Read Vute 1 Tìmòtê 4 Bible Online

1 Tìmòtê 4 - Vute bible

1 Tìmòtê 4

¹Nyéhè Sarîn wáaɓatɨ́ ɨnè: jíìb cáŋhɨ̀rí no, nùb kù ɓa mbɨ́ɨ́nɨ ə́ə́m ɓóò á, ŋgáb a jə̀ŋ nyéhɨ̀b ɓáŋhɨ́b du ŋgáb mbáàŋniì, ɓe tɔ̀ɔ́ nɨ̀wàtɨ̀b du ŋgáb nàniì.

²Ŋgáb ɓa mbɨ́ɨ́nɨ mɨ̀yooɗíím ɓe tɨ́kàŋkáàŋ du bɨ́ njɔ̧̀ kúri hȩ kùb tɨ njɨkɨ́ nji̧í̧ ɓe tú̧ fó̧ wa̧né rɨ mbáàŋ ŋgáb á.

³Nùb kɨ́ á tɔ̀ɔ̀nɨ ɨnayâna gùúm nɨ nyɔ̧ɔ̧́ ɗàà, nɨ ɗúcéwa kùb tàŋ cɔŋ bɨ kù. Ɨ́dù Mèín ya nyaaŋ nɨ nɨ́ɨ́b kɨ́ àm nùb ə́mní ɗəŋhȩ Kìn àmɨrìí a tàŋ cùr ŋgáb sáktɨye ŋgéé á.

⁴Nɨ́m Mèín nyaaŋndé lâs á nyɔ̧ɔ̧́, nɨ́m kù kùb leekɨ́ré nɨ ɗàà, ɨ́dù á ɗúnɨ kùb gàm nɨ́ɨ́b lâs kùb a sáktɨce Mèín,

⁵ɓetí Kìn Mèèín ɓe mɨ̀yú̧ á sàtɨ̀kɨ́nɨ nɨ́ɨ́b kɨ́ Mèèín íhín.

⁶Wu ɨ́ tànà mwin yàá bɨ ə́mní nɨ́ɨ́b kɨ́, wu ɓa dùnɨ nò ə́ré nyɔ̧ɔ̧́ Yésù Krístùù á. Wu ɓa túùmnɨ ɨnayâna nyòm wu du ɓe kí jɨ̀r Mèèín noò du nɨ ɓe Kìn Mèèín ɨ́ tɔ̀ɔ́ àmɨrì wu ya óklé á.

⁷Ɨ́dù, du nɨ́ kɨ́ àám kàŋnì ɓe tàtùùb múkwííbí rɨ, mbɨ́k wu kí, lɨɨŋhá wu dùnɨ ju du túùmnɨ jə̧̀ə̧́ Mèèín.

⁸Lùú kùb du lùnɨ nààmnɨ ju̧ àm síí a dù wááŋ ndɨ du nɨ́m nyɔ̧ɔ̧́ á, ɨ́dù, du nɨ ɓe ɨ́r nɨ́m bɨ̀ɨ̀r no ɗàwáá á. Nɨ́m mwi̧, ju ɓaín ɓe Mèèín du nɨ́m nyɔ̧ɔ̧́ á, ju kɨ́ á ɓe bɨ̀ɨ̀r ɓe ɨ́r nɨ́ɨ́b lâs, ɓetí, dùgɨ̀ ɗàrò, dùgɨ̀ cɨ́m yȩné, wu á kwànɨ mè Mèín ya ɓwállé.

⁹Nyindí gírí du ɗúnɨ nɨ̀vɨ́tɨ̀b lâs ə́ə̀mte á kí.

¹⁰Ɓe ɨ́r mè kíì, nɨ́m á ə́nnɨ, nɨ́m a lɨɨŋce, ɓetí nɨ́m səŋtɨ́ gíí ɓe Mèín nò du Tɨ́ɓə́r nɨ̀vɨ́tɨ̀b lâs, nùb kù cóóŋ sé nùb du ŋgə́ ə́ə̀mniì.

¹¹Nɨ́m du ɗúnɨ wu tàtɨ, wu a tɔ̀hèé á kí.

¹²Wu mbɨ́kwa nò kù pə́tə̀ə̀ŋkɨ́ wu àm wu duye wú wàánjíí. Ɨ́dù, dunam nùb ə́mní túúm nyindí wó ɓɔ̧ne ya, ɗɨ́m juu woò no, ɗûnɨ́m wóò no, dùgɨ̀ ə́ə́m wóò no, wu wu nɨ́m yɨ̀tíí kù ndɨ̀ŋ.

¹³Ɓwâ wu duye mɨ móŋkɨ́nɨ rè, kɨ́kléɓam ŋgwé fànné káàtà Mèèín mɨ̀kùnɨ́nné no, wu a tànyàŋhȩ̀ njàb no kwe, wu a tɔ̀hè.

¹⁴Nyər Nyéhè Sarîn yi naré wu só ɓwâ Tɨ́kɨ̀nɨ́b Mèèín yi nyin, ɗà kɨ̀jííb ɨ́ hèìwû wu ŋgáár ŋgwéé rɨ, wu mbɨ́kwa ɓáàŋnɨ.

¹⁵Éínyaaŋɓam éí kɨ́ mîn, wu a kɨ́klê ŋgwé nó, àm nùb lâs a pê hȩ nɨ́ɨ́b wu du ndɨ̀ŋniì du gìnɨ tíí.

¹⁶Gə́tɨm síí wu nɨ̀mɨ́rí, wu a gə́tɨ̀ɓwê tɔ̀ɔ́ wu du nàniì. Ə́əŋndéɓam kpéín nɨ́ɨ́b kɨ́ no, ɓetí óo wu ndɨŋtɨ́ u̧, wu ɓa ɓátɨ̀nɨ síí wu nɨ̀mɨ́rí á, wu a ɓátɨ̀ɓwê nùb du wu ókniì.