Read Vute Nùb Kòlóòs 4 Bible Online

Nùb Kòlóòs 4 - Vute bible

Nùb Kòlóòs 4

¹Nyí nùb duce táàb mbɔ́klɨ́bí, dunáam ɓe mbɔ́klɨ́b nyínè ju ɗɨ́ɗɨ̧́, ju njɔ̧̀ nyɔ̧né, nyí a ɗə̀ə̀ŋɓwêcè ɨnayâna vúm á ɓe tá mbɔ́klí kù ɓɨllin.

²Yóŋnáam Mèín ɓwâ lâs. Dukɨ́náam jáŋ ɓe mɨ̀yú̧, nyí a sáktè Mèín.

³Yóŋnáɓwê ɓe ɨ́r nɨ́mè, ɗà Mèín a nà nɨ́m mvókín nɨ́m ta kìn noò, nɨ́m a ɓéhè nɨ́m yi du yoó ɓe ɨ́r Krístùù, ɓetí ɓe ɨ́r nɨ́m yi du yoó kɨ́ á mɨ du nìrì ru.

⁴Yóŋnáam Mèín ɗà mɨ a nyìnɓà àm Krístùù kɨ́ wááŋ hȩ Mèín du ɗúnɨ mɨ nyìnte.

⁵Ɓwâ nyí ɓáhɨ ju ɓe nùb du bɨ́ ə́ə̀mnɨ Krístù ɗàwá rɨ, dunáam ɓe ɗɨ́m nyɔ̧ɔ̧́. Mvókín nyí fɨ́tɨ ŋgáb kpɔ́kniì ɨ́ sə̀mnà nyí, nyí mbɨ́kwa.

⁶Nyindí nyínè ɓɔ̧ne dùhá ɓwâ lâs kùbè tó̧ó̧ nyɔ̧ɔ̧́, dùhá nyindí nyaŋɓa kùb sumíì. Pììnàná nùb lâs hȩ du ɗúniì.

⁷Tìcîk, mwin yàá nɨ́mè ɗûnɨ́mí du ə́nnànɨ Kéké ɓe jɨ̧ cúú, ɓa nyí tànànyààŋnɨ nɨ́ɨ́b lâs du ndóŋnɨ ɓe mé á. Nɨ́me ŋgə́ á ə́nnàɓáànɨ Kéké cúk.

⁸Mɨ tómna nyí ŋgə́ àm ŋgə́ a tànànyààŋɓà nyí jɨ̀ nɨ́m du dùniì, ŋgə́ a tààmnàcè nyí njɔ̧̀ɔ̧ á.

⁹Ònèsîm, mwin yàá nɨ́mè ɗûnɨ́mí, du tùɓànɨ jɨ̀r Kékéé ɓe jɨ̧ cúú á gɨso ɓe ŋgə́ ɗàrɨ́. Ònèsîm kɨ́ nò nyínè Kòlôs kwe á. Ŋgə́ ɓe kùŋ ɓa nyí átɨ̀nànyààŋnɨ nɨ́ɨ́b du ndóŋnɨ hò̧neè á.

¹⁰Àrìstârk, nò nɨ́me ŋgə́ du nìrì hò̧ cúú nyindɨsotɨ́ nyí. Máàrk, mwin yàá Bàrnàbáàs nyindɨsoɓwéetɨ́ nyí. (Nyí tɨ ókcií sóóŋ ɓe ɨ́r ŋgéé ɨnayâna, ŋgə́ féíntɨ́ yɨ́ nyínè, nyí a gàmɓà ŋgə́ nyɔ̧ɔ̧́.)

¹¹Yésù, nò kùb du ɓéɓwênɨ Jùstûs lɨ nyindɨsoɓwéetɨ́ nyí. Mvókín Jwîf bɨ yi sei nùb tu Krístùù no, nùb taarɨ́b ɗàrɨ́ ɨ́ du éíɓáànɨ ɓe mɨ àm ŋgɔ̧́ɔ̧̀ Mèèín a gì tíí ru. Ŋgáb taamnaɓatɨ́ mɨ njɔ̧̀ cei.

¹²Èpàfɨ̀râs, duɓwée nò nyínè kpánéné nyindɨsoɓwéetɨ́ nyí. Ŋgə́ nò ə́ré Yésù Krístùù á, ŋgə́ á cè lɨ̀ɨ̀ŋɓànɨ cei ɓe ɨ́r nyínè mɨ̀yú̧ ŋgə́ du yóŋnɨ Mèèín no. Ɓetí ŋgə́ á ɓwèìnɨ Mèín ndɨ̀ŋ nyí dùɓà ju nùb tu Krístùù nyínè hàrák, nyí a dùcè kə́sə́k ndɨ̀ŋnɨ nɨ́m Mèín ɗúré.

¹³Mɨ ə́əŋnatɨ́ ŋgə́ mɨ̀námé, tànànɨ nyí ɨnayâna ŋgə́ á áɓànɨ jábɨ́r cei ɓe ɨ́r nyínè, ɓe ɨ́r nùb Làwòdìséè, dùgɨ̀ ɓe ɨ́r nùb Hèrìyàpòlíìs.

¹⁴Lúkàs, mwin yàá nɨ́mè du ə́nnɨ ə́r nyaaŋna kùb ŋgare rɨ, ŋgə́ ɓe Dèmâs nyindɨsoɓwéetɨ́ nyí.

¹⁵Nyindɨnáam mwin yàá bɨ ə́mní lâs du Làwòdìséè. Nyìndɨ̀náɓwê Nìmfâ ɓe mɨ̀kwìn nùb ə́mní lâs du ɓáàlɨ́ŋnɨ ŋgéé yóò.

¹⁶Ɓwâ nyí ɓa fàìncáàŋnɨ káàtà rèè, tómsònànáɓwê mɨ̀kwìn nùb ə́mní du Làwòdìséè, àm kùb a fàìnnàɓwê nùb ə́mní du kwe. Kɨ́ nyínè, nyí a fàìncùcê kɨ́ ɓa gònɨ Làwòdìsê kwe.

¹⁷Tananáam Àrkɨ̂b ɨnè: «Gə́tɨm, ə́r Kéké naré wu ŋgáré ɗàrɨ́, éíɓam ə́r kɨ́ hàrák hȩ du ɗúniì.»

¹⁸Káàtà rè no, yɨ́ nyìndíí rè, mɨ Pôl, mɨ nɨ̀mɨ́r ɨ́ tɨinɓa ru. Mɨ nyinndɨsotɨ́ nyí. Ɗəəŋnáháam ɨnayâna mɨ á nìrì. Mèín fàm nyí!