Read Vute Nùb Èféès 5 Bible Online

Nùb Èféès 5 - Vute bible

Nùb Èféès 5

¹Hȩ nyí dùnɨ munɨ́b Mèín ɗúré, gandɨnáam nɨ́m ŋgə́ du ndɨ̀ŋniì.

²Dunáɓwéem ɓe ɗûnɨ́m hȩ Krístù. Ŋgə́ ya ɗúú nɨ́m ɗà ŋgə́ ɨ́ kàìkî mè noò ɓe ɨ́r nɨ́mè hȩ nyər, hȩ satɨgà nyaŋɓa Mèín sumíì.

³Nyí nɨ nùb gbàŋ Mèèín noò á, nɨ ɗúwa kùb ók ɨnayâna mvókín nyínè no nyí á ndɨ̀ŋtèènɨ ŋguùŋ du nànɨ sə̀réé, nɨ́ɨ́b jɨ́nɨ̀mì, kɨ́ kù nyí á ɓe hàŋfì.

⁴Nɨ ɗúɓwêwá sɨ̀ fó̧ nyínè ɓɔ̧ne dù nyindí ŋguŋnì, kɨ́ kù sɔ̀k ɓáŋhîn. Nyindí nyínè ɓɔ̧ne dùbɨ̂ŋ mɨ̀yú̧ nyí yóŋ àm sáktɨ Mèèín.

⁵Ɗəəŋnáɓam ɨnayâna nɨ̀vɨ́tè ɨ́ dù ndɨ̀ŋtèènɨ ŋguùŋ du nànɨ sə̀réé, kɨ́ kù nɨ́ɨ́b jɨ́nɨ̀mì, ŋgə́ dùgɨ̀ ɓe kók yoo (ɓetí kók duɓwée nɨ hȩ yô̧ó̧ mèín nyaŋhɨ́bí á), nò kɨ́ sàmàìn lə́ ŋgɔ̧́ɔ̧̀ Krístùù no ɗàà, dùgɨ̀ kɨ́ Mèèín no.

⁶Nɨ ɗúwa nò kù mbáàŋ nyí nyí a fòb jɨ̀r: kúúŋ kum bɨ u̧ kíì ɨ́ du ndɨ̀ŋnɨ Mèín a óknà nùb ndɨŋ nɨ́m kíì njù̧ ru.

⁷Nɨ ɗúwa nyíne kúúŋ nùb u̧ kíì ɓáà ju.

⁸Nyí yaá ɓwâ kù hȩ nyí á sɨ́mnɨ̀rí, ɨ́dù ɗàrò, ɓe ɨ́r ju ɓaín nyí du ɓe Kékéé, nyí á hȩ nyí du mwahín ndɨ u̧. Hȩ dùnɨ u̧nèé, dunáam hȩ nùb du dùnɨ mwahɨ́nné,

⁹ɓetí ju mwahɨ́nné á ndɨ̀ŋnɨ nɨ̀vɨ́tè dù ɓe kúúŋ nyàŋnjɔ̧̀ lâs, ju ɗɨ́ɗɨ̧́ɨ̧́ lâs ɓe àmɨɨr lâs.

¹⁰Lɨɨŋnáam cànɨ nɨ́m Kéké du ɗúniì.

¹¹Nɨ ɗúwa nyí éíɓwê ə́rɨ́b du nɨ́m kù kpɔ́knɨ ɗàwáá nùb sɨ́mnɨ̀rí du ə́nnɨ rɨ; vììhó̧nábɨ̂ŋ ə́rɨ́b ɓáŋhɨ́b kɨ́ laŋtɨ̧ɨ̧́.

¹²(Sə̀ré á nɨ́m bɨ̀ɓàcéyènɨ nyìnhó̧nɨ nɨ́ɨ́b nùb kɨ́ du ndɨ̀ŋnɨ yo̧né.)

¹³Nɨ́ɨ́b ŋgáb du ndɨ̀ŋnɨ kɨ́ lâs ɨ́ fô̧ mwahín, ɗɨ́m juu ŋgábè a dùɓàgɨ̀ laŋtɨ̧ɨ̧́ fèín;

¹⁴Ɓetí nɨ́m duɓa laŋtɨ̧ɨ̧́ fèín ndɨ du nɨ mwahín á. Àm kɨ́ á du ta̧á̧ ɨnè ru: «Wu nò du wumí, səmnɨm wum, səəmcuhóom mvókín nɨ̀kwíbí, ɗà Krístù a túùmnà wu mwa.»

¹⁵Gə́tɨnáam ɓe ɗɨ́m juu nyínè. Nɨ ɗúwa nyí dù ju hȩ nùb du nɨ́m kù ɗə̀ə̀ŋwáá, dunáam ju hȩ nùb kɨ̀cáblì.

¹⁶Mvókín nyí kpɔ́k nɨ̀vɨ́tɨ̀bì ɨ́ sə̀mnà nyí, nyí mbɨ́kwa. Ɓetí jíìb nɨ́m dukɨ́cɨ nɨ́ no rè á nɨ ɓáŋhîn.

¹⁷Àm kɨ́ á du ɗúwa nyí dùsòɓà ju ɗàá ku u̧ ru. Mánábɨ̂ŋ ɗə̀ə̀ŋnɨ nɨ́m Kéké ɗú nyí ndɨ̀ŋte.

¹⁸Nyí nɨ síí mɨlli lèèrée, á sàmàìn geré nyí ju jɨ́mnîn ɗàwáá noò. Dùná bɨ̂ŋ yúklîn ɓe Nyéhè Sarîn.

¹⁹Mvókín nyínè no, dùná bɨ̂ŋ ju nò rè taamnaá kùŋ njɔ̧̀, nò rè a tààmnà kùŋ njɔ̧̀ ɓe wààì sarɨ́b nyí du sòŋniì. Wààì nyí du sòŋniì no, ŋgəmnáam Kéké sum mwi̧.

²⁰Ɓe ɨ́r Yésù Krístù nò du Kéké nɨ́mè, sáktɨnáam Kéké ŋgə́ nò du Tá du ŋgáŋnɨ ɓwâ lâs. Ŋgə́ duɓwée Tá nɨ́ɨ́b lâs á.

²¹Ɓe ɨ́r jɨ̧ nyí du jə̀ŋnɨ Krístùù, dunáam ɓe jɨ̧ mvókín nyínè no.

²²Nɨ̀gub, jəŋnáam ŋgwásɨ̀b nyínè hȩ nyí duɓwéece jə̀ŋnɨ Kékéé.

²³Ɓetí ŋgwáá ɨ́ du kɨ́nɨ gwi noò ru, hȩ Krístù duce kɨ́nɨ mɨ̀kwìn nùb ə́mní. Krístù nɨ̀mɨr ɨ́ du tɨ́ɓə́r mɨ̀kwìn nùb ə́mní ru, ɓetí mɨ̀kwìn nùb ə́mní du síí ŋgə́ nɨ̀mɨrí á.

²⁴Hȩ dùnɨ u̧nèé, á ɗúnɨ nɨ̀gub jə̀ŋ ŋgwásɨ̀b ɓoò ɓe péín nɨ́ɨ́b lâs hȩ mɨ̀kwìn nùb ə́mní duce jə̀ŋnɨ Krístùù.

²⁵Nɨ̀ŋgwáàb, ɗúnáam gub nyínè hȩ Krístù ya ɗúɓwée mɨ̀kwìn nùb ə́mní há̧á̧ ŋgə́ ɨ́ kàìkî mè noò ɓe ɨ́r mɨ̀kwìn kíì rɨ.

²⁶Krístù ya ndɨŋ nɨ́m kɨ́ u̧ àm óo ní satií mɨ̀kwìn nùb ə́mní ɓe kɔ ákîí cumí ɨ́ Kìn nyɔ̧ɔ̧́ naá, mɨ̀kwìn kɨ́ a dù fɨ́tîn ɓe nɨ́m ók ɓe Mèèín yáá na á.

²⁷Ŋgə́ yi ɗúú mɨ̀kwìn nùb ə́mní dùɓà no tíí ɓe mgbíí, ŋgə́ a dù járkɨ́ták, kum kù só ɗàà, jɨ́nɨ̀m ti kù só ɗàà. Ŋgə́ ya ɗúú mɨ̀kwìn kɨ́ dùɓà sarîn nɨ́m yɨ̀tíí no ɗàà á.

²⁸Á ɗúnɨ nɨ̀ŋgwáàb ɗú gub ŋgábè hȩ ŋgáb ɗúce síí ŋgáb nɨ̀mibi. Nò ɗú gwi noò ɗú síí ŋgə́ nɨ̀mɨrí á.

²⁹Nò kù ɓàcéyè sàmàìn jɨcu síí ŋgə́ nɨ̀mɨrí ɗàà; nɨ̀vɨ́tè á líìɓànɨ síí nóò, ŋgə́ a gə́tɨ̀ɓà ŋgə́ mîn hȩ Krístù duce ndɨ̀ŋnɨ ɓe mɨ̀kwìn nùb ə́mní,

³⁰ɓetí nɨ́m duná gɔ̀ síí ŋgéé á.

³¹Káàtà Mèèín á wáànɨ ɨnè: «Ɓe àm kɨ́ á nɨ̀ŋgwá kwá mbɨ́k tá noò ɓe yà nóò, ŋgə́ a gì dùnɨ ɓe gwi noò, ŋgáb a dùcì bɨ́ mwi̧.»

³²Yɨ́ rè hò̧, àm àmɨrìí yi du yo̧né á kùb viihó̧ ru, duú nɨ́ kɨ́ moò mɨ péé mɨ́ àm kɨ́ góom nɨ Krístù ɓe mɨ̀kwìn nùb ə́mní á.

³³Ɨ́dù góomɓwée nyí á: á ɗúnɨ nɨ̀ŋgwá lâs ɗúhá gwi noò hȩ ŋgə́ ɗú síí ŋgə́ nɨ̀mɨrí, ɗà nɨ̀gwi gùmní lâs a jə̀ŋ ŋgwáá noò.