Read Vute Nùb Kòlóòs 2 Bible Online

Nùb Kòlóòs 2 - Vute bible

Nùb Kòlóòs 2

¹Mɨ ɗú nyí ɗə̀ŋhɨ̀ ɨnayâna mɨ á lɨ̀ɨ̀ŋnɨ cei ɓe ɨ́r nyínè, ɓe ɨ́r nùb Làwòdìséè, dùgɨ̀ ɓe ɨ́r nùb duɓaye mɨ ɓe íí pə́kɨ́yèwáá.

²Mɨ lɨŋhɨ u̧ àm njɔ̧̀ ŋgábè a tàm, ŋgáb a dùɓà ɓaín ɗûnɨ́m ŋgábè no, ŋgáb a dùɓà ɓe gíí kɨ̀cáàb du nàniì, ɗà ŋgáb a ɗə̀ŋhȩ̀ nɨ́m yi du yoó Mèín viina nɨ́m ndè na á. Nɨ́m yi du yoó kɨ́, Krístù á.

³Kɨ̀cáàb ɓe ɗɨɨ́ŋ du hȩ njɔdɨ̀b du yo̧né rè, Krístù kɨ́ ɨ́ du ɓe kí ru.

⁴Mɨ nyinna nyí u̧ àm nò kù tɨ̀ go nyí mbáàŋnɨ ɓe nyindí nyɔ̧ɔ̧́ nó ɓɔ̧ne á.

⁵Dugɨ hȩ mɨ du ɓe nyí yɨ́ mwi̧ ɗàwáá, nyí á mo njɔ̧̀, mɨ á nyí lə́ə̀mnɨ. Mɨ á cè ókɓànɨ mɨ̀tù hȩ mɨ du pénɨ gə́tèé nyí du gə́tɨ̀nɨ yɨ́ nyínè juu, nyí a ə́əŋɓace kpéín ə́ə́m Krístùù no rè.

⁶Hȩ nyí ə́ə̀mnɨ ɨnayâna Yésù Krístù Kéké á na rè, dunáam ɓaín ɓe ŋgə́.

⁷Ŋgə́ dùnà nyí hȩ ɗɔ̀ɔ́b nyí cɨ́ɨmndé gwàáŋ nyínè no ku hȩ yɔ̀ɔ. Ju mèè nyínè lâs ɗòŋwò ŋgə́ yá. Ə́əŋnáam ɓwâ lâs kpéín ə́ə́m nyínè no, ɗóhîn ɓe nɨ́m kùb ya tɔɔna nyínè, nyí a sáktɨ̀ɓà Mèín.

⁸Gə́tɨnáam, nò kù tɨ̀ go nyí mbáàŋnɨ ɓe nyindí kum ɗoŋwo nɨ́ kɨ̀cáàb nɨ̀vɨ́tɨ̀bì ya kwe. Tɔ̀ɔ́ mbáŋní ɗàrɨ́, nɨ̀vɨ́tɨ̀b ɨ́ du bɨ́ nànɨ ru, ɗoŋwoce nɨ́ nyòom ɓáŋhɨ́b ɗɔ̀ɔ́b lè noò ya á, nɨ Krístù ya sé.

⁹Ɓetí, jɨ̀ Mèín duré, jɨ̀ Krístù yi duɓwéece ɓwâ ŋgə́ yi duye ɗɔ̀bɨ́nné á.

¹⁰Hȩ nyí dùnɨ ɓaín ɓe ŋgéé, nyí kwaɓwéeɓatɨ́ nɨ́ɨ́b lâs ju mèè ŋgéé no, ŋgə́ nò du ŋgáŋnɨ nyòom lâs ya kwe.

¹¹Ɓe ɨ́r ju ɓaín nyí du ɓe Krístùù, nyí á hȩ nùb kùb lə́nacɨ ndɨ̀ɨ́. Ndɨ̀ kɨ́ nɨ nɨ̀vɨ́tɨ̀b sé ɨ́ lə́na nyí, go nɨ Krístù ya á. Kí á ndɨŋ ŋgə́ ɓátɨ̀hó̧ nyí nì̧ì̧ cumí no ru.

¹²Ɓwâ kùb ya kɔhe nyí kɔ ə́mní, nyíne Krístù bɨ ya lə́ɓáatɨ́ sèrìn cúk. Nyíne ŋgáb səmcuhó̧ɓáaceé cwéé cúk àm nyí ə́mnɨ nyòm Mèín ya səəmcuhó̧ ŋgə́ cwéé ɓe kí rè.

¹³Nyí yɨɨ́m nɨ̀kwííb á ɓe ɨ́r cuum nyínè, ɓetí nyí yi nɨ́ óknɨ ɓe Mèín ɗàà. Ɨ́dù ɗàrò, Mèín ndɨŋtɨ́ nyí dùcù jáŋ ɓe Krístù. Mèín tɨ́ítɨ́ cuum nɨ́mè lâs.

¹⁴Yésù amɨkíí káàtà nyamandì yi du nɨ́mè só àm nɨ́m yi du ndɨ̀ŋwá nɨ́m yi du ɗúnɨ nɨ́m ndɨ̀ŋte rɨ. Ŋgə́ amɨkɨ́ káàtà kɨ́ ɓe cwá ŋgə́ kú bɨ̧̀ɨ̧́ rè á.

¹⁵Nyéhɨ̀b yi du ɓe nyòmeè lâs, Mèín ákíí nyòm ŋgábè kɨ́. Ŋgə́ gehó̧tɨ́ ŋgáb nɨ̀vɨ́tɨ̀bì tíí, ŋgə́ ɨ́ ndɨ̀ŋ ŋgáb lə́ kpáín gùr mgbíhɨ́rí Mwin ŋgéé ɓeiwo suu no hȩ nùb gɨ nìrì.

¹⁶Hȩ dùnɨ u̧nèé, nɨ ɗúwa nò kù kɨ́k nyí nɨ́m nyí taŋndé ɓe nɨ́m nyí məllé ya. Kɨ́ kù ɓe ɨ́r ye jùrúbí, ɓe ɨ́r njumi hehí, kɨ́ kù ɓe ɨ́r ye Sàbáà.

¹⁷Nɨ́ɨ́b kɨ́ lâs du bɨ nyéhè nɨ́ɨ́b nyɔ̧ɔ̧́ ɓa gòniì á, ɨ́dù àmɨɨr nɨ́ɨ́b kíì lâs du nɨ Krístù á.

¹⁸Nyí mbɨ́kwa nò kù yòm nyí. Kúúŋ nò kíì á gèsénɨ síí ɗàá, ŋgə́ a ɗôm dùgallɨb Mèèín. Ŋgə́ á lèèrénɨ síí nɨ́ɨ́b ŋgə́ pə́ wumné no. Ŋgə́ á ndɨ̀ŋnɨ mɨ̀tù kɨ́ samí ɓe mɨ̀lə́m ŋgéé sumíì du nɨ́ kɨ́ nɨ̀vɨ́tèé rè.

¹⁹Ŋgə́ nɨ́ dùnɨ ɓaín ɓe Krístù nò du hȩ ŋgwé síhé ɗàà. Ɓe ɨ́r Krístù nò du hȩ ŋgwéé á síí lâs du gìnɨ nyɔ̧ɔ̧́, cɨklɨ̀b ɓe juŋnɨb lâs ɓaín mîn ndu. Síí kɨ́ á cè hamni hȩ Mèín ɗúré.

²⁰Nyíne Krístù bɨ yi kúɓáatɨ́ cúk, nyòom nɨ́ɨ́b ɓáŋhɨ́b ɗɔ̀bɨ́nné cè bɨ́ nyí kɨ́kcɨ̀nɨ ɗàà. Nyí ducukwacɨ nɨ ju hȩ nùb nɨ́ɨ́b ɓáŋhɨ́b kɨ́ du kɨ́kniì àm níì? Nyí ə́əmce nɨ́ kùb nà nyí ɓíì, nò kɨ́ a tà:

²¹«Wu kɨ́ rè â», «Wu kɨ́ rè kə̀ə», «Wu kɨ́ rè dì̧nɨ̀r» ɓe àm níì?

²²Kúúŋ ɓíì kíì ók nɨ́ ɓe nɨ́ɨ́b ɓa bɨ́ lɔ̧́nɨ ɓwâ kùb tɨ éícɨ bɨ́ ə́r nóò á. Kí nɨ́ ɓíì ɓe tɔ̀ɔ́ nɨ̀vɨ́tɨ̀b kəbɓaré á.

²³Á mè u̧, ɗómèé Mèèín goɓa wo sumíì, gèsê síí ɗàá ɓe nàá síí wóò jábɨ́rí á ɓàhá íhín fɨ́tîn ɓíhɨ̀b na kɨ̀cáblì, ɨ́dù ɓíhɨ̀b kɨ́ bɨ kpɔ́knɨ nɨ́m kù ɗàà, ŋgáb duhó̧ɗóo bɨ ɓe ɨ́r ndɨŋ nɨ́m nyaŋ nɨ̀vɨ́tè sumíì á.