Read Vute 1 Nùb Tèsàlòníìk 4 Bible Online

1 Nùb Tèsàlòníìk 4 - Vute bible

1 Nùb Tèsàlòníìk 4

¹Àà, mwin yàá bɨ ə́mní! Nɨ́m tɔɔnaá nyí ɗɨ́m juu Mèín ɗúré, nyí á cè ju kɨ́ dùcɨ̀ nɨ. Ɨ́dù ɗàrò, ndɨŋnáhácɨm a ndôŋ u̧. Ɓe ɨ́r Yésù nò du Kékéé á nɨ́m du nyí sóòŋɓànɨ ru.

²Nyí ɗəəŋtɨ́ sóóŋ Yésù nò du Kékéé ta nɨ́m gò nyí nàniì.

³Nɨ́m Mèín ɗúré á rè: nyí gə́tɨ̀ ɓe ɓíì ŋguŋnì, àm nyí a dù sarîn no íhín.

⁴Nò lâs ɗə̀ə̀ŋɓà hȩ ŋgə́ fɨ́tɨ ɓùnɨ gwi àm ŋgə́ a dù ɗɨ́ɗɨ̧́, ŋgə́ a dùɓwê dɨɨ́m Mèín íhín,

⁵ɨ́ ndôŋ kɨ́ ŋgə́ mbɨ́k mɨ̀lə́mkáín ɓáŋhɨ́b gà ŋgə́ njɔ̧̀ hȩ du ndɨ̀ŋnɨ ɓe nùb Mèín mɨr ɗə̀ə̀ŋwáá.

⁶Ɓe ɨ́r ɗɨ́m kíì, nò kù nɨ kùùŋ àm só téínwû, nò kù nɨ kùùŋ njə́ə̀cê. Nɨ́m tanaɓacií nyí: nùb du ndɨ̀ŋnɨ kúúŋ nɨ́ɨ́b kíì, Kéké kwá túmnɨ ŋgáb jábɨ́r.

⁷Mèín yi nɨ́ tàwá nɨ́m gò dùnɨ ju ɓeitee ɓíì ŋguŋnì, ŋgə́ yi ta nɨ nɨ́m gò dùnɨ sarîn no íhín á.

⁸Àm kɨ́ á, nò mvú tɔ̀ɔ́ rèè, nɨ mvúwa nɨ̀vɨ́tè, ŋgə́ mvú nɨ́ Mèín nò du nyí nànɨ Nyéhè Sarîn nóò á.

⁹Nɨ ɗúɓàcéyèwá kùb ndáŋkwà tɨ̀nnànɨ nyí ɓe ɨ́r ɗûnɨ́m mvókín mwin yàá ə́mní, ɓetí nyí nɨ̀miib, Mèín yi tanaá nyí ɨnayâna nyí dù ɓe ɗûnɨ́m mvókín nyínè no.

¹⁰Ɗûnɨ́m kɨ́ nyí á ɓàcéyè túùmnɨ ɓe mwin yàá bɨ ə́mní Màsèduwân bɨ̂ŋ. Ɨ́dù, mwin yàá bɨ, nɨ́m ta nyí ndɨ̀ŋ a ndôŋ u̧.

¹¹Lɨɨŋnáam dùnɨ ju ɗóóŋ, nɨ̀mwi̧ ndɨ̀ŋhácé nɨ nɨ́m du ŋgə́ góòmniì, nò lâs tàmɓà ŋgáré hȩ nɨ́m tɨ tanacɨ nyí rɨ u̧.

¹²Ɓe ɗɨ́m kɨ́ á nyí ɓa ndɨ̀ŋnɨ nùb du bɨ́ nùb ə́mní séé a jə̀ŋ nyí ru, ha̧á̧ nyínè a dùcè nɨ́ nò kù ya lúùsə̂r.

¹³Mwin yàá bɨ ə́mní, nɨ́m á ɗúnɨ nyí ɗə̀ŋhɨ̀ àmɨɨr du ɓe ɨ́r nɨ̀kwíbí, àm nyí tɨ̀ du ɓe yəré hȩ nùb kù du bɨ́ ɓe gíí ɨnayâna cùr cwéé, mè á ku na ɗàà rɨ.

¹⁴Nɨ́m á ə́ə̀mnɨ ɨnayâna Yésù yi kúú, ŋgə́ ɨ́ sə̀ə̀mcùhô̧ cwéé, u̧ á nɨ́m du ɓwée ə́ə̀mnɨ ɨnayâna nùb ɓa kúnɨ ɓe ə́ə́m sumíì, Mèín ɓa ŋgáb sə̀ə̀mcùhó̧nɨ cwéé ɓe ɨ́r Yésùù á.

¹⁵Nɨ́m nɨ́m wáhe, ɗòŋwòó nyindí kù Kéké ya nyinna nɨ́mè yaà á rè: Ɓwâ Kéké ɓa gòniì, nɨ́m nùb ŋgə́ ɓa kwàyènɨ jááŋ, nɨ́m tɨ̀ nɨ tíí ə́lléyàyè ɗà nùb ya kú kú̧ne a tùwò gì.

¹⁶Nɨ́m ɓa óknɨ kúu tamnì kù nyìnsónɨ á, nɨ́m a ô kúu mvèìn dùgallɨbi, nɨ́m a ókgì tóŋ Mèèín, ɗà Kéké nɨ̀mɨ́r a sówògì ɓɨllin. Nùb ya kú ɓe ə́ə́m ŋgáb ə́mnɨ Krístùù sumíì ɨ́ ɓa sə̀ə̀mcùhó̧yàyènɨ ru,

¹⁷cùr kɨ́ no, nɨ́m nùb ŋgə́ ɓa kwànɨ jáŋ ɓwâ kíì, kùb a ɓáàwúgì nɨ́me ŋgáb ɓɨllin, gìnɨ ɓànnɨ ɓe Kéké còóm ku. U̧ á nɨ́m kwá dulɨ́ŋ ɓe Kéké.

¹⁸Mvókín nyínè no, nɨ̀mwi̧ tààmnà kùùŋ njɔ̧̀ ɓe nyindí kɨ́.