Read Vute 2 Nùb Tèsàlòníìk 1 Bible Online

2 Nùb Tèsàlòníìk 1 - Vute bible

2 Nùb Tèsàlòníìk 1

¹Mɨ Pôl, nɨ́me Sílàs ɓe Tìmòtê, nɨ́m ɨ́ tɨin káàtà rè ru. Nɨ́m tɨnna kpáín nùb ə́mní Tèsàlòníìk á, ŋgáb nùb du óknɨ ɓe Mèín nò du Tá nɨ́mè ɨ́ Yésù Krístù nò du Kéké nɨ́mè.

²Nɨ́m yóóŋ Mèín nò du Táà ɓe Yésù Krístù nò du Kéké nɨ́mè ŋgáb nà nyí faám ɓe ju ɗóóŋ.

³Mwin yàá bɨ ə́mní, á ɗúnɨ nɨ́m sáktɨ̀ Mèín ɓwâ lâs ɓe ɨ́r nyínè. Á hàrák nɨ́m ndɨ̀ŋ u̧, ɓetí ə́ə́m nyínè á gìnɨ tíí, mvókín nyínè no, ɗûnɨ́m mwin yàá ɓe kùùŋ á cè gɨ̀ndóŋnɨ tíí tíí.

⁴Àm kɨ́ á nɨ́m du tànànɨ mɨ̀kwìn nùb ə́mní bɨ kù hȩ nɨ́m du óknɨ mɨ̀tù ɓe nyínè, ɓetí nyí á ə́ə̀ŋɓànɨ kpéín ə́ə́m nyínè no, dùgɨ̀ ɓe vùùm yəré ɓe jábɨ́r nyí du péniì.

⁵Jábɨ́r kɨ́ á túùmnɨ ŋgwìn ɗɨ́ɗɨ̧́ Mèèín, ɓetí jábɨ́r nyí du jíìnɨ kɨ́, ɨ́ ɓa ndɨ̀ŋnɨ nyí sèì nùb du ɗóhîn ɓe lê haam noò nyí du pénɨ jábɨ́r ɓe ɨ́r kíí rɨ no ru.

⁶Ɓetí Mèín á ndɨ̀ŋnɨ nɨ́m du ɗɨ́ɗɨ̧́ɨ̧́. Nùb du nyí túùmnɨ jábɨ́rí, ŋgə́ ɓa ŋgáb nàcùɓwênɨ jábɨ́r á.

⁷Nyí nùb du pénɨ jábɨ́rí, ŋgə́ ɓa nyí nànɨ ndùúm á, ŋgə́ a nàɓwê nɨ́m. Nɨ́m kɨ́ ɓa ndɨ̀ŋnɨ ɓwâ Yésù nò du Kéké nɨ́mè ɓa sówònɨ ɓɨllin ɓe dùgallɨb noò duɓa ɓe nyòmeè rɨ á.

⁸Ŋgə́ ɓa gònɨ yúum waá no á, àm túmnɨ nùb mvú Mèín ɗə̀ə̀ŋnɨ, ɨ́ mvúkwà jə̀ŋnɨ Kìn Nyɔ̧ɔ̧́ du ɓe ɨ́r Yésù nò du Kéké nɨ́mè rɨ jábɨ́rí.

⁹Ŋgáb kwá pə́ jábɨ́r mɨ̀cɨ̧̀, ŋgáb kwá bɨ gín Kékéé ŋgóòbɓàr; dùgɨ̀ mgbíí kàm noò, ŋgáb kwá bɨ pə́ɓàr.

¹⁰Nɨ́m kɨ́ ɓa ndɨ̀ŋnɨ ye Kéké ɓa cùwòniì á, àm nùb ók ɓe ŋgéé a mgbíhè ŋgə́, nùb duce ɓe ə́mní a dɨ̀mè ŋgéé. Nyí nɨ̀miib duɓwée nɨ kpáín nùb kíì no á, ɓetí nyí yi ə́əmtɨ́ Kìn nɨ́m yi tana nyínè.

¹¹Àm kɨ́ á nɨ́m du yóŋnɨ Mèín ɓwâ lâs ɓe ɨ́r nyínè. Nɨ́m ɓottɨ́ Mèín nɨ́mè ŋgə́ ndɨ̀ŋ nyí dù ju ɗóhîn hȩ ŋgə́ ɗú nyí dùte. Nɨ́m ɓottɨ́ ŋgə́, ɓe nyòm noò, ŋgə́ ndɨ̀ŋ mɨ̀lə́m ndɨ̧̀ɨ̧́ nyɔ̧né du nyínè sumíì fó̧nà nyí hàrák, ŋgə́ ndɨ̀ŋ ə́ə́m nyínè dùɓà jáŋ.

¹²U̧ á ɓa ndɨ̀ŋnɨ ɨ́r Yésù nò du Kéké nɨ́mè kwà dɨmɨɨr ɓe nyí, ŋgə́ nɨ̀mɨ́r ŋgə́ a dɨ̀ɨ̀mɓwêcè nyí. Ndɨ̀ŋnyàáŋ Mèín nɨ́mè ɓe Yésù Krístù nò du Kéké nɨ́mè á kí.