Read Vute Nùb Fìlíìb 4 Bible Online

Nùb Fìlíìb 4 - Vute bible

Nùb Fìlíìb 4

¹Hȩ dùnɨ u̧nèé, mwin yàá bɨ moò mɨ ɗúɓa ceí, nyí nùb mɨ du ɗúɓànɨ pə́cùniì, nyí nùb du mɨ nànɨ mɨ̀tù wáaŋkɨ́ mɨ sə̀ré ŋgwȩ́né, ɓwàjììb moò, u̧nè á du ɗúnɨ nyí ə́ə̀ŋɓà kpéín ju ɓaín nyí du dùnɨ ɓe Kékéé no ru.

²Èvòdî ɓe Sèìntîk, mɨ yóŋɓatɨ́ nyí, nyí dù kúu mwi̧ ɓe ju ɓaín nyí du dùnɨ ɓe Kékéé.

³Kɨ́ woò cè, wu nò duɓa kùŋ mo ə́ré, mɨ taá wu kpɔ́k ŋgáb, nɨ́me ŋgáb lɨɨŋtɨ́ cúk ɓe ɨ́r àhèé Kìn Nyɔ̧né, dùgɨ̀ Kɨ̀lèmâŋ ɓe nùb nɨ́me ŋgáb yi éíɓáhe, ɨ́r ɓoò du tɨín káàtà mèè no rɨ.

⁴Óknáam mɨ̀tù ɓwâ lâs àm nyí du ɓaín ɓe Kéké rè. Óknáam mɨ̀tù.

⁵Dunáam njɔ̧̀ ɓwéin ɓe nùb lâs, Kéké ɓacuwo ru.

⁶Nyí nɨ ɓe ɨ́r nɨ́m du nyí tùŋniì ndáŋkɨ̂r, ɨ́dù ɓwâ lâs, mɨ̀yú̧ nyínè no, ɓweináam Mèín nɨ́m nyí ɗúré, nyí a sáktì ŋgə́.

⁷Óo nyí ndɨŋtɨ́ u̧, ŋgə́ ɓa nyí nànɨ ju ɗóóŋ ndóŋ mɨ̀lə́m nɨ̀vɨ́tèé á. Ɓe ɨ́r ju ɓaín nyí du ɓe Yésù Krístùù, ju ɗóóŋ kɨ́ ɓa gə́tɨ̀nɨ njɔ̧̀ nyínè ɓe kɨ̀cáàb nyínè á.

⁸Mwin yàá bɨ, nɨ́ɨ́b du ɗúnɨ nyí kɨ́klé njɔ̧̀ no kwe á rè: Nɨ́m du nyɔ̧ɔ̧́ kùb fɨ́tɨ ŋgə̀mniì, nɨ́m du àmɨrìí, nɨ́m kùb jəŋndé, nɨ́m du ɗɨ́ɗɨ̧́ɨ̧́, nɨ́m du sàmàìn kùb yomndé ɗàà rɨ, nɨ́m kùb ɗúré ɓe kɨ́ kùb fɨ́tɨ kúùmniì.

⁹Nɨ́ɨ́b lâs mɨ yi tɔɔna nyínè, kɨ́b nyí yi ə́mne ndɨ̀ŋniì, kɨ́b nyí ók mó ɓɔ̧ne ɓe kɨ́b nyí yi pə́ mɨ ndɨ̀ŋniì, ndɨŋnáam nɨ́ɨ́b kɨ́. Mèín nò du nɨ́m nànɨ ju ɗóóŋ ɓa dùnɨ ɓe nyí á.

¹⁰Ju ɓaín mɨ du ɓe Kéké rè, naɓatɨ́ mɨ mɨ̀tù cei, ɓetí nyí kwahágií mvókín nyí pə́cuwú mɨ íí yaà, mɨ mɨ tàwá ɨnayâna nyí tɨ mbɨ́kyeé mɨ lə́ə̀mnɨ, nyí tɨ du nɨ kwàwá mvókín nyí ndɨŋ nɨ́m kíì á.

¹¹Hȩ mɨ nyìnnɨ u̧nèé, nɨ àm mɨ ɗú nɨ́m kù sé, kɨ́ moò, mɨ marɨcií mɨ́ dùnɨ ɓe nɨ́m du mó ŋgáréè.

¹²Mɨ dùgɨ̀ ɓe kí yoo, mɨ dùgɨ̀ ɓe kí ɗàà yoo, mɨ á mɨ́ dùhánɨ, ɓetí mɨ á mɨ́ marîn u̧. Mɨ tàŋgìi, mɨ dùgɨ̀ tàŋwá, mɨ dùgɨ̀ ɓe cɔŋ mgbə̀ktə̀k, mɨ dùgɨ̀ ɓe kí ŋgób. Dùgɨ̀ ŋga, dùgɨ̀ ɨna, mɨ á mɨ́ dùhánɨ.

¹³Ɓe nyòm Krístù du mɨ nàniì, nɨ́m yɔ́k mé nɨ ɗàà.

¹⁴Nɨ́m mwi̧ nyí ndɨŋtɨ́ mîn hȩ nyí ókɓwée yíìnɨ́m jábɨ́r mɨ du péniì rèè.

¹⁵Nyí nùb Fìlíìb, nyí nɨ̀miib nyí ɗəəŋɓatɨ́ mîn, ɓwâ mɨ ya éíwo Màsèduwáàn, kùb a yaréce tànɨ Kìn Nyɔɔ̧́ ya̧á̧, mɨ̀kwìn nùb ə́mní kù ya nɨ́ mɨ kpɔ́kwa ɓe mòné, jɔ̀sé nyí.

¹⁶Ɓàcéyè, yàwòó ɓwâ mɨ yi du Tèsàlòníìk, nyí yi ɗòŋcɨ̀nɨ mɨ kpɔ̂ɔ́ á.

¹⁷Nɨ tàwá ɨnayâna mɨ má lɔ̀ɔ́ á, mɨ ɗú ɨnayâna nɨ́ɨ́b nyí du ndɨ̀ŋniì lâs, nyí kwàhó̧ nyɔ̧ɔ̧́ no á.

¹⁸Mɨ tànà nyí, nɨ́ɨ́b lâs nyí yi tómwona mé, mɨ gamtɨ́, aaŋɓacéyetɨ́ nɨ́m tɨ du mɨ ɗúnàniì. Ɗàrò nɨ́m kù nɨ mɨ tùŋcɨ̀nɨ ɗàà, ɓe nɨ́ɨ́b nyí tómwona mɨ Èpàfɨ̀ròdît ŋgáré kɨ́. Nyər nyínè kɨ́ nyər nyɔ̧ɔ̧́ á, satɨgà Mèín ɗúɓa gàmniì á kí.

¹⁹Mèín mɨ du ə́nnàniì á ɓe njɔdì cei, ŋgə́ ɓa nyí nànɨ nɨ́ɨ́b lâs du nyí ɗúnàniì á, ɓe ɨ́r ju ɓaín nyí du ɓe Yésù Krístùù.

²⁰Mèín nò du Tá nɨ́mè, mgbíí ók ɓe ŋgə́ tɨ́k kɨ̀ tɨ́k. Àmèn!

²¹Nyindɨnáam nùb Mèèín lâs du ɓaín ɓe Yésù Krístùù. Mwin yàá bɨ du nɨ́me ŋgáb hò̧neè nyindɨsoó nyí.

²²Nùb Mèèín du hò̧neè, nùb kù cóóŋ sé nùb mvèìn kàm jírií hamnɨnne nyindɨsoó nyí.

²³Mɨ yóóŋ Yésù Krístù nò du Kékéé ŋgə́ fàm nyí lâs.