Read Vute 1 Tìmòtê 2 Bible Online

1 Tìmòtê 2 - Vute bible

1 Tìmòtê 2

¹Tíí yàyè, ɓe ɨ́r nɨ̀vɨ́tɨ̀b lâs, mɨ taá kùb yóŋ Mèín, kùb a ɓwèì ŋgə́ ɓoré, kùb a yóŋɓà ŋgə́, kùb a sáktè ŋgə́.

²Á ɗúnɨ yóŋ ɓe ɨ́r mvènnɨ́b jííbí, a yôŋ ɓe ɨ́r nùb du ɓe nyòm kɨ́ɨ́ nɨ̀vɨ́tɨ̀bì, àm nɨ́m a dù ju ɗóóŋ, nɨ́m kù jábɨ nɨ́mè ɗàà, nɨ́m a dùɓà ju ɗɨ́ɗɨ̧́ Mèèín íhín, ju nɨ̀vɨ́tɨ̀b fɨ́tɨ nɨ́m jə̀ŋnɨ nokwe.

³Nɨ́m du hàrák, nyaŋce Mèín nò du Tɨ́ɓə́r nɨ́mè íhɨ́nné á kí,

⁴ŋgə́ á ɗúnɨ nɨ̀vɨ́tɨ̀b lâs ɗə̀ŋhɨ̀ Kìn àmɨɨr àm ŋgáb a kwà ɓə́rì,

⁵ɓetí Mèín á há nɨ mwi̧ ndúk, nò nyaaŋcu Mèín ɓe nɨ̀vɨ́tɨ̀bì á cè nɨ́ mwi̧ ndúk, nò kɨ́ Yésù Krístù á,

⁶ŋgə́ nò ya nakɨ́ mè ŋgə́ nɨ̀mɨ́rí àm céín nùb lâs. Ŋgə́ ndɨŋɗóoréé nɨ́m kɨ́ ɓwâ Mèín ya ɓwállé, àm túmnɨ ɨnayâna Mèín á ɗúnɨ nɨ̀vɨ́tɨ̀b lâs ɓáte.

⁷Àm kɨ́ á Mèín ya ca mɨ, mɨ dù nò Tómé, ŋgə́ ɨ́ nàrê mɨ Kìn Nyɔ̧ɔ̧́ ɓɔ̧ɔ̧, mɨ gɨ̀ tɔ̀ɔ̀nànɨ nùb du Jwîf séé nyindí du ŋgèrɨ̀nɨ ə́ə́m ɓe Kìn Nyɔ̧né ru. Mɨ mɨ kààŋ kàŋwá, mɨ taɓa mɨ àmɨɨr á.

⁸Mɨ á ɗúnɨ yɨ́ lâs nɨ̀ŋgwáàb du Mèín yóŋniì, ŋgáb yóŋɓà ɓe sum sarîn, njù̧ sumí ɗàà, dùgɨ̀ mɨ̀lə́m mɨ̀ndárèé.

⁹Mɨ á ɗúɓwênɨ nɨ̀gub lə́ɓà júk hàrák, fɨ́tîn ɓe ŋgáb, nɨ júk kùb yetɨ ŋgáb noò dùr. Bɨ́rèé ŋgwéé ŋgábè dùhá nɨ kɨ́ du kə́sə́k lɨ́, nɨ kɨ́ du ɓí rɨ́ dùr. Nɨ́ɨ́b lééb ŋgábè nɨ kɨ́b kùb nyaŋhɨ ɓe gôl, kɨ́ kù njàráàb lɨ dùr, ŋgáb cè bɨ́ júúb kàtɨ́b mònɨ̀bì lə̂r.

¹⁰Ɨ́dù ɗú ŋgáb túmnɨ̀ nyààŋ ŋgábè nɨ́ɨ́b ndɨ̧ɨ̧́ ŋgábè ya á, kí ɨ́ du fɨ́tîn ɓe nɨ̀gub ta vúm á jə̀ŋnɨ Mèín ndɨ́.

¹¹Á ɗúnɨ nɨ̀gub ók tɔ̀ɔ́ néín, ɓe jɨ̧ cúk.

¹²Nɨ̀gwi dùhá nɨ néín, mɨ ə́ə̀mwá ŋgə́ éíwú nɨ̀ŋgwábì tíí nànɨ tɔ̀ɔ́, kɨ́ kù nànɨ ɓíì.

¹³Mèín ya nyaaŋyaye nɨ Àdâm á, ɨ́ tùrégì Évà.

¹⁴Évà yi mbɨ́k nɨ́ Sátàìn mbáŋhɨ̀ ní ru, ŋgə́ ɨ́ ɓèì ɓíì Mèèín. Yi nɨ́ Àdâm sé.

¹⁵Ɨ́dù nɨ̀gub kwá ɓáí ɓe fènné muní, ɓè ŋgáb ə́əŋɓa kpéín ə́ə́m ŋgábè no, ŋgáb a dù ɓe ɗûnɨ́m, ŋgáb a dùkwà ɗɨ́ɗɨ̧́ Mèèín íhɨ́nné. Ŋgáb bɨ nùb kùb yetɨré dùr.