Read Vute 2 Nùb Tèsàlòníìk 2 Bible Online

2 Nùb Tèsàlòníìk 2 - Vute bible

2 Nùb Tèsàlòníìk 2

¹Duú kɨ́ gùr Yésù Krístù nò du Kéké nɨ́mè ɓa gòniì, ɓe ɓáhèé nɨ́m ɓa ɓáànɨ gín ŋgéé, mwin yàá bɨ ə́mní, nɨ́m yóŋtɨ́ nyí:

²Nyí ɨ́ ô ɨnayâna ye Kékéé sattɨ́, nyí nɨ kɨ̀cáàb tùklɨ̀ nyí ŋgwȩ́ȩ́ kɔ́klîn u̧ mbɨ̂, nyí cè nɨ́ vùù ô. Kɨ́ kù kùb yè tanacií nyí àm kɨ́ hȩ kìn go yɨ́ Mèèín kè, kèè kùb yè tɨ ɓéena nyí ɓéhîn kè. Kɨ́ kù nò kù tanaá nyí ɨnayâna nɨ́m tɨintɨ́ nɨ́ u̧ káàtà kù no kè.

³Nò kù mbáàŋgɨ̀ nyí kúúŋ mbááŋ ŋge, nyí nɨ ə́mnɨ̀r. Ɓetí nɨ̀vɨ́tɨ̀b tɨ̀ du bɨ́ mvúlèèwá Mèín kɨ́ cáŋhɨ̀rí, ɗà nò ɓáŋnjɔ̧̀ kùb ɓa kwíìkɨ́niì a féìn, ye kɨ́ tɨ̀ nɨ sàr.

⁴Nɨ́ɨ́b lâs nɨ̀vɨ́tɨ̀b du ɗómnɨ, ɓe kɨ́ ŋgáb du pénɨ hȩ Mèín ndɨ́, ŋgə́ tɨ̀ nɨ ə́mnɨ̀r. Ŋgə́ ɓa tànɨ ní ndóóŋ nɨ́ɨ́b kɨ́ lâs á, há̧á̧ ŋgə́ a gɨ̀ɓàcéyè lénɨ Dúú jíri Mèèín no dùrénɨ ɗàá, ŋgə́ a tà ní nɨ̀mɨ́r ní Mèín á.

⁵Lə́əmcunáye, ɓwâ mɨ yi duye ɓe nyínè, mɨ yi tanahaá nyí àm kɨ́ ye?

⁶Nɨ́m mwi̧, nɨ́m duye hàrɨ̀kɨ́nɨ nɨ́ɨ́b kɨ́ ndɨ̀ŋ ɗàròò á ku, nyí ɗəəŋceé nɨ́m kɨ́. Nò ɓáŋnjɔ̧̀ rè tɨ̀ féínháce nɨ́ ɓwâ ya du ɓwánne.

⁷Ɨ́dù ɗàrò, nyòm ŋgéé du nɨ́ yo̧ó̧ rè á cɨ̀ nɨ ə́ré, nɨ́m mwi̧ nɨ́ɨ́b kɨ́ kwá ndɨŋhá bɨ́ ɓwâ nò duye ŋgə́ bɨ̀kɨ́niì kwá lɔ̧́kɨ́ré.

⁸Ɗà nò ɓáŋnjɔ̧̀ rè a fó̧gì laŋtɨ̧ɨ̧́. Yésù nò du Kékéé, ɓe fìí nó ɓɔ̧ne ɓa ŋgə́ kwíìkɨ́nɨ á, gùr mgbíhɨ́rí noò a ŋgírɨ̀kî nò ɓáŋnjɔ̧̀ kɨ́.

⁹Nò ɓáŋnjɔ̧̀ rè ɓa gònɨ ɓe nyòm Sátàìn á, ŋgə́ a gò ndɨ̀ŋnɨ nɨ́ɨ́b kàtɨ́b sɨ̀sɨ̀rí kàŋnì.

¹⁰Ŋgə́ ɓa ndɨ̀ŋnɨ kúúŋ ɓáŋhɨ́b lâs á, àm mbáŋhɨ nùb ɓa lɔ̧́nɨ àm ŋgáb ya du bɨ́ áwa Kìn Mèín ɓa ŋgáb ɓátɨ̀niì dù nɨ́m àmɨrìí.

¹¹Àm kɨ́ á Mèín tómwona ŋgáb nyòm ŋgáb ə́mnɨ nɨ́ɨ́b kàŋnì ɓa ŋgáb láàŋkɨ́niì ru.

¹²U̧nè á nùb lâs tɨ du bɨ́ Kìn àmɨrì ə́ə̀mwá, ŋgáb ɨ́ ɗúbɨ́ŋhȩ̀ bɨ́ ndɨ̧̀ɨ̧́ ɓáŋhɨ́nne, ŋgwìn Mèèín ɓa ŋgáb bìnɨ.

¹³Duú kɨ́ nɨ́mè, mwin yàá bɨ ə́mní, nyí nùb Kéké du ɗúniì, á ɗúnɨ nɨ́m sáktɨ̀ Mèín ɓwâ lâs ɓe ɨ́r nyínè, ɓetí, yànɨ yàllì, Mèín ya cacií nɨ́ nyí, àm nyí a kwà ɓə́r ɓe ɨ́r Nyéhè Sarîn du ndɨ̀ŋnɨ nyí ók ɓe Mèèín, ɓe ɨ́r ə́ə́m nyí ə́mnɨ Kìn àmɨrìí ɓwê.

¹⁴Ɓe ɨ́r ɓə́r kíì á ŋgə́ ɓé nyí ɓe Kìn Nyɔ̧ɔ̧́ nɨ́m yi tana nyínè ru, àm nyí a kwàɓwéhè mgbíí Yésù Krístùù nò du Kéké nɨ́mè.

¹⁵Hȩ dùnɨ u̧nèé, mwin yàá bɨ ə́mní, ə́əŋnáam kpéín, nyí a bɨ̀rékî tɔ̀ɔ́ nɨ́m yi na nyí, dùgɨ̀ ɓe ɓɔ̧, dùgɨ̀ káàtà̧à̧ rɨ ŋgwȩ́ȩ́.

¹⁶Yésù Krístù nò du Kéké nɨ́mè, ŋgə́ nɨ̀mɨ́r, ɓe Tá nɨ́mè Mèín nò ya ɗú nɨ́mè, ɓe ndɨ̀ŋnyàáŋ noò, ŋgə́ ya taamnaá nɨ́m njɔ̧̀ kɨ́ gwìí mwi̧í̧, ŋgə́ ɨ́ nàkwà nɨ́m gíí nyɔ̧ɔ̧́.

¹⁷Nɨ́m yóóŋ ŋgáb, ŋgáb nàɓà nyí njɔ̧̀ kɨ̀ɓá̧ní, ŋgáb nà nyí nyòm ndɨ̧̀ɨ̧́ nyɔ̧né, dùgɨ̀ nɨ́ɨ́b ndɨ̧ɨ̧́, dùgɨ̀ nyindí ɓɔ̧ne ya.