗə̀ə̀ŋɓànɨ hȩ ɗûnɨ́m Krístùù ndóŋ nɨ́ɨ́b lâs á, faám Mèèín lâs a dùɓà ɓe nɨ́m.

²⁰Mèín á ə́nnɨ nɨ́m no ɓe nyòme. Ɓwâ nɨ́m ɓwei ŋgə́ nɨ́m kù rɨ, á sàmàìn ŋgə́ na nɨ́m a ndôŋ kɨ́ nɨ́m tɨ ɓollé. Nyòm ŋgéé ndóŋɓacéyetɨ́ mɨ̀lə́m lâs nɨ́m du ɓe kíí.

²¹Ɓe ɨ́r ju ɓaín mɨ̀kwìn nùb ə́mní du ɓe Krístùù, mgbíí dù ɓe Mèín tɨ́k kɨ̀ tɨ́k. Àmèn!