Read Vute 2 Nùb Tèsàlòníìk 3 Bible Online

2 Nùb Tèsàlòníìk 3 - Vute bible

2 Nùb Tèsàlòníìk 3

¹Kɨ́ cáŋhɨ̀rí, mwin yàá bɨ ə́mní, yóŋnàná nɨ́m Mèín àm àhèé Kìn Kékéé a gì tíí kɔ́klîn, Kìn kɨ́ a dùcè dɨɨ́m, hȩ ndɨŋɓwée mvókín nyínè rè u̧.

²Yóŋnáɓwê Mèín ŋgə́ céínhó̧ nɨ́m nùb ɓɨ́b ɓe nùb ɓáŋnjɔ̧̀ ŋgáré, ɓetí nɨ nùb lâs sé du ə́ə̀mnɨ Yésù.

³Ɨ́dù Kéké á jə̀ŋnɨ ɓwáár noò. Ŋgə́ ɓa nyí tààmnànɨ njɔ̧̀ á, ŋgə́ a gə́tè nyí ɓe Sátàìn.

⁴Kéké á ndɨ̀ŋnɨ nɨ́m sə̀ŋ gíí ɓe nyí, ɓetí nɨ́m nɨ́m ta nyí ndɨ̀ŋte, nyí á cè ndɨ̀ŋnɨ, nyí ɓace ndɨ̀ŋlɨ́ŋnɨ á.

⁵Kéké nà nyí kɨ̀cáàb nyí ɗəŋhɨ ɗûnɨ́m Mèèín ɓe jíhɨ́r Krístùù.

⁶Mwin yàá bɨ ə́mní, ɓe ɨ́r Yésù Krístù nò du Kékéé, nɨ́m tanaá nyí, nyí nɨ mwin yàá bɨ du bɨ́ dùnɨ ju nyȩhí, duɓwée bɨ́ jə̀ŋnɨ tɔ̀ɔ́ nɨ́m yi na nyínè ɗàwá rɨ só ɓérə̂r.

⁷Nyí nɨ̀miib nyí ɗəəŋtɨ́ i̧ á nyí fɨ́tɨ tùnɨ guur gùrí nɨ́mè, ɓetí ɓwâ nɨ́m yi du yɨ́ nyínè, nɨ́m yi nɨ́ dùwá ju nyȩhí.

⁸Nɨ́m yi nɨ́ ɓwèìtèènɨ nɨ́m yi du nɨ́m ɗúnàniì ɓweín ɗàà. Nɨ́m yi éíɓatɨ́ ə́rɨ́b, nɨ́m ɨ́ kwàɓà jábɨ́r cei. Nɨ́m yaá ə́nnɨ cɨ́ɨ́m ɓe mvihin cúk, àm mvókín nyínè no, ha̧á̧ nɨ́mè tɨ̀ lúuré nò kù yaà.

⁹Yaá ɗúmèɓànɨ nyí kpɔ́k nɨ́m, ɨ́dù nɨ́m yi ndɨŋ nɨ u̧ àm túumna nyí guur gùrí nyí ɓa tùniì á.

¹⁰Ɓetí ɓwâ nɨ́m yi du yɨ́ nyínè, nɨ́m yi tanahaá nyí: «Nò du nɨ́ ə́r ɗúwaá, ma nɨ cɔŋ tàŋcê» ye?

¹¹Nɨ́m nyinna nyí u̧ àm kùb tana nɨ́m ɨnayâna mvókín nyínè no, nùb kù á bɨ́ dùnɨ ju nyȩhí, nɨ́m ndɨŋndé ɗàà, sé lə́tèé àám nɨ́ kùbè noò rè á.

¹²Kúúŋ nùb u̧ kíì, ɓe ɨ́r Yésù Krístù nò du Kékéé, nɨ́m tanaá ŋgáb ɓe sóóŋ cúk ɨnè: «Ŋgáb éí ə́r ɗóóŋ, ɗà ŋgáb a kwà nɨ́m ŋgáb ɓáí nóò».

¹³Kɨ́ nyínè cè mwin yàá bɨ ə́mní, nyí nɨ yòr ɓe ndɨ̧̀ɨ̧́ nyɔ̧né.

¹⁴Nò kù ɨ́ dù nɨ́ jə̀ŋwá nɨ́ɨ́b nɨ́m ta káàtà rè noò, ləmnáam ŋgə́, nyí nɨ ju ɓe ŋgə́ ɓáhɨ̀r, àm sə̀ré a bì ŋgə́ ɓe nɨ́m ŋgə́ ndɨŋ kíì.

¹⁵Nɨ́m mwi̧ nyí nɨ ŋgə́ ɓə̀ndɨ̀r, ɨ́dù sóoŋnáam ŋgə́ hȩ mwin yàá.

¹⁶Mɨ yóóŋ Kéké nò du nànɨ ju ɗóóŋ, nà nyí ju ɗóóŋ kɨ́ ɓwâ lâs, dùgɨ̀ mvókín ŋgé no. Kéké dù ɓe nyí lâs.

¹⁷Mɨ Pôl, ɓe ŋgáár mɨ nɨ̀mɨ́rí á mɨ tɨinɓa káàtà rè ru. (U̧ á mɨ du sánnɨ káàtààb moò lâs, u̧ á mɨ duce tɨ̀nnɨ.)

¹⁸Mɨ yóóŋ Mèín ŋgə́ ndɨ̀ŋ Yésù Krístù nò du Kéké nɨ́mè nà nyí faám.