Read Vute Nùb Èféès 6 Bible Online

Nùb Èféès 6 - Vute bible

Nùb Èféès 6

¹Munɨ́b, hȩ nyí dùnɨ ɓaín ɓe Kékéé, á ɗúnɨ nyí jə̀ŋ tá nyínè ɓe yà nyínè, ɓetí á hàrák nyí ndɨ̀ŋ u̧.

²Ɓíì tíí du ɓe ɓwállí á rè: «Jə̀ŋ tá woò ɓe yà wóò».

³Ɓwáár kɨ́ a cè ɨnè: «Wu a dù dɨɨ́m, mè woò a ŋgòŋɓwéhè ɗɔ̀bín.»

⁴Nyí cè táàb munɨ́bí, nɨ ɗúwa nyí ndɨ̀ŋ munɨ́b nyínè nɨ́m njù̧ú̧. Nyí hàmɨ̀nɨ ŋgáb, á ɗúnɨ nyí ɗə́ə̀ŋ ŋgáb, nyí a nà ŋgáb sóóŋ Kéké ta nàte.

⁵Mbɔ́klɨ́b, ɗɔ̀bín hò̧, jəŋnáam tá nyínè mbɔ́klí sum mwi̧ hȩ nyí jəŋce Krístùù.

⁶Nɨ ɗúwa nyí éíhó̧ɗóò ə́rɨ́b ɓwâ ŋgáb du nyí íí ya góòmniì, jəŋnáɓam ŋgáb hȩ nùb ə́ré Krístùù éíce ə́r Mèín ta ŋgáb éíte sum mwi̧.

⁷Éínáam ə́r mbɔ́klí nyínè kɨ́ ɓe ɗûnɨ́m hȩ nyí ə́nnace Kéké rɨ u̧. Nyí nɨ hȩ nyí ə́nna nɨ̀vɨ́tɨ̀b ə̂r.

⁸Ɗəəŋnáɓam ɨnayâna Kéké ɓa nànɨ nò lâs nyɔ̧ɔ̧́ ɗóhîn ɓe nɨ́m wu ya ndɨŋndé á. Wu dùgɨ̀ mbɔ́ɔ́, wu dùgɨ̀ mbɔ́ɔ́ sé.

⁹Nyí nùb duce táàb mbɔ́klɨ́bí, jəŋnáɓwéhɨm mbɔ́klɨ́b nyínè hȩ ŋgáb duce nyí jə̀ŋniì. Nyí ŋgáb ɓáínwa. Nyí ɗəəŋɓatɨ́ ɨnayâna nyíne ŋgáb cúk nyí á ɓe tá mbɔ́klí mwi̧ ɓɨllin, tá mbɔ́klí kɨ́ cè nɨ́ kɨ́klénɨ gɔ̀ mvókín nɨ̀vɨ́tɨ̀bì ɗàà.

¹⁰Ɓe ɨ́r ju ɓaín nyí du ɓe Kékéé, máhó̧ná nyòm nyínè kɨ́ ŋgéé no.

¹¹Árɨwúnáam túúŋ suu Mèín na nyínè lâs ŋgáré àm nyí a dù nɨ́ kɨhɨr Sátààìn no gùrə̂r.

¹²Ɓetí nɨ ɓe nɨ̀vɨ́tɨ̀b sé nɨ́m duná lɨ̀ŋnɨ, nùb nɨ́mè lɨŋni du bɨ nyòom nyéhɨ̀b ɓáŋhɨ́b du ɓɨllɨnne á, nyòom ɓáŋhɨ́b du ŋgáŋnɨ yɨ́ sɨ́mnɨ̀rí kɨ́.

¹³Àm kɨ́ á ɗàrò du ɗúnɨ nyí árɨ̀wú túúŋ suu Mèín du nàniì ŋgáré ru. Àm ɓwâ ye ɓáŋhîn ɓa sànniì, nò ɓi̧ní a dù nɨ́ nyí su ɓə̀r, nyí a ə́ə̀ŋɓà kpéín há̧á̧ cáŋhɨ̀rí.

¹⁴Dunáhácɨm nyaaŋkí̧i̧. Ánáhácɨm Kìn àmɨɨr hȩ lí ŋgù̧né, ndɨ̧̀ɨ̧́ nɨ́m du ɗɨ́ɗɨ̧́ɨ̧́ a dùnà nyí hȩ júk suu.

¹⁵Nyí a kɨ́kléɓà njɔ̧̀ tàá Kìn Nyɔ̧ɔ̧́ no, a dùnà nyí hȩ tə́b.

¹⁶Ə́ə́m a dùnà nyí hȩ kwa suu ɓa nyí pààkɨ́nànɨ mɨ̀njíím nuùŋ ya Sátàìn du tómwòniì.

¹⁷Gamnáɓwéem mɨ̀tàm du nànɨ ɓə́rì ɓe jìn du nànɨ Nyéhè Sarîn, kí ta Kìn Mèèín yáá na á.

¹⁸Ndɨŋnáam nɨ́ɨ́b kɨ́ lâs ɓe mɨ̀yú̧, nyí a yôŋ Mèín ŋgə́ kpɔ́k nyí. Ɓwâ lâs nyí du Mèín yóŋniì, mbɨ́knáam Nyéhè Sarîn ɗə́ŋhɨ̀ nyí. Gə́tɨnáam, dunáam ɓe jɨ̧, nyí a yôŋ Mèín ɓe ɨ́r nùb gbàŋ Mèèín lâs.

¹⁹Yóŋnànáɓwê mɨ Mèín ŋgə́ nà mɨ sɨ̀ɨ̀ŋ nyindíí hàrák ɓwâ mɨ ɓa nyìnniì ɓe ɓwâ mɨ du nyìnnɨ ɓe gíí àm mɨ ɗú kùb ɗə̀ŋhɨ̀ nɨ́m du yo̧ó̧ ɓe ɨ́r Kìn Nyɔ̧né.

²⁰Mɨ du nò ŋgə́ tómndéwo Kìn Nyɔ̧ɔ̧́ kɨ́ ɓɔ̧ne á, dugɨ hȩ mɨ du ɗàrò nìrì rè. Yóŋnànáhácɨ̀ mɨ Mèín mɨ nyìnɓà hȩ du ɗúnɨ mɨ nyìnte.

²¹Tìcîk, mwin yàá nɨ́mè, ŋgə́ nò du nɨ́m kpɔ́kɓànɨ ɓe jɨ̧ cúk ə́r Kékéé noò, ŋgə́ ɓa nyí tànànyààŋnɨ àm moò á, nyí a ɗə̀ŋhȩ̀ ə́ə́ŋ mɨ ducɨ nóò.

²²Ŋgə́ á mɨ tómsonaɓa nyí ɗàrɨ́, ŋgə́ tànà nyí hȩ nɨ́m du kanné, ŋgə́ a tààmnàɓwê nyí njɔ̧̀.

²³Mɨ yóóŋ Mèín nò du Táà ɓe Yésù Krístù nò du Kéké nɨ́mè ŋgáb nà mwin yàá bɨ ə́mní lâs ju ɗóóŋ, ɗûnɨ́m ɓe ə́ə́m.

²⁴Mɨ yóóŋ Mèín ŋgə́ fàm nùb lâs du ɗúɓànɨ Yésù Krístù nò du Kéké nɨ́mè ɗûnɨ́m nò kù kwá tɨ̀ du nɨ́ ɓáàŋkɨ́re.