Read Vute Nùb Fìlíìb 1 Bible Online

Nùb Fìlíìb 1 - Vute bible

Nùb Fìlíìb 1

¹Mɨ Pôl, nɨ́me Tìmòtê, nɨ́m nùb du nɨ̀kɨ̧́ɨ̧ Yésù Krístùù. Nɨ́m tɨnna nùb Mèèín du dùnɨ Fìlíìb á, ŋgáb nùb du ɓaín ɓe Yésù Krístùù. Nɨ́m tɨnna nùb ge mɨ̀kwìn nùb ə́mní Fìlíìb kwe á, ɓe nùb ə́ré dúú Mèèín ɓwê.

²Nɨ́m yóóŋ Tá nɨ́mè Mèín ɓe Yésù Krístù nò du Kéké nɨ́mè, ŋgáb nà nyí faám, ŋgáb a nà nyí ju ɗóóŋ.

³Ɓwâ lâs mɨ du nyí lə́ə̀mniì, mɨ á sáktɨ̀nɨ Mèín ɓe ɨ́r nyínè.

⁴Ɓwâ lâs mɨ du yóŋnɨ Mèín ɓe ɨ́r nyínè, mɨ á yóŋnɨ ɓe mɨ̀tù cúk.

⁵Ɓetí, yànɨ ɓwâ nɨ́me náb ya ɓainyayeré, há̧á̧ mwáín, nyí kpɔ́ktɨ́ mɨ ə́r àhèé Kìn Nyɔ̧né.

⁶Mɨ á ɓe gíí ɨnayâna Mèín nò ndɨŋ nyí yàré ə́r du nyɔ̧né, ɓa ndɨ̀ŋnɨ nyí gɨ̀ tíí ɓe ə́r kɨ́ há̧á̧ cáŋhɨ̀rí ye Yésù Krístù ɓa cùwòniì á.

⁷Á hàrák mɨ lə́mnɨ̀ nyí u̧. Mɨ á nyí ɗúɓànɨ cei, ɓetí nyí kpɔ́ktɨ́ mɨ ə́r Mèín ɗob mé, dùgɨ̀ ɗàrò hȩ mɨ du nìrì, dùgɨ̀ ɓwâ mɨ tɨ du tàɓànɨ Kìn Mèèín ɓe àmɨɨr cúk àm ə́ə́m nɨ̀vɨ́tɨ̀bì a dùɓà tamnì rɨ.

⁸Mɨ á nyí ɗúɓànɨ cei. Ɗûnɨ́m mɨ ɗú nyí kɨ́ ɗoŋwo kɨ́ Yésù Krístù nɨ̀mɨrí ya á. Mèín ɗəəŋtɨ́ mɨ ta àmɨɨr á.

⁹Mɨ̀yú̧ mɨ du yóŋnɨ Mèín ɓe ɨ́r nyínè á ɨnè: ɗûnɨ́m nyí du ɓe kíí gɨ̀ tíí. Ɗûnɨ́m kɨ́ ndɨ̀ŋ nyí ɗə̀ə̀ŋɓà Mèín, nyí a dù ɓe njɔ̧̀ ca nɨ́mí,

¹⁰ɗà nyí a cà nɨ́m du nyɔ̧né; u̧ á nyí ɓa dùnɨ ɓáŋhîn kù só ɗàà. Ye Yésù Krístù ɓace cùwòniì, nyí a dù nɨ́ ɓe nɨ́m yɨ̀tíí só dùr.

¹¹Mè nyínè no, Yésù Krístù ɓa nyí nànɨ nyòm nyí ndɨŋɓa nɨ́ɨ́b du ɗɨ́ɗɨ̧́ ɓa ndɨ̀ŋnɨ kùb mgbíì Mèín, kùb a ŋgə̀m ŋgéé á.

¹²Mwin yàá bɨ ə́mní, mɨ ɗú nyí ɗə̀ŋhɨ̀ nɨ́m mwi̧: nɨ́m yi ndɨŋ mé ndɨŋtɨ́ ɨnayâna kùb ókséndóŋ kìn Mèèín tíí tíí.

¹³U̧nè á sójààb lâs haam gómnàà noò ɓe nùb kù tèè ɗəəŋtɨ́ ɨnayâna mɨ lə́ nìrì àm mɨ du ə́nnànɨ Krístùù á.

¹⁴Mwin yàá bɨ ə́mní kù ví̧i̧, ɓwâ ŋgáb du mɨ pénɨ nìrì, ŋgáb á tàmndóŋnɨ njɔ̧̀ tíí tíí ɓe gíí Kéké naré há̧á̧ ŋgáb á tàndóŋnɨ Kìn Mèèín tíí tíí vùù ŋgáb bɨ̀wá.

¹⁵Á mè u̧, nùb kù mvókín ŋgábè noò á ndɨ̀ŋnɨ sə̀r ɓe mɨ àm ɓéhèé kìn du ɓe ɨ́r Krístùù. Ŋgáb á ndɨ̀ŋnɨ mɨ̀ɓə́hɨ̀r, ɨ́dù nùb kù á ɓéènɨ ɓe mɨ̀lə́m nyɔ̧ɔ̧́.

¹⁶Nùb du ɓéènɨ ɓe mɨ̀lə́m nyɔ̧ɔ̧́ kɨ́ ndɨŋ u̧ ɓe ɗûnɨ́m á, ɓetí ŋgáb ɗəəŋtɨ́ ɨnayâna Mèín ɗobtɨ́ mɨ ə́r kàŋhȩ̀ȩ́ Kìn Nyɔ̧né.

¹⁷Nùb kù bɨ tànɨ kìn du ɓe ɨ́r Krístùù njɔ̧̀ mwi̧ ɗàà, ŋgáb á bɨ ndɨ̀ŋnɨ nɨ́m kɨ́ ɓe ɓi̧í̧. Ŋgáb á lə́ə̀mnɨ ɨnayâna ɓe ndɨ̧̀ɨ̧́ u̧nèé á nì̧ì̧ mɨ du nó rè ɓa tàmndóŋnɨ tíí tíí ru.

¹⁸Mɨ̀lə́m ŋgábè dùgɨ̀ kɨ́ nyɔ̧ɔ̧́ yoo, dùgɨ̀ kɨ́ ɓáŋhîn yoo, àm moò no ɗàà, ŋgáb tahá bɨ́ Kìn du ɓe ɨ́r Krístùù á. Mɨ á cè mɨ́ óknɨ mɨ̀tù, mɨ tɨ̀ óklɨ́ŋháce mɨ́ mɨ̀tù.

¹⁹Ɓetí mɨ ɗəəŋtɨ́ nɨ́ɨ́b ɓa ndóŋnɨ cáŋhɨ̀rí: mɨ̀yú̧ nyí du yóŋniì ɓe Nyéhè Yésù Krístùù ɓa ndɨ̀ŋnɨ mɨ kwà ɓə́r á.

²⁰Mɨ móŋkɨ́ɓa kí á, mɨ á cè ɓe gíí, sə̀ré tɨ̀ nɨ mɨ bɨ̀r. Ɓàcéyè dùgɨ̀ ɗàrò, dùgɨ̀ ɓwâ ŋge mɨ ɓa dùnɨ ŋgwé wááŋ á, u̧ á mɨ ɓa túùmnɨ mgbíí Krístùù nɨ́ɨ́b lâs mɨ du ndɨ̀ŋniì no, kùb kwíìgɨ̀ mɨ kwíhîn, kùb mbɨ́kgɨ̀ mɨ jáŋ.

²¹Ɓetí kɨ́ moò, ɓwâ mɨ du jááŋ, mɨ á ə́nnànɨ Krístù. Ɓwâ mɨ ɓace kúniì mɨ ɓa dùnɨ nyɔ̧ɔ̧́ á.

²²Ɨ́dù ɓwâ mɨ duye jááŋ, mɨ ɨ́ éì ə́r ɓa nànɨ gum nyɔ̧né, mɨ ma tɨ̀ cahó̧ce kɨ́ ŋge?

²³Mɨ á ɓe mɨ̀lə́m bɨrɨ́b: mɨ á ɗúnɨ kúnɨ àm mɨ a dù mɨ́ ɓe Krístùù, kí á ɓà nɨ mîn.

²⁴Ɨ́dù á cè ɗúnɨ mɨ dù jáŋ ɓe àm nyínè, kí duɓwéehá mîn á.

²⁵Hȩ mɨ ɗəŋhȩ nɨ́m kɨ́ ɓa ndɨ̀ŋnɨ u̧ á rèé, mɨ tɨ̀ mɨ kûr. Mɨ ɗəəŋtɨ́ mɨ ɓa dùlɨ́ŋnɨ ɓe nyí á, àm mɨ a kpɔ̂ nyí gìnɨ tíí ɓe sə̧̀ə̧́ gíí ɓe Yésù Krístùù, nyí a ókndóŋɓwê mɨ̀tù tíí tíí.

²⁶Ɓe ɨ́r moò, nyí ɓa dɨ̀ɨ̀mnɨ Yésù Krístù á, nyí ɓa ókɓànɨ mɨ̀tù ɓwâ mɨ ɓa gɨ̀sònɨ yɨ́ nyínè á.

²⁷Nɨ́m mwi̧ dunáam ɓe ɗɨ́m juu du ɗóhîn ɓe Kìn Nyɔ̧ɔ̧́ du ɓe ɨ́r Krístùù. U̧nè á, mɨ gɨ̀sògɨ̀ nyí pénɨ, mɨ dùgɨ̀ gɨ̀sòwá, mɨ ók ɨnayâna nyí á ə́ə̀ŋɓànɨ kpéín, nyí á ɓaín ɓe kɨ̀cáàb mwi̧, nyí á cè lɨ̀ɨ̀ŋnɨ ŋgárɨ̀b ŋgárɨ̀b sum mwi̧ ɓe ɨ́r ə́ə́m Kìn Nyɔ̧ɔ̧́ du nàniì.

²⁸Nyí nɨ fûb fûb dùr nùb nyínè ɓi̧ní tíí, ɓa dùnà nɨ ŋgáb túúm ɨnayâna ŋgáb lɔ̧́ɔ̧́ bɨ́ na á, kɨ́ nyínè a dùcè túúm ɨnayâna Mèín á nyí ɓátɨ̀nɨ.

²⁹Ɓetí Mèín ə́əmtɨ́ ɨnayâna nyí ə́nnà Krístù, ə́r kɨ́ nɨ tàɗóòwá àm nyí du ə́ə̀mnɨ Krístùù, duɓwée nɨ àm nyí du pénɨ jábɨ́r ɓe àm noò rè á.

³⁰Ɗàrò nyí á lɨ̀ɨ̀ŋɓáànɨ ɓe mɨ. Lɨɨŋ kɨ́ du kɨ́ mwi̧ nyí ya pə́ mɨ lɨ̀ŋnɨ ɓwâ kù, mɨ duce lɨ̀ɨ̀ŋháyènɨ rè á, hȩ nyí ɗəŋhȩ ɗàrɨ́ u̧.