Read Vute 1 Nùb Tèsàlòníìk 5 Bible Online

1 Nùb Tèsàlòníìk 5 - Vute bible

1 Nùb Tèsàlòníìk 5

¹Mwin yàá bɨ, nɨ ɗúɓàcéyècɨ̀wá kùb ndáŋkwà tɨ̀nnànɨ nyí ɓe ɨ́r ɓwâ nɨ́ɨ́b kɨ́ ɓa ndɨ̀ŋniì.

²Ɓetí nyí nɨ̀miib nyí ɗəəŋtɨ́ ɨnayâna ye Kéké ɓa gòniì kwá duɓwée hȩ ɓwâ ŋgàyɨ́r du lénɨ yúú rɨ u̧, sàmàìn kùb ɗəəŋndé ɗàà.

³Ɓwâ nɨ̀vɨ́tɨ̀b ɓa tànɨ: «Nɨ́ɨ́b lâs á ɗéhîn» ndɨ, ɓwâ kɨ́ á gɨ̀ jábɨ́r ɓa ŋgáb sɨ̀rɨ̀nɨ sɨrîn. Ɓa dùnɨ hȩ ɓwâ yíìnɨ́m muní yarélɨ́ŋ nɨ̀gwi fɨ́sɨɨm ndɨ á, ŋgáb tɨ̀ bɨ no ɓáíhó̧cée.

⁴Ɨ́dù kɨ́ nyínè, mwin yàá bɨ ə́mní, nyí nɨ sɨ́mnɨ̀rí hȩ nùb du bɨ́ Mèín mɨr ɗə̀ə̀ŋwáá ɗàà, ye kɨ́ kwá nɨ nyí sɨrîn sɨ̀rɨ̀r.

⁵Ɓetí nyí lâs nyí ók nɨ́ ɓe ye á, nyí nɨ nùb mwahɨ́nné á. Nɨ́m nɨ nùb cɨ́mné sé, nɨ́m nɨ ɓe sɨ́mnɨ̀r ókwa.

⁶Hȩ dùnɨ u̧nèé, nɨ ɗúwa nɨ́m gwín wum hȩ nùb kù, ɗú nɨ́ nɨ́m dù jáŋ á, nɨ́m a bì múb síhé.

⁷Nùb gwín wumí gwínhá bɨ́ cɨ́ɨ́m, nùb sei súmé cè, seihá bɨ́ cɨ́ɨ́m.

⁸Ɨ́dù kɨ́ nɨ́mè, nɨ́m nɨ nùb mvihɨnne á, ɗúce nɨ́m bɨ̀ múb síhé á. Á ɗúnɨ ə́ə́m nɨ́m du ɓe kíí, ɓe ɗûnɨ́m nɨ́m ɗú Mèèín dùnà nɨ́m nɨ́m gə́tɨ síhé, gíí Mèín ɓa nɨ́m ɓátɨ̀niì nɨ́m du ɓe kíí dùnà nɨ́m nɨ́m gə́tɨ ŋgwéé.

⁹Mèín yi nɨ́ nɨ́m ɓéwa àm ŋgwìn noò a bì nɨ́mè, ŋgə́ yi ɓé nɨ́ nɨ́m àm nɨ́m a kwà ɓə́r ɓe ɨ́r Yésù Krístù nò du Kéké nɨ́mè á.

¹⁰Ɓetí Krístù yi kúú ɓe ɨ́r nɨ́mè, àm nɨ́m a dù ɓaín ɓe ŋgéé, nɨ́m dùgɨ̀ jáŋ, nɨ́m dùgɨ̀ kúri.

¹¹Hȩ dùnɨ u̧nèé, mvókín nyínè no, taamnanáam kùŋ nyínè njɔ̧̀, nyí a kpɔ̂ kùùŋ hȩ nyí ducɨ ndɨ̀ŋnɨ ɗàrò ɗàrɨ́ u̧.

¹²Mwin yàá bɨ ə́mní, nɨ́m nɨ́m ta nyí ndɨ̀ŋte á nyí jə̀ŋ nùb du ndáŋnɨ ɓe ɨ́r nyínè rɨ. Ŋgáb nùb du nyí gènɨ ɓe nyòm Kéké ya na ŋgábè, ŋgáb a sóŋhȩ̀ nyí rɨ.

¹³Ɓe ɨ́r ə́r ŋgáb du ə́nnɨ kíì, túumnanáam ŋgáb dɨmɨɨr ɓe ɗûnɨ́m. Dunáam ju ɗóóŋ mvókín nyínè no.

¹⁴Nɨ́m yóóŋ nyí, mwin yàá bɨ ə́mní, tananáam nyɨnyáàb ŋgáb bɨ u̧ dùr, nùb du ɓe vùklì, taamnanáam ŋgáb njɔ̧̀, kpɔ́knáam nùb gó̧o̧, jíináam nùb lâs.

¹⁵Gə́tɨnáam, nò kù nɨ ɓáŋhîn ɓáábɨ̀r, ɨ́dù, mánáam ndɨ̀ŋnɨ kùùŋ nyɔ̧ɔ̧́ mvókín nyí mwin yàá bɨ ə́mní, dùgɨ̀ ɓe nɨ̀vɨ́tɨ̀b lâs.

¹⁶Dunáam ɓwâ lâs ɓe mɨ̀tù.

¹⁷Yóŋnáam Mèín ɓwâ lâs.

¹⁸Sáktɨnáam Mèín ɓwâ lâs. Nɨ́ɨ́b Mèín ɗú nyí ndɨ̀ŋ ɓe ɨ́r Yésù Krístùù á kí.

¹⁹Nɨ́m Nyéhè Sarîn ɗú ndɨ̀ŋnɨ rɨ, nyí nɨ ŋgə́ hàrɨ̀r.

²⁰Nyí nɨ kìn kùb ta go yɨ́ Mèèín á na rɨ jààŋkɨ̂r.

²¹Canáhá nɨ nɨ́ɨ́b lâs ca̧á̧, kɨ́ du nyɔ̧ɔ̧́ rɨ nyí a gə́tè.

²²Mvúnáam nɨ́m du nɨ́m ɓáŋhɨ́nne lâs.

²³Mɨ yóŋtɨ́ Mèín nò du nànɨ ju ɗóóŋ, ŋgə́ ndɨ̀ŋ nyí dùɓà sarîn no íhín, ŋgə́ gə́tɨ̀ɓà nyéhè nyínè, mè nyínè ɓe síí nyínè, nɨ́m yɨ̀tíí só ɗàà ɓe ɨ́r ye Yésù Krístù nò du Kéké nɨ́mè ɓa cùwòniì.

²⁴Mèín nò du nyí ɓéniì ɓa ndɨ̀ŋnɨ nɨ́ɨ́b kɨ́ á, ɓetí ŋgə́ á jə̀ŋnɨ ɓwáár noò.

²⁵Mwin yàá bɨ ə́mní, yóŋnànáɓwê nɨ́m Mèín.

²⁶Kuukɨ́náam mwin yàá bɨ ə́mní, nyìndɨ̀nɨ ŋgáb.

²⁷Mɨ yóóŋ nyí ɓe ɨ́r Kékéé, fainnanáam mwin yàá bɨ ə́mní lâs káàtà rè.

²⁸Mɨ yóóŋ Mèín ɨnayâna Yésù Krístù nò du Kéké nɨ́mè nà nyí faám nóò.