Read Vute Nùb Kòlóòs 1 Bible Online

Nùb Kòlóòs 1 - Vute bible

Nùb Kòlóòs 1

¹Mɨ Pôl, nò Mèín ya ɗú dù nò tómé Yésù Krístùù, mɨ ɨ́ tɨin káàtà rè ru. Nɨ́me Tìmòtê, mwin yàá nɨ́mè péín ə́mní.

²Nɨ́m tɨnna nùb Mèèín du Kòlóòs á. Nyí á jə̀ŋnɨ Mèín ɓe ɨ́r ju ɓaín nyí du ɓe Krístùù. Mɨ yóóŋ Mèín nò du Tá nɨ́mè, ŋgə́ nà nyí faám ɓe ju ɗóóŋ.

³Ɓwâ lâs nɨ́m du yóŋnɨ Mèín ɓe ɨ́r nyínè, nɨ́m á sáktɨ̀nɨ Mèín ŋgə́ nò du Tá Yésù Krístù nò du Kéké nɨ́mè.

⁴Ɓetí nɨ́m óktɨ́ sà̧à̧ ə́ə́m nyí ə́mnɨ Yésù Krístùù, hȩ nyí duɓwéece ɗúnɨ nùb gbàŋ Mèèín lâs.

⁵Ɓwâ Kìn Nyɔ̧ɔ̧́, du kìn àmɨrìí yi féín yɨ́ nyínè kɨ́ yàyɨ̀rí, kùb ya ndɨŋtɨ́ nyí ɗə̀ŋhɨ̀ nyɔ̧ɔ̧́ Mèín kɨ́kkɨ́na nyí ɓɨllɨnne. Ə́ə́m ɓe ɗûnɨ́m nyínè ɗoŋwoce nɨ́ gíí nyí du ɓe kí ɓe ɨ́r nyɔ̧ɔ̧́ du nyí móŋnɨ ɓɨllin kɨ́ ya á.

⁶Ɗɔ̀ɔ́b lè no bɨ̂ŋ, Kìn Nyɔ̧ɔ̧́ á gìnɨ tíí, ŋgə́ á cè nànɨ guum, hȩ ŋgə́ ndɨŋɓwéece yɨ́ nyínè, yànɨ ye kùb ya tana nyí àm ndɨ̀ŋnyàáŋ Mèèín, nyí ɨ́ pə́mèɓàcè ndɨ̀ŋnyàáŋ kíì.

⁷Èpàfɨ̀râs, ɓwàjìrí nɨ́mè ɗûnɨ́mí, nɨ́me ŋgáb du éíɓáàniì no ɓɔ̧ɔ̧ á nyí ya ók Kìn Nyɔ̧ɔ̧́ kɨ́ ru. Ŋgə́ du nò ə́ré jɨ̧ɨ̧́ Krístùù, go ə́nnɨ yɨ́ nyínè àm nɨ́m du ku ɗàwáá á.

⁸Ŋgə́ tanatɨ́ nɨ́m hȩ Nyéhè Sarîn na nyí nyòm nyí ɗú kùb mwin yàá.

⁹Àm kɨ́ á, yànɨ ye nɨ́m ya ók àm nyínè, nɨ́m yènnɨ ɓe yóŋnàá nyí Mèèín ɗàà. Nɨ́m á yóŋnɨ Mèín ŋgə́ ndɨ̀ŋ Nyéhè noò nà nyí kɨ̀cáàb ɓe ɗɨɨ́ŋ, nyí a ɗə̀ə̀ŋnyààŋɓàgì nɨ́m ŋgə́ du ɗúnɨ nyí ndɨ̀ŋte.

¹⁰Nyí ɓa ɗə̀ə̀ŋndóŋnɨ Mèín tíí tíí á, nyí a ndɨ̀ŋ nɨ́ɨ́b nyɔ̧ɔ̧́, nyí a dù ju hȩ Krístù ɗúré ɓe ndɨ̧̀ɨ̧́ nɨ́m nyaŋ ŋgə́ sumíì.

¹¹Nɨ́m á ɓwèìnɨ Mèín, ŋgə́ ndɨ̀ŋ nyòm mgbíhɨ́rí ŋgéé tààmnà nyí njɔ̧̀, ɗà nyí a jíhè nɨ́ɨ́b lâs ɓe gíí sumí.

¹²Sáktɨnáam Mèín nò du Táà ɓe mɨ̀tù cúk. Ŋgə́ ndɨŋtɨ́ nyí sèì nùb du ɗóhîn ɓe kwàá nyɔ̧ɔ̧́ ŋgə́ mbɨ́kkɨ́na nùb ók ɓe ŋgéé ŋgɔ̧́ɔ̧̀ mwahí nokwe.

¹³Ɓetí ŋgə́ gahó̧kíí nɨ́m nyòm sɨ́mnɨ̀rí no, ŋgə́ ɨ́ ndɨ̀ŋ nɨ́m lə́ndóŋ ŋgɔ̧́ɔ̧̀ Mwin ɗûnɨ́mí noò no.

¹⁴Mwin kɨ́ ɨ́ céínhó̧ nɨ́m ɓáŋhɨ́nne ru, ŋgə́ ɨ́ tɨ́ì cuum nɨ́mè.

¹⁵Krístù du ɓɨ̀m Mèín nò kùb du pénɨ ɗàwáá á. Ŋgə́ ɨ́ du ŋgwé nɨ́ɨ́b lâs Mèín ya nyaaŋndé ru.

¹⁶Ɓetí ɓe ŋgə́ á Mèín ya nyaŋhȩ nɨ́ɨ́b lâs, ɓɨllin ɓe ɗɔ̀bín ndu. Kɨ́b kùb du péniì, ɓe kɨ́b kùb du pénɨ ɗàwáá, nyéhɨ̀b du ŋgáŋniì lâs. Mèín ya nyaŋhɨ nɨ́ɨ́b lâs ɓe ŋgə́ àm ə́nna níì á.

¹⁷Nɨ́ɨ́b lâs ma nyààŋyèwá, ŋgə́ yaácɨ̀ nɨ ku. Ŋgə́ ɨ́ du ndɨ̀ŋnɨ nɨ́ɨ́b lâs dù yɨ́ ŋgáb duré ru.

¹⁸Ŋgə́ ɨ́ du ŋgwé mɨ̀kwìn nùb ə́mní du hȩ síí rè ru. Mè heé yaré ŋgə́ yá á. Ŋgə́ ɨ́ du nò tíí Mèín səəmcuhó̧yaye mvókín nɨ̀kwíbí, àm ŋgə́ a dù ŋgwé tíí péín nɨ́ɨ́b nyaŋhɨ́bí lâs.

¹⁹Ɓetí Mèín ɗúɓatɨ́ Mwin nóò dùɓwêɓà hȩ ní nɨ̀mɨ́r.

²⁰Ŋgə́ ɗúɓwéeɓatɨ́ nyàŋcùnɨ ɓe nɨ́ɨ́b lâs ɓe ɨ́r Mwin ŋgéé. Ɓe cwá Mwin ŋgéé kú bɨ̧̀ɨ̧́, ŋgə́ ndɨŋtɨ́ ju ɗóóŋ sə̀m ɗɔ̀bín ɓe ɓɨllin.

²¹Ɓwâ ya tíí, nyí yaá nɨ́ cóo ɓe Mèín. Nyí yɨɨ́m nùb no ɓi̧ní á ɓe ɨ́r njɔ̧̀ ɓáŋhîn ɓe nɨ́ɨ́b ɓáŋhɨ́b nyí ya ndɨŋkomndé.

²²Ɨ́dù ɗàrò, ɓe ɨ́r cwá Mwin ŋgéé yi dumeɓa nɨ̀vɨ́tèé ya kùré, Mèín ndɨŋtɨ́ vúme nyí nyàŋcùtɨ, àm nyí a ə́ə̀ŋɓà níì tíí járkɨ́ták, kum kù só ɗàà.

²³Ɨ́dù ɗú nyí ə́ə̀ŋɓà kpéín ɓe ə́ə́m á. Nyí mbɨ́kwa gíí nyí du ɓe kí, yànɨ ɓwâ nyí ya ók Kìn Nyɔ̧né éíkɨ́ nyínè sumí. Kìn Nyɔ̧ɔ̧́ kɨ́ du kɨ́ kùb ɓéena nùb lâs ɗɔ̀bɨ́nné rɨ á. Mɨ Pôl, mɨ duce nò ə́ré kìn kíì á.

²⁴Ɗàrò, mɨ á óknɨ mɨ̀tù ɓe jábɨ́r mɨ du ánɨ ɓe ɨ́r nyínè, ɓetí mo só, mɨ á ácáàŋnɨ jábɨ́r Krístù ya pə́ ɓe ɨ́r síí ŋgéé du mɨ̀kwìn nùb ə́mní rè.

²⁵Mɨ settɨ́ nò ə́nna mɨ̀kwìn nùb ə́mní, ɗóhîn ɓe ə́r Mèín ya ɗob mɨ ɓe ɨ́r nyínè. Ŋgə́ ya ɗobtɨ́ mɨ ə́r mɨ aaɓa kìn ŋgéé.

²⁶Kí du nɨ́m ŋgə́ ya gə́tɨkom nɨ́ yoó, ŋgə́ viihó̧nagɨ nùb ók ɓe ŋgéé ɗàrò rè á.

²⁷Ɓetí Mèín ɗútɨ́ ŋgáb ɗə̀ŋhɨ̀ nyààŋ kàm ɓwáár noò duɓa ɓe nɨ́ɨ́b mɨ́nɨ́b ŋgə́ ya ɓwáína gbàŋ lâs lè. Ɓwáár kɨ́ á ɨnè: Krístù á ɓe nyí, ŋgə́ á cè nyí nànɨ gíí nyí ɓa kwàɓwênɨ mgbíí Mèèín.

²⁸Krístù kɨ́ á nɨ́m du ɓéènànɨ nɨ̀vɨ́tɨ̀b lu. Nɨ́m á tànɨ nò lâs gə́tìi, nɨ́m a nàcè nò lâs sóóŋ ɓe kɨ̀cáàb Mèín na nɨ́mè, àm nɨ́m a ndɨ̀ŋ nò lâs fó̧ Mèèín tíí hȩ nò duɓacɨ gbɔ̧́ɔ̧ ɓe ju ɓaín ɓe Krístùù.

²⁹Mɨ lɨɨŋháce mɨ́ yúùnɨ ə́r kɨ́ ɓe nyòm kàm tamnì Krístù naré mɨ sóò á.