Read Vute Nùb Kòlóòs 3 Bible Online

Nùb Kòlóòs 3 - Vute bible

Nùb Kòlóòs 3

¹Nyíne Krístù bɨ ya səəmcuhó̧tɨ́ cwéé cúk, mánáhácɨ̀ nɨ́ɨ́b du ɓɨllɨnne, yá Krístù du du̧ú̧ Mèèín ŋgáár lame rɨ.

²Kɨ́knábɨ̂ŋ njɔ̧̀ nyínè nɨ́ɨ́b còóm kwe ya, nyí a mbɨ̂ nɨ́ɨ́b ɗɔ̀bɨ́nné.

³Ɓetí nyí ya kútɨ́, ɨ́dù mè nyíne á cè nɨ́ yo̧ó̧ ɓe Krístù yɨ́ Mèín.

⁴Mè àmɨrì nyínè du Krístù á. Ɓwâ ŋgə́ kwá cuworé, nyí kwá duɓwée ɓe ŋgə́ mgbíí ŋgéé no.

⁵Àm kɨ́ á du ɗúnɨ nyí kwíìkɨ́ ɗɨ́m cumí nyínè kɨ́ ru, cum bɨ hȩ: ŋguùŋ du nànɨ sə̀réé, ndɨ̧̀ɨ̧́ nɨ́ɨ́b du ɓáŋhɨ́bí, sunɨ̀b, mɨ̀lə́m ndɨ̧̀ɨ̧́ ɓáŋhɨ́nne ɓe hàŋfì, (ɓetí hàŋfì du nɨ ɗómèé mèín saaibi á).

⁶Kúúŋ nɨ́ɨ́b du ndɨ̀ŋnɨ njùŋ Mèèín bɨ̀ nɨ̀vɨ́tèé á kí.

⁷Ɓwâ ya tíí, ɓwâ kúúŋ cuum kíì ya duye nyí kɨ́ɨ́niì, ɗɨ́m juu nyínè yaá u̧.

⁸Ɨ́dù ɗàrò, mbɨ́knáam nɨ́ɨ́b kɨ́ lâs, nɨ́ɨ́b hȩ: njù̧, njɔ̧̀ ɓə́ndîn, ɓáŋnjɔ̧̀; nyèìn ɓe nyindí ɓáŋhɨ́b nɨ nyínè ɓɔ̧ɔ̧ fó̧cɨ̀r.

⁹Nyí nɨ kààŋ mvókín nyínè no kààŋtèècɨ̀r, ɓetí ɗɨ́m juu nyí tɨ duyaye ɓe kí tíí rɨ, nyí njeikíí ɗɨ́m kɨ́ hȩ júk fìn.

¹⁰Ɓe ɗɨ́m juu heé nyí lə́ré só hȩ júk heé cè ɗàrɨ́, nyí seitɨ́ nɨ́ nùb heé. Mèín nɨ̀nyàŋhȩ̀ á cè ndɨ̀ŋnɨ ɗɨ́m heé kɨ́ gɨ̀ndóŋ tíí tíí, àm nyí a fɨ́tè ní, nyí a ɗə̀ə̀ŋɓàcè ní mɨ́nne.

¹¹Hȩ dùnɨ u̧nèé, gɔ̀ nɨ mvókín Jwîf bɨ ɓe nùb du Jwîf séé ɗàcɨ̀wá, dùgɨ̀ mvókín nùb lə́ ndɨ̀ɨ́ ɓe nùb du ndɨ̀ lə́waá, nùb ɗəŋhɨ káàtàà ɓe nùb du ju mɨ̀kùnɨ́nné ɗúwaá, dùgɨ̀ mbɔ́klɨ́b ɓe nùb du mbɔ́ɔ́ séé, ŋgáb á lâs hàrák. Krístù ɨ́ duce ŋgáŋnɨ ŋgáb lâs ya ru, ŋgə́ á cè ŋgáb lâs sumí.

¹²Nyí gbàŋ Mèèín á, Mèín yi ɗútɨ́ nyí, ŋgə́ ɨ́ cà nyí. Dunáhácɨm ɓe njɔ̧̀ ɓwéin, njɔ̧̀ mwàmí, njɔ̧̀ gèsê síí ɗàá, njɔ̧̀ kerîn, njɔ̧̀ jíhɨ́rí.

¹³Dunáam ɓe jíhɨ́r mvókín nyínè no, nyí a dù ɓe tɨ́ɨ́r, ɓè nò kù du ɓe nɨ́m kù ŋgə́ yetɨ kùŋ noò ya kwe. Dunáam ɓe tɨ́ɨ́r mvókín nyínè no hȩ Kéké tɨ́íɓwéece nyínè.

¹⁴Mvókín nɨ́ɨ́b kíì lâs, nɨ́m du tíí á nyí dù ɓe ɗûnɨ́m mvókín nyínè no. Ɗûnɨ́m ɨ́ du lí du nyí ɓànnɨ lâs lu.

¹⁵Ju ɗóóŋ Kékéé ɗə́ŋhɨ̀ mɨ̀lə́m nyínè sumíì. Ɓetí, ɓe ɨ́r ju ɗóóŋ kíì á Mèín yi ɓéwoɓáhe nyí, nyí gò dùnɨ lâs yá mwi̧ ru. Tàlɨ́ŋná ŋgə́ kùsùk.

¹⁶Kìn Kékéé dùɓà nyínè sumí. Faám kìn kɨ́ noò dù nyí ya. Nanáam tɔ̀ɔ́ mvókín nyínè no. Mvókín nyínè no, sóoŋnáam kùb mwin yàá ɓe kɨ̀cáàb lâs. Soŋnáam wààì Jwîf ɓoò. Soŋnáam wààì kpóŋ Mèín nóò, ɓe kɨ́b Nyéhè Sarîn na nyí nyòm soŋndé.

¹⁷Nɨ́ɨ́b nyí ndɨŋndé ɓe kɨ́b nyí nyinndé lâs no, ndɨŋnáam nɨ́ɨ́b kɨ́ àm nyí du nɨ̀fuùb Yésù nò du Kékéé, nyí a sáktè Mèín nò du Táà ɓe ɨ́r ŋgéé.

¹⁸Nɨ̀gub, jəŋnáam ŋgwásɨ̀b nyínè, Kékéé tíí á u̧ nyɔ̧ɔ̧́.

¹⁹Nɨ̀ŋgwáàb, ɗúnáam gub nyínè. Nyí ɗɨ́m tamnì ɓe gub nyínè gèwá.

²⁰Munɨ́b, jəŋnáam tá nyínè ɓe yà nyínè nɨ́ɨ́b lâs nyí du ndɨ̀ŋniì no, nɨ́m nyaŋ Kéké sumíì á kí.

²¹Táàb munɨ́bí, nyí munɨ́b nyínè nɨ́m njù̧ú̧ ndɨ̀ŋ, àm njɔ̧̀ tɨ̀ fei ŋgábè.

²²Mbɔ́klɨ́b, ɗɔ̀bín hò̧, jəŋnáam táàb nyínè mbɔ́klí. Nɨ ɗúwa nyí éíhó̧ɗóò ə́rɨ́b ɓwâ ŋgáb du nyí íí ya góòmniì, àm ŋgáb a óknà nyí mɨ́nne. Ɨ́dù éínanáɓam ŋgáb sum mwi̧, ɓe ɨ́r jɨ̧ nyí du jə̀ŋnɨ Kékéé.

²³Ə́r kùb ɗob nyínè, éínáam ə́r kɨ́ ɓe sum mwi̧ hȩ nyí ə́nnace Kéké rɨ u̧, nyí nɨ hȩ nyí ə́nna nɨ̀vɨ́tɨ̀b ə̂r.

²⁴Ɗəəŋnáam Kéké ɓa nyí nànɨ lɔ̀ɔ́ á, ɓetí tá nyínè ə́ré àmɨɨr du nɨ Kéké á.

²⁵Ɨ́dù, nò ndɨŋ ɓáŋhɨ́nne tɨ̀ kwaháce nɨ́ nɨ́m ɗóhɨ ɓe ɓáŋhîn ŋgə́ tɨ ndɨŋ kíì, ɓetí Mèín nɨ́ kɨ́klénɨ gɔ̀ mvókín nɨ̀vɨ́tɨ̀bì ɗàà.