Read Vute Nùb Èféès 4 Bible Online

Nùb Èféès 4 - Vute bible

Nùb Èféès 4

¹Mɨ nò du nìrì ɓe ɨ́r Kékéé, nɨ́m mɨ ta nyí ndɨ̀ŋte á rè: Nyí dù ju ɗóhîn ɓe nɨ́m Mèín ɗú yàá ɓwâ ŋgə́ ya ɓé nyínè.

²Nyí nɨ síí wútɨ̀r, dunáam kerîn, nyí a dù ɓe jíhɨ́r. Dunáam ju nò rè kpɔ́ɔ́ kùŋ, nò rè a kpɔ́kcê kùŋ, ɓe ɗûnɨ́m cúk.

³Mánáam dùnɨ ɓwâ lâs ɓaín ɓe nyòm Nyéhè Sarɨ́nne. Nyéhè Sarîn kɨ́ ɨ́ du ndɨ̀ŋnɨ nyí dù ɓaín ndu, ɓe ju ɗóóŋ ŋgə́ du nyí nànɨ rè.

⁴Síí á há nɨ mwi̧cáŋ, Nyéhè Sarîn cè mwi̧cáŋ. U̧nè á ɓwê gíí Mèín ta nyí sə̀ŋte duhá nɨ́ mwi̧cáŋ.

⁵Kéké á há nɨ mwi̧cáŋ, ə́ə́m mwi̧cáŋ, kɔ ə́mní cè mwi̧cáŋ.

⁶Mèín á há nɨ mwi̧cáŋ, ŋgə́ ɨ́ du Tá nɨ́ɨ́b lâs, duce ŋgáŋnɨ nɨ́ɨ́b lâs yaà. Nɨ́ɨ́b kɨ́ lâs ndɨŋce bɨ́ ɗûnɨ́m nóò á, ŋgə́ á cè ŋgábè njɔ̧̀ɔ̧.

⁷Mèín yi naá nɨ́m lâs nyər, Krístù ɨ́ gɔ̀ɔ̀tèènà nɨ́m, nò lâs ɓe kɨ́ ɗóhe ɓe ŋgéé.

⁸Káàtà Mèèín wáatɨ́ ɨnè: «Ɓwâ ŋgə́ ya wúí ɓɨllɨnne, ŋgə́ ya gewúú mbɔ́klɨ́b ɓe ŋgə́. Ŋgə́ ɨ́ nà nɨ̀vɨ́tɨ̀b nyər.»

⁹«Ŋgə́ ya wútɨ́ còóm» kɨ́ tace i̧ á? Kí ɗú tànɨ ɨnayâna ŋgə́ ya séyayeé ko̧ó̧ yáá na á.

¹⁰Nò yi sé ko̧ó̧ rè, ŋgə́ mwi̧ kɨ́ yi ɨ́ wúí há̧á̧ ɓɨllin aŋhîn ndu. Ɓe ndɨ̧̀ɨ̧́ u̧nè kɨ́ ŋgə́ ya yúutɨ́ ɗɔ̀ɔ́b bɨ̂ŋ.

¹¹Ŋgə́ ɨ́ du nò ya na nɨ̀vɨ́tɨ̀b nyər nyiín nyin ndu: ŋgə́ ya naá nùb kù nyòm du nùb tómé, nùb kù ŋgə́ ɨ́ nà nyòm du tɨ́kɨ̀nɨ́b Mèèín. Ŋgə́ ɨ́ nà nùb kù nyòm ɓéhèé Kìn nyɔ̧né, nùb kù cè nyòm ge mɨ̀kwìn nùb ə́mní. Ŋgə́ ɨ́ nàɓwê nùb kù nyòm tɔ̀hí.

¹²Ŋgə́ ya ndɨŋ nɨ́m kɨ́ u̧ àm nùb gbàŋ Mèèín a dù nyaaŋkí̧i̧ ə́nnɨ ə́r hȩ du ɗúnɨ nò ə́mní ə́tte, àm síí Krístùù a yà hàmnɨ ɓe ə́ə́m yáá na á.

¹³Nɨ́m ɨ́ ndɨ̀ŋ u̧, nɨ́m lâs nɨ́m ɓa dùnɨ ɓe ə́ə́m mwi̧ á, nɨ́m a ɗə̀ə̀ŋɓáhè Mwin Mèèín. Nɨ́m ɓa dùnɨ gbɔ̧́ɔ̧ ə́ə́m nɨ́mè no á, nɨ́me Krístù bɨ a dùɓàgɨ̀ hàrák.

¹⁴Nɨ́m tɨ̀ nɨ dùcɨ̀wá hȩ mucutɨ́b kùb fɨ́tɨ mbáàŋtèènɨ péín ndè péín ndè ɓe tɔ̀ɔ́ bɨ kàŋnì fɨ́tɨ gèrénɨ kùb kumí.

¹⁵Àmɨɨr nɨ́m ɓa ɓéènɨ ɓe ɗûnɨ́m ndè ɨ́ ɓacéye nɨ́ ndɨ̀ŋnɨ nɨ́m nɨ́m gbák, nɨ́m a ɗóhè ɓe Krístù, ŋgə́ nò du ŋgwé tíí ru.

¹⁶Ŋgə́ ɨ́ du ndɨ̀ŋnɨ nɨ́m gɔ̀ bɨ sóò duɓa jɨ́mnîn, ɨ́ dùkwà ɓaín ɓe kùb hȩ du ɗúniì ru. U̧nè á ɓwâ gɔ̀ mwi̧ du ə́nnɨ ə́r nóò rɨ, síí bɨ̂ŋ á cè hàmnɨ ɓe ɗûnɨ́m.

¹⁷Nɨ́m mɨ du nyí tànàɓànɨ wááŋ ɓe ɨ́r Kékéé á rè: nɨ ɗúcɨ̀wá nyí dùkwà ju hȩ nùb Mèín mɨr ɗə̀ə̀ŋwáá. Mɨ̀lə́m ŋgábè nɨ́m kù kpɔ́knɨ ɗàà.

¹⁸Kɨ̀cáàb ŋgábè á nɨ ndùúŋ. Sàmàìn ŋgáb kwa mè Mèín du nàniì ɗàà, ɓetí ŋgáb bɨ nɨ́m kù ɗə̀ə̀ŋɓàwá, ŋgáb á kwàcè bɨ́ ɓe ɗèìntóo.

¹⁹Ŋgáb bɨ sə̀ré ŋgwȩ́ȩ́ ɗàà, ŋgáb á bɨ ndɨ̀ŋsòɓànɨ nɨ́ɨ́b ɗàá ku u̧. Ŋgáb á ndɨ̀ŋtèènɨ ŋguùŋ du nànɨ sə̀réé, àm ɓoò no ɗàà.

²⁰Nɨ ɓe kúúŋ ɗɨ́m kíì sé á nyí ya ɗəŋhȩ Krístù.

²¹Hȩ nyí ya ók kùb nyìnnɨ àm Yésùù, nyí ɨ́ sèìcê nùb ə́mní, mɨ lə́mne kùb yi tɔɔnaá nyí àmɨɨr du ɓe ɨ́r ŋgéé.

²²Àm kɨ́ á du ɗúnɨ nyí mbɨ́k njɔ̧̀ fìn nyí ya du ɓe kí tíí rɨ, mɨ̀lə́m njɔ̧̀ fìn kɨ́ no du kùb mbáàŋniì á kùb gèrénɨ cwéé.

²³Á ɗúnɨ njɔ̧̀ nyínè ɓe kɨ̀cáàb nyínè dùcù heé.

²⁴Dunácɨm ɓe ɗɨ́m heé hȩ ɓwâ Mèín ya nyaaŋyaye nyínè. Nò ducɨ nɨ́ ɓe ɗɨ́m heé, ŋgə́ ɨ́ ə́mnè Kìn àmɨrì rɨ, ɗɨ́m juu noò á nɨ ɗɨ́ɗɨ̧́, ŋgə́ á cè nɨ́ ɗɨ́ɗɨ̧́ Mèèín íhín.

²⁵Àm kɨ́ á du ɗúnɨ nyí mbɨ́k kààŋ. Nɨ̀vɨ́tè tànàhá kùùŋ àmɨɨr, ɓetí nɨ́m duná mwin yàá ɓe kùb á.

²⁶Njù̧ ɨ́ bì nyí, gə́tɨnáam, nyí tɨ̀ guré cumí tə̧ə̧́. Nyí nɨ njù̧ sumí gə́tɨ̀rə́kɨ̂r.

²⁷Nyí nɨ Sátàìn mvókín ŋgə́ ŋgáŋ nyí yaà mbɨ́knàɓàr.

²⁸Ŋgàyɨ́r mbɨ́k yúk, ŋgə́ nɨ̀mɨ́r ŋgə́ éíɓà ə́r hȩ du ɗúniì, ŋgə́ á ɓáì ɓe kí, ŋgə́ á kwàɓwéhè nɨ́m ŋgə́ kpɔ́k nùb tiri ɓe kíí.

²⁹Nyí nɨ ɓe ɓɔ̧ ɓáŋhîn dùr, dùnáhá nɨ ɓe nyindí nyɔ̧ɔ̧́ fɨ́tɨ kùb kpɔ́knɨ, a kpɔ́kɓwéhè nùb kù gɨ̀ tíí ɓe ə́ə́m ŋgábè rɨ, àm nùb du nyí óknàniì a dù nyɔ̧né.

³⁰Nɨ ɗúwa nyí ndɨ̀ŋ Nyéhè Sarîn nɨ́m njù̧ú̧, ɓetí ŋgə́ du nɨ lɨ̀m Mèín ya mbɨ́klə́ nyínè sóò á. Ŋgə́ ɨ́ du nyí nànɨ gíí ɨnayâna ye mwi̧ Mèín kwá céínhó̧ nyí cumí kɨ́ gwìí mwi̧í̧ ru.

³¹Nyí nɨ nyindí ɓáŋhɨ́b ɓɔ̧ɔ̧ dùr, nyí nɨ njɔ̧̀ ɓə́ndîn dùr, nyí njù̧ ô. Mbɨ́knáam kɨ́ŋnɨ́b ɓe nyèìn, dùgɨ̀ kúúŋ ɓáŋhîn ŋge lâs.

³²Mvókín nyínè no, dunáam njɔ̧̀ nyɔ̧ɔ̧́, nyí a dù ɓe mwàm. Dunáam ɓe tɨ́ɨ́r hȩ Mèín yi tɨ́í nyí àm nyí du ɓaín ɓe Krístùù.