Read Vute Nùb Fìlíìb 3 Bible Online

Nùb Fìlíìb 3 - Vute bible

Nùb Fìlíìb 3

¹Ɗàrò, mwin yáà bɨ ə́mní, óknáam mɨ̀tù hȩ nyí du ɓaín ɓe Kékéé. Ɓààcùnànɨ nyí nɨ́m mɨ tɨ tɨincɨ tɨnné nɨ mɨ nànɨ yəré ɗàà, ɨ́dù á ɗúnɨ mɨ ndɨ̀ŋhá u̧ ɓetí duna nyí nɨ́m nyɔ̧ɔ̧́ nyí səŋ gíí ya kwe á.

²Gə́tɨnáam ɓe nùb ɗíím ɓáŋhɨ́b ɗàrɨ́, lɨ̀r ɗàrɨ́, nùb du bɨ́ kpáín lê ndɨ̀ɨ́ kumí no ɗàrɨ́.

³Nɨ́m ɨ́ du nɨ́ nùb lê ndɨ̀ àmɨrìí ru, nɨ ŋgáb sé, ɓetí nɨ́m á nɨ ɗómnɨ Mèín ɓe nyòm Nyéhè noò du nɨ́m nàniì. Nɨ́m á ɓe mɨ̀tù ɓetí nɨ́m á ɓaín ɓe Yésù Krístù. Nɨ́m cè nɨ́ sə̀ŋnɨ gíí nɨ́mè ɓe nɨ́ɨ́b ndɨ̧ɨ̧́ nɨ̀vɨ́tɨ̀bì ɗàà.

⁴U̧ kɨ́, kɨ́ moò, tɨ á sàmàìn mɨ səŋɓwée gíí nɨ́ɨ́b ndɨ̧ɨ̧́ ɗɔ̀bɨ́nné yaà. Nò kù ɨ́ lə́mnè nɨ́ ní á nɨ mîn ɓe sə̧̀ə̧́ gíí nɨ́ɨ́b ɗɔ̀bɨ́nné yaà, mɨ ɗəəŋtɨ́ àmɨɨr moò ndóŋtɨ́ nɨ́ kɨ́ ŋgéé.

⁵Mɨ ɓà Èbɨ̀rə̂ mɨr á, Jwîf cè, nò gbàŋ Bèìnjàmə̧́ə̧̀ noò. Kùb feín mɨ, jə́b jíìb sə́r, kùb ɨ́ lə́nà mɨ ndɨ̀. Duceé kɨ́ jə̧̀ə̧́ ɓíhɨ̀b Jwîf ɓoò, mɨ yɨɨ́m ɓà Fàrísà á.

⁶Mɨ yaá tùɓànɨ ɓíhɨ̀b Jwîf ɓoò há̧á̧ mɨ ɨ́ yàɓàcéyè túùmnɨ mɨ̀kwìn nùb ə́mní jábɨ́r. Dùgɨ̀cé kɨ́ jə̧̀ə̧́ ɓíhɨ̀b kɨ́ àm má ju ɗɨ́ɗɨ̧́ɨ̧́, sàmàìn kùb kwa nɨ́m yetɨ mɨ noò ɗàà.

⁷Mɨ yaá pə́kòmnɨ nɨ́ɨ́b kɨ́ hȩ nɨ́ɨ́b kùb ɓáí ɓe kíí, ɨ́dù ɗàrò, ɓe ɨ́r Krístùù, mɨ á pénɨ nɨ́ɨ́b kɨ́ lâs nɨ́ɨ́b saai.

⁸Nɨ nɨ́ɨ́b kɨ́ sé ɗóò á mɨ du pénɨ nɨ́ɨ́b saai, duɓwée ɓa nyɔ̧ɔ̧́ lâs mɨ yi ɓa nɨ́ɨ́b kɨ́ no kwàhó̧niì á, ɓetí mɨ kwatɨ́ mɨ́ ɗɨɨ́ŋ Kéké móò Yésù Krístùù duna nɨ́ mɨ nyɔ̧ɔ̧́ kàm jírií. Ɓe ɨ́r ŋgéé, mɨ waakíí nyɔ̧ɔ̧́ moò lâs, mɨ á pénɨ nɨ́ɨ́b kɨ́ lâs hȩ mbɨ́b, àm mɨ ók ɓe Krístùù,

⁹ɗà mɨ a dùɓà ɓaín ɓe ŋgə́. Sàmàìn mɨ takwacɨ ɨnayâna mɨ du mɨ ju ɗɨ́ɗɨ̧́ ɓe jə̧̀ə̧́ mɨ jəŋ ɓíì Jwîf ɓoò á na nɨ ɗàà. Ɓe ə́mnèé Krístùù, ɓe nyòm ju ɗɨ́ɗɨ̧́ɨ̧́ go nɨ́ yɨ́ Mèèín, Mèín nɨ̀mɨ́r duce nànɨ nùb ə́əmndé á mɨ du mɨ́ ɗɨ́ɗɨ̧́ ru.

¹⁰Nɨ́m mɨ du ɗúniì á, mɨ ɗə̀ŋhɨ̀ Krístù ɓe nyòm yi səəmcuhó̧ ŋgə́ cwéé, mɨ ɗú pə́ɓwênɨ jábɨ́r hȩ ŋgə́ ya pə́ré, há̧á̧ mɨ a kúɓwéhè,

¹¹ɓe gíí ɨnayâna Mèín ɓa mɨ sə̀ə̀mcùhó̧ɓwênɨ mvókín nɨ̀kwíbí á.

¹²Sàmàìn mɨ ta ɨnayâna mɨ cáaŋcií mɨ́ lùú, mɨ á cɨ̀ mɨ ɗóhîn na ɗàà, mɨ á mɨ́ lùháyènɨ, lɨ̀ɨ̀ŋhánɨ kwànɨ lɔ̀ɔ́ lùhí, ɓetí mɨ nɨ̀mɨ́r Yésù Krístù bɨcií nɨ́ mɨ.

¹³Mwin yàá bɨ ə́mní, mɨ mɨ lə́ə̀mtàmnɨ ɨnayâna mɨ kwacií mɨ́ lɔ̀ɔ́ na ɗàà, ɨ́dù àm moò cɨ̀ nɨ ɓe nɨ́m du mó cùrìì ɗàà, mɨ lɨɨŋhá mɨ́ gàmnɨ kɨ́ du mó tíí rè á.

¹⁴Nɨ́m kɨ́ á mɨ du lùhánɨ, àm mɨ a kwà ɓə́r Mèín du nɨ́m ɓénànɨ còóm ku ɓe ɨ́r Yésù Krístùù rè.

¹⁵Nɨ́m nùb dunácɨ gbɔ̧́ɔ̧ ɓe ə́ə́m ndè, nɨ́m dùná ɓe kúúŋ mɨ̀lə́m kíì, nùb kù kpáín nyínè noò ɨ́ dùcè bɨ́ lə́ə̀mndóŋnɨ jɨ̀r ji, Mèín ɓa nyí túùmnànɨ á.

¹⁶Nɨ́m mwi̧ nɨ́m gɨ̀sénáhácɨ̀ péín nɨ́m du gɨ̀sénɨ rè.

¹⁷Mwin yàá bɨ ə́mní, tunáam guur gùrí moò. Nɨ́m natɨ́ túúm, góomnáam nùb du ndɨ̀ŋnɨ u̧nèé, nyí a ndɨ̀ŋɓwê u̧.

¹⁸Mɨ ya tanacií nyí, á mɨ du nyí ɓààcùnànɨ ɓe yînɨ́m sumí rè, nùb kù ví̧i̧ á bɨ́ pə́wààmkɨ́nɨ cwá Yésùù ya kú bɨ̧̀ɨ̧́.

¹⁹Ŋgáb gain bɨ lɨ́lɔ̧́ á, ɓetí mèín ŋgábè du nɨ ɓwɨi ŋgábè á, ŋgáb á óknɨ mɨ̀tù ɓe nɨ́m tɨ du ɗúnɨ nà ŋgáb sə̀réé, ŋgáb lə́əmháce bɨ́ nɨ́ɨ́b ɗɔ̀bɨ́nné.

²⁰Duce nɨ́ kɨ́ nɨ́mè, nɨ́m nɨ nùb ɓɨllɨnne á, nɨ́m á cè nɨ́ móŋkɨ́ɓànɨ Yésù Krístù nò du Kéké nɨ́mè, ŋgə́ nò du Tɨ́ɓə́r nɨ́mè, sówò ɓɨllin ku.

²¹Ŋgə́ ɓa ɓàndɨ̀kɨ́nɨ síí nɨ̀vɨ́tèé nɨ́mè rè á, a dùcù ɗóhîn ɓe síí mgbíhɨ́rí ŋgéé. Ŋgə́ ɓa ndɨ̀ŋnɨ nɨ́m kɨ́ ɓe nyòm ŋgə́ du kɨ́ɨ́nɨ nɨ́ɨ́b lâs ɓe kí rè á.