Read Vute 1 Tìmòtê 1 Bible Online

1 Tìmòtê 1 - Vute bible

1 Tìmòtê 1

¹Mɨ Pôl, mɨ nò Mèín nò du Tɨ́ɓə́r nɨ́mè, ɓe Yésù Krístù nò nɨ́m du sə̀ŋnɨ gíí ɓe kíí yi na nyòm sei nò Tómé, mɨ ɨ́ tɨin káàtà rè ru.

²Mɨ tɨnna Tìmòtê á, nò duɓa mwin ti mó Mèèín. Mɨ yóóŋ Mèín nò du Táà, ɓe Yésù Krístù nò du Kéké nɨ́mè, ŋgáb nà wu faám, ŋgáb ók wu mwàm, ŋgáb a nà wu ju ɗóóŋ.

³Hȩ mɨ yi tana wu mɨ a ə́lléce gwɨ̀ì Màsèduwáàn ndɨ, duhá wu Èfês ɓè. Nùb kù á Èfês ɓè du nànɨ tɔ̀ɔ́ bɨ kàŋnì, tanaɓam ŋgáb, kí ndúk.

⁴Tanaɓam ŋgáb, ŋgáb mbɨ́k àám kàŋnì, ɓe fà̧à̧nèé vùùm ɨ́ì tákɨ̀rɨ́bí du gèwònɨ mɨ̀sə̧̀ mí nó ɗàwáá ɗàrɨ́. Kí nɨ́ ndɨ̀ŋnɨ ɓwáár Mèín yi ɓwáí ɓátɨ̀nɨ nɨ̀vɨ́tɨ̀b ɓe ə́mnèé nɨ́m ə́mnɨ Yésù Krístù rɨ fó̧ hàrák ɗàà.

⁵Óo mɨ taá ŋgáb mbɨ́k nɨ́ɨ́b kɨ́, du àm nyí a dù ɓe ɗûnɨ́m sum mwi̧ mvókín nyínè no, nyí a dù ɓe njɔ̧̀ ca nɨ́m du ɗɨ́ɗɨ̧́ ɓe kɨ́ du ɗɨ́ɗɨ̧́ ɗàwáá, nyí a dùkwà ɓe ə́ə́m àmɨrì á.

⁶Nùb kù mbɨ́ɨ́ bɨ́ tɔ̀ɔ́ àmɨrì, ŋgáb ɨ́ lê bɨ́ mɨ̀sə̧̀ mí nó ɗàwáá no.

⁷Ɓe péín ɓíì Mèèín, ŋgáb á ɗúnɨ vúm yè duú tá tɔ̀hí bɨ, ɨ́dù, dùgɨ̀ nyindí ŋgáb nɨ̀miib ɓɔ̧ne, dùgɨ̀ sɨ̀ɨ̀ŋ nyindíí ŋgáb nomndé yá á àmɨɨr na rɨ, ŋgáb bɨ njàb kɨ́ ókcùɓàcéyènɨ ɗàà.

⁸Nɨ́m ɗəəŋtɨ́ ɓíì du nɨ́m nyɔ̧ɔ̧́ á, ɓè nɨ́m du ndɨ̀ŋnɨ nɨ́m du ɗúnɨ ndɨ̀ŋ ɓe kíí.

⁹Ɨ́dù nɨ́m ɗə̀ə̀ŋná ɨnè: kùb ya bɨ́ ɓíì nàwá ɓe ɨ́r nùb ɗɨ́ɗɨ̧́ɨ̧́, kùb ya na bɨ ɓíì ɓe ɨ́r nùb du ɓe ndɨ̀ŋɓáàŋ á. Nùb ŋgób ɓáŋhɨ́bí, nùb du sàkkɨ́nɨ Mèèín, cɨcóòm. Nùb du jə̀ŋnɨ dùgɨ̀ Mèín, dùgɨ̀ nɨ́m ók ɓe ŋgéé ɗàwáá. Nùb du kwíìnɨ tá ɓoò, kɨ́ kù yà ɓóò, nùb kwíhɨ nɨ̀rì.

¹⁰Nùb du ɓə̀nnɨ ɓíì ŋguŋnì, nɨ̀ŋgwáàb ndɨŋcu ŋguùŋ mvókín ŋgábè noò. Nùb du bììnɨ nɨ̀vɨ́tɨ̀b sə́rɨ̀cùnɨ hȩ mbɔ́klɨ́b lɨ. Tɨ́kàŋkáàŋ ɓe nùb du sàbnɨ sàáb kàŋnì, dùgɨ̀ nùb du ndɨ̀ŋnɨ nɨ́m du nɨ́ ɗóhîn ɓe tɔ̀ɔ́ àmɨrì ɗàwáá.

¹¹Nɨ́m du ɗóhîn ɓe Kìn Nyɔ̧ɔ̧́ du ɓe ɨ́r Mèín nɨ̀vɨ́tɨ̀b du mgbíìniì á kí. Mèín nò du ɗúnɨ ju nyɔ̧ɔ̧́ nɨ́mè rɨ yi naré mɨ Kìn kɨ́ ɓɔ̧ɔ̧ ru.

¹²Mɨ sáktií Yésù Krístù nò du Kéké nɨ́mè, ŋgə́ nò yúkle mɨ ɓe nyòm mɨ éí ə́r móò. Mɨ sáktií ŋgə́, ŋgə́ nò pə́ mɨ á ɗóhîn ɓe nò kùb səŋ gíí ɓe kíí, ŋgə́ ɨ́ cà mɨ, mɨ éínà níì.

¹³Dùgɨ̀ hȩ ɓwâ kù mɨ ya nyinɓáŋhɨ ɓe ɨ́r ŋgéé, mɨ ɨ́ jóktè ŋgə́ ɓe nyòmeè, Mèín óó nɨ́ mɨ mwàm ɓetí mɨ yi mɨ́ ɓe ə́ə́m ɗàwá, mɨ cè ɗə̀ə̀ŋwá nɨ́m mɨ yi du ndɨ̀ŋniì.

¹⁴Kéké nɨ́mè yi naɓatɨ́ mɨ ndɨ̀ŋnyàáŋ cei. Ɓe ju ɓaín mɨ du ɓe Yésù Krístùù á mɨ du kwànɨ nyòm ə́mní ɓe ɗûnɨ́m kùŋ mwin yàá ru.

¹⁵Nyindí gírí du ɗúnɨ nɨ̀vɨ́tɨ̀b lâs ə́ə̀mte á rè: Yésù Krístù yi go ɗɔ̀bín ɓátɨ̀nɨ cɨcóòm á. Vùùm cɨcóòm kíì, nò ɗóhe ɓe mé ɗàà,

¹⁶Àm kɨ́ á Mèín yi ók mɨ mwàm ndu. Mɨ nò du cɨcóm kàm jíri, mɨ ya á ŋgə́ ya ɗú Yésù Krístù túmnɨ̀ jíhɨ́r noò, àm a dùnà nùb kwá ə́mne ŋgə́ a kwà mè mɨ̀cɨ̧̀ɨ̧́ túúm.

¹⁷Mvèìn jíri du ŋgáŋnɨ kɨ́ gwìí mwi̧í̧, ŋgə́ nò du kúnɨ kú̧u̧ ɗàwáá, nò kùb du pénɨ ɗàwáá, ŋgə́ nò du Mèín mwi̧cááŋ, nɨ̀vɨ́tɨ̀b dɨ̀ɨ̀mlɨ́ŋ ŋgə́, ŋgáb a mgbíìlɨ̂ŋ ŋgə́ tɨ́k kɨ̀ tɨ́k Àmèn.

¹⁸Tìmòtê mwin ti móò, nɨ́m mɨ ta wu ndɨ̀ŋte, ɗóhîn ɓe nɨ́m tɨ́kɨ̀nɨ́b Mèèín yi nyinkɨ́yaye ɓe ɨ́r woò á kí. Nyindí kɨ́ ɓa wu tààmnànɨ njɔ̧̀ á, wu a lɨ̀ɨ̀ŋɓà mîn.

¹⁹Gə́tɨm ə́ə́m, wu a dù ɓe njɔ̧̀ ca nɨ́m du ɗɨ́ɗɨ̧́ ɓe kɨ́ du ɗɨ́ɗɨ̧́ ɗàwáá. Nùb kù yi mvúú bɨ́ tùnɨ njɔ̧̀ càá nɨ́mí ŋgábè, ə́ə́m ŋgábè ɨ́ ɓáàŋɓà sam.

²⁰Ìmènê ɓe Àlèksândɨ̀rə̀ mɨ yi gɔksokɨ́na Sátàìn[1] àm ŋgáb a dù bɨ́ ɨ́r Mèèín nyinɓáàŋcɨ̀re rɨ, ŋgáb á kpáín nùb kíì no.