Read Vute 1 Nùb Tèsàlòníìk 3 Bible Online

1 Nùb Tèsàlòníìk 3 - Vute bible

1 Nùb Tèsàlòníìk 3

¹Hȩ tɨ du sàmàìn nɨ́m jíikɨ́háré ɗàwáá á nɨ́m tɨ tómsona nyí Tìmòtê, mwin yàá nɨ́mè nɨ́me ŋgáb du ə́nnàɓáànɨ Mèín ə́r ɓéhèé Kìn Nyɔ̧ɔ̧́ du ɓe ɨ́r Krístùù rè, nɨ́m a dùbɨ̂ŋ Àtên. Nɨ́m tómsona nyí ŋgə́ àm ŋgə́ a tààmnà nyí njɔ̧̀ ɓe ə́ə́m nyínè á.

³Àm mvókín nyínè no, nò kù tɨ̀ mbɨ́k ə́ə́m nóò gùnnɨ ɓe ɨ́r jábɨ́r nɨ́m duná pénɨ rè. Nyí nɨ̀miib, nyí ɗəəŋtɨ́ kúúŋ jábɨ́r bɨ u̧ kɨ́ kwaná nɨ́m àm ya du nɨ́ ɓwáin ɓe ɨ́r nɨ́mè á.

⁴Ɓetí ɓwâ nɨ́m ya duye yɨ́ nyínè, nɨ́m yi takɨ́nacií nyí ɨnayâna jábɨ́r ɓa nɨ́m kwànɨ ɓe ɨ́r ə́mní á, jábɨ́r kɨ́ á kwace nɨ́m ndè, nyí nɨ̀miib nyí ɗəəŋɓatɨ́ u̧.

⁵Àm kɨ́ á, hȩ tɨ du sàmàìn mɨ jíikɨ́há móŋkɨ́nɨ mvókín gùrí ɗàwáá, á mɨ tómso Tìmòtê, ŋgə́ gɨ̀ fɔ́nyààŋnɨ hȩ ə́ə́m nyínè du gìniì, ɓetí mɨ tɨ á lùnɨ vùù Sátàìn yè tɨ kəhií nyí ɗà ə́ə́m nyínè ɨ́ gù nɨ́ kè, ə́r nɨ́mè tɨ̀ lɔ̧́sé nɨ́ ɗàá sam.

⁶Ɗàrò Tìmòtê cuwotɨ́, ŋgə́ gecuwonatɨ́ nɨ́m péìn nyɔ̧ɔ̧́ du nɨ́m tànànɨ hȩ ə́ə́m nyínè du gìniì, hȩ ɗûnɨ́m nyí du ɓe kíí. Ŋgə́ tanaá nɨ́m ɨnayâna nyí á nɨ́m lə́ə̀mɓànɨ, nyí á cè ɗúnɨ nɨ́me náb ɓàìncùu hȩ nɨ́m duce ɗúnɨ ɓàìncùnɨ ɓe nyínè.

⁷Mwin yàá bɨ ə́mní, péìn kɨ́ ndɨŋtɨ́ ju yəréé ɓe ju jábɨ́rí nɨ́m tɨ dukom nóò, njɔ̧̀ tàmcù nɨ́m ɓe ɨ́r ə́ə́m nyínè kíì.

⁸Ɓetí ɗàrò, nɨ́m wákcutɨ́ àm nyí ə́əŋɓa kpéín ɓe ju ɓaín ɓe Kékéé rè.

⁹Ɓwâ nɨ́m du yóŋnɨ Mèín ɓe ɨ́r mɨ̀tù nyí du nɨ́m nàniì, nɨ́m sáktɨ̀ɓàyè ŋgə́ i̧?

¹⁰Cɨ́m ɓe mvii cúk, nɨ́m á yóŋnɨ Mèín sum mwi̧, ŋgə́ ndɨ̀ŋhá nɨ́m pə́cù nyí, ɗà nɨ́m a tàcáàŋnà nyí nɨ́m du ɗúnɨ nyí ndɨ̀ŋte, yúùnànɨ nyí ə́ə́m nyínè.

¹¹Mèín nɨ̀mɨ́r nò du Tá nɨ́mè, ɓe Yésù nò du Kéké nɨ́mè nà nɨ́m nyòm nɨ́m gɨso nyí péniì.

¹²Ɗûnɨ́m nyí du ɓe kí mvókín nyínè no, ɓe kɨ́ nyí ɗú nɨ̀vɨ́tɨ̀bì, Kéké ndɨ̀ŋ ɗûnɨ́m kɨ́ gɨ̀ tíí, a dù ɗóhîn ɓe kɨ́ nɨ́m ɗú nyínè.

¹³Ŋgə́ tààmnà nyí njɔ̧̀. Ɓwâ Yésù nò du Kéké nɨ́mè ɓa gònɨ ɓe nùb ók ɓe ŋgéé rɨ, Mèèín nò du Tá nɨ́mè tíí nyí a dù járkɨ́ták, kum só ɗàà.