Read Vute 1 Nùb Tèsàlòníìk 2 Bible Online

1 Nùb Tèsàlòníìk 2 - Vute bible

1 Nùb Tèsàlòníìk 2

¹Mwin yàá bɨ ə́mní, nyí nɨ̀miib nyí ɗəəŋɓatɨ́ ɨnayâna gùr nɨ́m ya gɨso yɨ́ nyínè rè yi kpɔ́ktɨ́ nyí.

²Nyí ɗəəŋɓwéeceé ɨnayâna ɓwâ nɨ́m yi féín Fìlíìb, kùb yi andɨwoyeé nɨ́m ku, kùb ɨ́ jóktè nɨ́m, ɨ́dù ɓe nɨ́ɨ́b kɨ́ lâs, ɓwâ nɨ́m yi féín yɨ́ nyínè, Mèín ɨ́ nà nɨ́m kɨ̀ɓá̧á̧ nɨ́m tana nyí Kìn noò, dugɨ hȩ kùb yi jóktɨɓa nɨ́mè.

³Nɨ́ɨ́b nɨ́m du nyìnniì nɨ kum sé, nɨ́m nɨ ɓe mɨ̀lə́mkáín ɓáŋhɨ́b ɗàɓwêwá, cè nɨ́ àm nɨ́m ɗú nò kù mbáàŋniì nɨ sé.

⁴Nɨ́m nyinɓahá nɨ́ nɨ́m Mèín ɗúré á, ɓetí ŋgə́ yi péé hȩ nɨ́m duré, á ŋgə́ yi naré nɨ́m Kìn noò ɓɔ̧ɔ̧ ru. Nɨ́m nɨ máwa àm nɨ̀vɨ́tɨ̀b a pê nɨ́m mɨ́nne, nɨ́m má nɨ́ àm Mèín nò ɗəŋhȩ mɨ̀lə́m nɨ́mè sumíì a pê nɨ́m mɨ́nne á.

⁵Nyí ɗəəŋtɨ́, nɨ́ɨ́b nɨ́m yi du nyìnniì, yi nɨ́ àm mbáŋhɨ nɨ̀vɨ́tɨ̀bì sé, yi nɨ́ àm nɨ́m taŋhó̧ kùb mòné ŋgáréè sé ɓwê, Mèín nɨ̀mɨ́r ɗəəŋceé u̧.

⁶Dùgɨ̀ nyí, dùgɨ̀ na, nɨ́m yi nɨ́ máwa nò kù kúmɨ̀ nɨ́m.

⁷Yaá sàmàìn nɨ́m kɨ́k nyí àm nɨ́m du nùb tómé Krístùù, ɨ́dù nɨ́m ɨ́ dù nɨ́ u̧ ndɨ̀ŋwá. Ɓwâ nɨ́m yi du yɨ́ nyínè kɨ́, nɨ́m yaá nɨ́ ɓe njɔ̧̀ ɓwéin hȩ yà muní duce ɓe munɨ́b noò.

⁸Ɓe ɗûnɨ́m nɨ́m ya ɗú nyí kɨ́, yi nɨ́ àm nɨ́m tahó̧naɗóo nyí Kìn Mèèín sé, nɨ́m yaá ɓwê kə́sə́k kàìkɨ́nɨ mè nɨ́mè ɓe ɨ́r nyínè, ɓetí nɨ́m ya ɗúɓatɨ́ nyí cei.

⁹Mwin yàá bɨ ə́mní, nyí ɗəəŋɓatɨ́ vùùm ə́rɨ́b nɨ́m yi ə́llé ɓe jábɨ́r nɨ́m yi kwaré. Mvókín nɨ́m yi du yɨ́ nyínè, ɓéènànɨ nyí Kìn Mèín tómworé kɨ́, nɨ́m yi tamkom ɓa nɨ ŋgáré á, nɨ́m yaá nɨ́ ə́nnɨ cɨ́ɨ́m ɓe mvihin cúk, àm mvókín nyínè no, ha̧á̧ nɨ́mè tɨ̀ lúuré nò kù yaà.

¹⁰Ɗɨ́m nɨ́m yi ge ɓe nyí nùb du ə́ə́m sumíì yaá hàrák, ɗɨ́ɗɨ̧́, kum ɗàà. Nyí ɗəəŋɓatɨ́ u̧, dùgɨ̀ Mèín ɗəəŋɓwéetɨ́ u̧.

¹¹Nyí lâs, nyí ɗəəŋtɨ́ ɨnayâna nɨ́m yaá dùnɨ ɓe nyí hȩ tá ɓe munɨ́b noò.

¹²Nɨ́m yi naá nyí sóóŋ, nɨ́m ɨ́ tàmè nyí njɔ̧̀, nɨ́m ɨ́ kpɔ́hè nyí, nyí dù ju hȩ Mèín ɗúré, ŋgə́ nò du nyí ɓérénɨ haam mgbíhɨ́rí noò no kwe.

¹³Nɨ́m sáktɨkwaháá Mèín, ɓetí ɓwâ nɨ́m yi tana nyí Kìn noò, nyí yi ə́əmtɨ́ Kìn kɨ́. Nyí yi nɨ́ ə́ə̀mwá àm du kɨ́ nɨ̀vɨ́tè tómworé, ɨ́dù nyí yi ə́əm nɨ àm du kɨ́ Mèín tómworé á, ŋgə́ ya tómwomece Kìn kɨ́ ru. Kìn kɨ́ á cè ndɨ̀ŋnɨ nyí nùb du ɓe ə́mní nyí dù hȩ Mèín ɗúré.

¹⁴Mwin yàá bɨ ə́mní, ɗɔ̀ɔ́b Jùdéè no, jóktɨ́r kpáín nùb ə́mní ók ɓe Mèèín, yi ə́əmɓwéece Yésù Krístùù yi kwaré á kwaɓwée nyí rè. Hȩ Jwîf bɨ yi jóktɨcu kùb ɓoò Jwîf bɨ ɗɔ̀ɔ́b Jùdéè rɨ, á ɓwê kùb nyínè nùb Tèsàlòníìk jóktɨɓwée nyí rè.

¹⁵Ŋgáb ya nduhií tɨ́kɨ̀nɨ́b Mèèín, ŋgáb ɨ́ kwíhè Yésù nò du Kékéé, ŋgáb ɨ́ jóktè nɨ́m. Ŋgáb á Mèín ɓáàŋɓà nɨ njɔ̧̀, nɨ̀vɨ́tɨ̀b lâs á cè ŋgáb ɓə̀ndɨ̀nɨ.

¹⁶Ŋgáb á lɨ̀ɨ̀ŋnɨ vúm yè harií nɨ́m tànàá nùb du Jwîf séé Kìn Mèín ɓa ŋgáb ɓátɨ̀niì. Ɓe ndɨ̧̀ɨ̧́ u̧nè kɨ́ á ŋgáb du yúùnɨ fain cum ŋgáb ya ɗóŋ ndɨ̀ŋlɨ́ŋniì. Ŋgáb ducɨ bɨ ɓè nùb ŋgwìn Mèèín bɨré á.

¹⁷Mwin yàá bɨ ə́mní, mvókín nɨ́me náb gɔɔhó̧ye rè no, nɨ́m tɨ á ɗúɓànɨ nyí pə́cùnɨ, á nɨ́m lɨɨŋhá àm nɨ́me náb a ɓàìncùú. Nɨ́me náb du bɨ gɔklîn àm nɨ́m du nɨ́ yɨ́ mwi̧ ɗàwáá á, nɨ́m mwi̧ nyí á há nɨ nɨ́mè njɔ̧̀ɔ̧.

¹⁸Nɨ́m tɨ ɗúɓaháá gɨ̀cùsònɨ yɨ́ nyínè ku, ɨ́dù Sátàìn ɨ́ hàrè nɨ́ nɨ́m. Mɨ Pôl lè, mɨ kəkɓatɨ́ sàmàìn gwì bɨrɨ́b ɓe taarɨ́b.

¹⁹Nɨ́m á ɗúɓànɨ gɨ̀sònɨ, ɓetí nyí ɨ́ duha gíí nɨ́mè, mɨ̀tɔ̀k nɨ́mè ɓe lɨ̀m ɓə̀ré suu nɨ́m ɓa óknɨ nyɔ̧ɔ̧́ ɓe kí Yésù nò du Kéké nɨ́mè tíí, ye ŋgə́ ɓa cùwòniì ru ye!

²⁰Á mè u̧, nyí du mgbíí nɨ́mè ɓe mɨ̀tɔ̀k nɨ́mè á.