Read Vute Nùb Fìlíìb 2 Bible Online

Nùb Fìlíìb 2 - Vute bible

Nùb Fìlíìb 2

¹Krístù á nyí tàmɨ̀nɨ, ɗûnɨ́m nóò á nyí njɔ̧̀ tàmɨ̀nànɨ, nyí á ɓaín ɓe Nyéhè Sarîn, nyí á ɓe njɔ̧̀ nyɔ̧ɔ̧́ ɨ́ mwàm mvókín nyínè no, u̧ ɗàwá à?

²Àà, dunáhácɨm kúu mwi̧, nyí a dù ɓaín mɨ̀lə́m nyínè ɓe kɨ̀cáàb nyínè no. Dunáam ɓe ɗûnɨ́m mvókín nyínè no, ɗà mɨ̀tɔ̀k moò a dùɓà yúklîn.

³Nɨ́ɨ́b nyí du ndɨ̀ŋniì, nyí nɨ sə̀r no gèrə̂r, kɨ́ kù àm kùb a pê vúm ɨ́ duɓa ru na, ɨ́dù gesénáam síí ɗàá, nyí a â nùb lâs hȩ nùb ndóŋ nyínè.

⁴Nyí nɨ síí nyí nɨ̀mibi lə́ə̀mhó̧ɗóò, lə́əmnáɓwéecéem nùb kù.

⁵Mvókín nyínè no, dunáam ɓe ɗɨ́m Yésù Krístù ya du ɓe kíí.

⁶Dugɨ hȩ ŋgə́ ya du nɨ́m mwi̧ ɓe Mèèín, ŋgə́ ya nɨ́ ju kɨ́ no ŋgààŋndéwa,

⁷ŋgə́ ya mbɨ́ɨ́ nɨ́ ju kɨ́, ŋgə́ ɨ́ sèttɨ̀kî síí nóò nɨ̀kɨ̧́ɨ̧, ŋgə́ ɨ́ dùcù nɨ̀vɨ́tè sam, ɗà nɨ̀vɨ́tɨ̀b ɨ́ pə́cè ŋgə́.

⁸Ŋgə́ yi ə́əmtɨ́ gèsénɨ síí nóò ɗàá, ŋgə́ ɨ́ túùmɓà jɨ̧ ŋgə́ jəŋ Mèèín há̧á̧ cwéé, cwá ŋgə́ ya kú bɨ̧̀ɨ̧́ rɨ no.

⁹Àm kɨ́ á Mèín yi áwúɓa ŋgə́ yɨ́ juu kàm dɨmɨri, ɗà ŋgə́ ɨ́ nà ŋgə́ ɨ́r jíri ndóŋ kɨ́b lâs.

¹⁰Àm nɨ́ɨ́b lâs du dùnɨ ɓɨllɨnne, kɨ́b du ɗɔ̀bɨ́nné ɓe kɨ́b du ko̧né lâs a cáàmsê ɗàá àm ŋgáb du jə̀ŋnɨ ɨ́r Yésùù.

¹¹Ŋgáb a wáàɓwê mɨ̀kùnín ɨnayâna «Yésù Krístù du Kéké á», àm mgbíhɨ Mèín nò du Táà.

¹²Ɓwàjììb moò, nyí yaáɓà jə̀ŋnɨ nɨ́m mɨ yi tanakom nyí ɓwâ mɨ yi duye ɓe nyínè. Ɗàrò, hȩ mɨ dùcɨ̀ nɨ ɓe nyí ɗàwáá, á ɗúnɨ nyí jə̀ŋɓàgɨ̀ nyindí móò a ndôŋ kɨ́ ɓwâ mɨ yi duye kwe. Ɓe ɨ́r ju nyɔ̧ɔ̧́ nyínè, lɨɨŋnáam ɓe jɨ̧ cúk.

¹³Ɓetí Mèín nɨ̀mɨ́r á nyí kpɔ́knɨ àm nyí ɗú nɨ́m nyaŋ ŋgə́ sumíì, nyí a ndɨ̀ŋɓwéhè nɨ́m kɨ́ ɗóhîn ɓe ɓwáár ŋgə́ nɨ̀mɨ́rí.

¹⁴Nɨ́ɨ́b lâs nyí du ndɨ̀ŋniì, nyí nɨ nyì̧í̧ ɓe mɨ̀sə̧̀ə̧́b no gèrə̂r.

¹⁵Àm nyí a dù u̧ nɨ́m yɨ̀tíí só ɗàà, ɓáŋhîn kù só ɗàà, nyí a dù munɨ́b Mèèín, nyí a dù járkɨ́ták mvókín nùb mbɨ́k bɨ́ ndɨ̧̀ɨ̧́ nyɔ̧né ɓe nùb ɓáŋhɨ́b ɗɔ̀ɔ́b lè noò. Ɗú nyí ɓə̧̀ mvókín ŋgábè no hȩ káŋyerɨ̀b á,

¹⁶ɓe kìn du nànɨ mèè nyí du nàniì. Nyí ɨ́ ndɨ̀ŋ u̧, ye Krístù ɓa cùwòniì, mɨ ɓa dùnɨ ɓe mɨ̀tù á. Ɓa dùnɨ túúm ɨnayâna ə́r móò ɓe ndɔ̧́ɔ̧̀ mɨ ya ndáŋndé nɨ sam lɔ̧́wa na á.

¹⁷Ɓè mɨ kúré, cwá mo kɨ́ ɨ́ ɓa ɓààrénɨ satɨgà ɗoŋwo ə́ə́m nyí ə́mne Mèèín ya ru. Mɨ ɓa óknɨ mɨ̀tù ɓe kí á, mɨ a ndɨ̀ŋ nyí ókɓwê mɨ̀tù ɓe mɨ.

¹⁸Á ɗúnɨ nyí ókɓwê mɨ̀tù, nyí a ndɨ̀ŋ mɨ ókɓwê mɨ̀tù ɓe nyí.

¹⁹Mɨ á lə́ə̀mnɨ tómsònɨ Tìmòtê yɨ́ nyínè hò̧ mvin ti ŋgób, àm ɓwâ ŋgə́ ɓa mɨ gècùwònànɨ kìn hȩ nyí du dùnɨ kwe, njɔ̧̀ a tàmɓwê mɨ nɨ̀mɨ́r. Mɨ ɗəəŋtɨ́ Kéké ɓa kpɔ́knɨ á.

²⁰Nò kù du yɨ́ɓwênɨ só hȩ mɨ, kɨ́ kù ɗúɓànɨ nyí kpɔ́knɨ hȩ mɨ ɓwê nɨ ɗàà, sé Tìmòtê kɨ́.

²¹Nùb meré lâs lə́əmháce bɨ́ síí ŋgáb nɨ̀mibi, ŋgáb bɨ lə́ə̀mnɨ ndɨ̀ŋnɨ nɨ́m Yésù Krístù ɗúré ɗàà.

²²Ɨ́dù kɨ́ Tìmòtéè, nyí nɨ̀miib nyí ɗəəŋtɨ́ hȩ ŋgə́ ya túmnɨ jɨ̧ nóò, hȩ ŋgə́ ya kpɔ́k mɨ ə́r ɓéhèé Kìn Nyɔ̧né hȩ mwin kpɔ́k tá ni ə́ré.

²³Mɨ á lə́ə̀mnɨ tómsònànɨ nyí ŋgə́ ɓwâ mɨ ɓa óknyààŋnɨ àm mo sóò.

²⁴Ɨ́dù mɨ ɗəəŋtɨ́ Kéké ɓa kpɔ́knɨ á, hò̧ mvin ti ŋgób mɨ nɨ̀mɨ́r mɨ a gɨ̀sòɓà nyí pénɨ.

²⁵Mwin yàá nɨ́mè Èpàfɨ̀ròdît, nò nɨ́me ŋgə́ tɨ lɨɨŋɓáhe ə́r Kìn Mèèín, nyí tɨ tómwo gèwònà mɨ nɨ́m du mɨ ɗúnàniì rɨ, mɨ péé á nyɔ̧ɔ̧́ mɨ tómcùsònà nyí ŋgə́.

²⁶Ŋgə́ á ɗúɓànɨ ɓàìncùnɨ ɓe nyí lâs, ɓetí á ŋgə́ yínɨ só àm nyí tɨ ók ɨnayâna ŋgə́ á yábnɨ na rè.

²⁷Ŋgə́ tɨ yábmeɓatɨ́, tènɨ ŋgób ŋgə́ kúnɨ; ɨ́dù Mèín ɨ́ ô ŋgə́ mwàm. Mwàm kɨ́ Mèín ókɓwée mɨ á, àm yəré tɨ̀ bɨndóŋ mɨ tíí tíí.

²⁸Àm kɨ́ á mɨ du nyí ŋgə́ tómsònàkɔ́ɔ̀nɨ ru, àm nyí a dù ɓe mɨ̀tù ɓwâ nyí ɓa ŋgə́ péniì, ɗà yəré mó sumíì a cɔ̧́cê.

²⁹Hȩ ŋgə́ dùnɨ mwin yàá ə́mní, gàmnáɓà ŋgə́ ɓe mɨ̀tù cúk. Á ɗúnɨ nyí jə̀ŋ nùb du hȩ ŋgéé.

³⁰Ɓetí ŋgə́ yi ɓáttɨ́ kúnɨ ɓe ɨ́r ə́r Krístùù. Ŋgə́ yatɨ́ mə̀mnɨ mè noò àm ŋgə́ go mɨ kpɔ́knɨ kpɨ́kpɔ́ yi du sàmàìn nyí go lâs ɗàwáá.