Read Vute 1 Nùb Tèsàlòníìk 1 Bible Online

1 Nùb Tèsàlòníìk 1 - Vute bible

1 Nùb Tèsàlòníìk 1

¹Mɨ Pôl, nɨ́me Sílàs ɓe Tìmòtê, nɨ́m ɨ́ tɨin káàtà rè ru. Nɨ́m tɨnna kpáín nùb ə́mní Tèsàlòníìk á, ŋgáb nùb du óknɨ ɓe Mèín nò du Táà ɓe Yésù Krístùù nò du Kékéé. Mèín fàm nyí, ŋgə́ a nà nyí ju ɗóóŋ.

²Nɨ́m á ɓwâ lâs sáktɨ̀nɨ Mèín ɓe ɨ́r nyí lâs. Ɓwâ nɨ́m duce Mèín yóŋniì, nɨ́m á nyí lə́ə̀mnɨ.

³Ɓwâ nɨ́m du Mèín nò du Tá nɨ́mè yóŋnɨ kɨ́, nɨ́m á lə́ə̀mnɨ hȩ nyí du túùmnɨ ə́ə́m ɗɨ́m nyínè noò, hȩ nyí du éíɓànɨ ə́r, túùmnɨ ɗûnɨ́m kùŋ mwin yàá, hȩ nyí duɓace sə̀ŋnɨ gíí ɓe Yésù Krístù nò du Kéké nɨ́mè.

⁴Mwin yàá bɨ ə́mní, nɨ́m ɗəəŋtɨ́ ɨnayâna Mèín ya ɗúú nyí, ŋgə́ ɨ́ cà nyí àm nyí a ô ɓe ŋgéé.

⁵Nɨ́m yi nɨ́ nyí gèwònàwá Kìn Nyɔ̧ɔ̧́ ɓe ɓɔ̧ ɗóò, yi duɓwée nɨ ɓe nyòm Nyéhè Sarîn yi na nɨ́mè á, cè nɨ́ àmɨɨr á. Nyí ɗəəŋceé hȩ nɨ́m ya ge ɗɨ́m nɨ́mè mvókín nyínè no, àm nyí a dù mɨ́nne.

⁶Nyí cè, nyí yi tuú gurub gùrí nɨ́mè ɓe kɨ́ Kékéé, nyí yi pə́ɓatɨ́ jábɨ́r cei. Ɨ́dù, dugɨ nɨ́ u̧, nyí ɨ́ ə́mnè Kìn Mèèín ɓe mɨ̀tù Nyéhè Sarîn du nàniì.

⁷Ɓe ndɨ̧̀ɨ̧́ u̧nè kɨ́, nyí yi duna nùb ə́mní Màsèduwân ɓe Àkàyíì túúm á.

⁸Wúúm ə́ə́m Kìn du ɓe ɨ́r Kékéé ndərɨ há̧á̧ Màsèduwân ɓe Àkàyî rè, yawo ə́ə́m nyí yi ə́mne Mèèín ya á. Àm ə́ə́m nyínè kíì yi erɨkíí ɗɔ̀ɔ́b lâs. Nɨ nɨ́m nɨ́m ndáŋkwa nyìnniì sé.

⁹Nùb lâs á nyìnnɨ àm gàmé nyí yi gam nɨ́m ɓwâ nɨ́m yi gɨ yɨ́ nyínè, ɓe àm nyí mbɨ́kce mèín saai, ɓàndɨ̀cùrénɨ Mèín nò du jáŋ, duɓwée àmɨrìí no ɗómnɨ ŋgə́ ɓe jɨ̧ cúk lè.

¹⁰Nyí á móŋnɨ Mwin ŋgéé sówò ɓɨllin. Mwin ŋgéé Yésù, ŋgə́ ya səəmcuhó̧ mvókín nɨ̀kwíbí, duce nɨ́m céínhó̧nɨ ŋgwìn Mèèín ducɨ ŋgóblîn ndè no rè.