Read Vute 1 Tìmòtê 5 Bible Online

1 Tìmòtê 5 - Vute bible

1 Tìmòtê 5

¹Wu wu túkúr ɓe ɓéín cúk mɨ̀kùnín yètɨ̀r, nyinnam ŋgə́ hȩ wu nyinna tá woò. Áam wàánjííb hȩ mwin yàáb woò.

²Wu a â kɨ̀jííb nɨ̀gubì hȩ yàáb woò. Mɨkóómɨb cè, wu wu kɨ̀cáàb kù sumí dùr ɓe ŋgáb, á há wu ŋgáb hȩ mȩȩ́gwi̧nɨ́b woò.

³Mámkwííb du ɓe nò ŋgáb səŋ gíí ɓe kíí ɗàà rɨ, gə́tɨm ŋgáb ɓe jɨ̧.

⁴Ɨ́dù, mámkúb kù ɨ́ dù ɓe munɨ́b, kɨ́ kù nyȩrɨ́b, á ɗúnɨ munɨ́b kɨ́ ɓe nyȩrɨ́b kɨ́ túùmyàyè ə́ə́m ŋgábè gbàŋ ŋgáb nɨ̀mibi ya, kpɔ́kcùcénɨ tá bi ɓe yà bí, kɨ́ kù tákɨ̀r ŋgábè ɓe yàkɨ̀r ŋgábè. Nɨ́m du hàrák Mèèín íhɨ́nné á kí.

⁵Mámkúb àmɨrì du ɓe nò kpɔ́k ŋgéé ɗàà rɨ səŋtɨ́ nɨ́ gíí noò ɓe Mèín. Cɨ́m ɓe mvii cúk, ŋgə́ cè nɨ́ ùwèènɨ yô̧ Mèín ŋgə́ kpɔ́k ní na ɗàà.

⁶Mámkúb du nɨ́, ŋgə́ lə́əmhó̧ɗóohá ce nɨ́ nyɔ̧ɔ̧́ ŋgə́ nɨ̀mɨ́rí, ŋgə́ nɨ́ kɨ́ kùbè lə́mnɨ̀r lɨ, njɔ̧̀ noò á nɨ́ kúri, dugií hȩ ŋgə́ duye jááŋ.

⁷Nɨ́m du ɗúnɨ wu tànà ŋgábè á kí, àm ŋgáb tɨ̀ du ɓe nɨ́m kùb yetɨ ŋgáb noò.

⁸Nɨ̀vɨ́tè ɨ́ dù nɨ́ nùb no gbàŋné ɓɔ̧ɔ̧ árénɨ ɗàà, dùɓàgɨ̀yè nùb no yóò rɨ, kí du ŋgə́ mbɨ́ɨ́ nɨ́ ə́ə́m nóò yáá na á. Ɗɨ́m nóò a ɓáàŋɓàgì a ndôŋ kɨ́ nò du ɓe ə́ə́m ɗàwáá.

⁹Jɔ̀sé mámkúb dáín noò aaŋcɨ vii taarɨ́b lɨ á wu ɓa kɨ́klénɨ kpáín mámkwíbí no. Mámkúb kɨ́ dùhá nò ŋgwáá yȩné noò yi kúmbɨ́kkɨ́soré.

¹⁰Ŋgə́ dù nò kùb ɗəəŋɓa nɨ́ɨ́b nyɔ̧ɔ̧́ ŋgə́ yi ndɨŋndé, hȩ: gə́tɨ̀nyàŋhȩ̀ȩ́ munɨ́b noò, gàmé nùb go ŋgə́ péniì sàksàk, nàtɨ̀nàá nùb gbàŋ Mèèín gurùbì,[4] kpɔ̂ɔ́ nùb mwàmí, ndɨ̧̀ɨ̧́ nɨ́ɨ́b du nyɔ̧né lâs.

¹¹Ɨ́dù kpáb, mámkwííb duye bɨ́ mɨkóóme rɨ, wu wu ŋgáb kpánȩ́ȩ́ kɨ́klə̂r, ɓetí ɓwâ njɔ̧̀ ɓùcùú gùmní ɓa ŋgáb yínɨ rɨ, ŋgáb ɓa bɨ mbɨ́ɨ́nɨ Krístù á.

¹²Ŋgù̧ú̧ a tì bì nɨ́ ŋgáb, àm ŋgáb ɓáaŋkɨ́ ɓɔ̧ ŋgáb yi guna Krístùù,

¹³gwàcé, hȩ nɨ́m ŋgáb ndɨŋndé du ɗàwáá, ŋgáb a dù lə́ dúú rɨ́ no, lə́ndóŋ kɨ́ rɨ no. Nɨ́m duɓagɨ ɓíí á, ŋgáb a â tàtùùb ŋgáb a kɨ̂ tíí, àm ɓɔ̧ɔ̧ gwínhô̧, nɨ́m du ŋgáb góòmnɨ ɗàwáá, ŋgáb á nó.

¹⁴Àm kɨ́ á mɨ ɗú mɨ́, mámkwííb duye bɨ́ mɨkóómɨb lɨ, ŋgáb ɓùcù bɨ gùúm, ŋgáb a fò̧nè munɨ́b, ŋgáb a gə́tè dúú ŋgábè, àm ŋgáb tɨ̀ mbɨ́knaɓaye nùb ɓi̧ní nɨ́mè mvókín ti ŋgáb nyinɓáŋhɨ ɓe ɨ́r nɨ́mè.

¹⁵Ɓetí mámkwííb kù mbɨ́kcií bɨ́ jɨ̀r ɗɨ́ɗɨ̧́ àm tu bɨ́ Sátààìn.

¹⁶Ɨ́dù, nɨ̀gwi ə́mní kù ɨ́ dù ɓe mámkúb kù no gbàáŋ, ɗú ŋgə́ kpɔ́k ŋgə́ á, ŋgə́ nɨ́ mɨ̀kwìn nùb ə́mní ha̧á̧ kɨ́ nàr, àm mɨ̀kwìn nùb ə́mní a kwàcè mvókín kpɔ́k mámkwííb duɓa ɓe nùb kpɔ́k ŋgábè ɗàà rɨ.

¹⁷Kɨ̀jííb du gèɓànɨ mɨ̀kwìn nùb ə́mní nyɔ̧ɔ̧́ rɨ, á ɗúnɨ kùb pə́ ŋgáb ɗóhîn ɓe nùb kùb fɨ́tɨ dɨ̀ɨ̀mnɨ, kùb a nà lɔ̀ɔ́ ə́ré, nùb kù cóóŋ sé nùb du ɓéènɨ a tɔɔce àm Mèèín ndɨ.

¹⁸Káàtà Mèèín á wáàɓàcéyènɨ ɨnè: «Ndèìn du ə́ré rɨ, nyí nɨ ŋgə́ kpááŋ ɓɔ̧ɔ̧ lə́rə́kɨ́nàr», «Kùb nàhá bɨ nò ə́ré lɔ̀ɔ́ nóò.»

¹⁹Kùb ɨ́ nyìnwû kɨ̀jíri kù nyindí só, wu wu ə́mnɨ̀r, sé ɓè mɨ̀námé àm kíì du bɨrɨ́b kɨ́ kù taarɨ́bí.

²⁰Nùb du gìnɨ tíí ɓe ndɨ̧̀ɨ̧́ cumí, yetɨɓam ŋgáb mɨ̀kùnín, àm vùù a bì nùb meré.

²¹Ndɨŋnam nɨ̀vɨ́tɨ̀b lâs nɨ́ɨ́b kɨ́ hàrák, wu gɔ̀ nó kɨ́kléwa, ɓe ɨ́r Mèèín, ɓe ɨ́r Yésù Krístùù, ɓe ɨ́r dùgallɨb sarɨ́bí á mɨ nyinna wu ru, jəŋɓam sóóŋ kɨ́.

²²Wu wu nò kù ŋgáár ŋgwéé u̧ kɔ́klîn hèìwû, ɗòbnɨ ŋgə́ ə́r dúú ə́mní no, wu wu cum nɨ́ kùbè no lə̂r, gə́tɨ wu síí wóò járkɨ́ták.

²³Wu wu mvúm mèìɗóhɨ̀r, meiɓwéehá wu súm ti ŋgób àm tób wó ɗàríì, ɓetí ɓur á wu jáàblɨ́ŋnɨ.

²⁴Nùb kù á ndɨ̀ŋɓànɨ cum ɓóò laŋtɨ̧ɨ̧́ kùb a pê, kùb ma àm kɨ́ ŋgwìnyèwá. Nùb kù cè, ŋgáb ndɨŋtɨ́ lâs, àm kɨ́ a vììgì cùrì.

²⁵Nɨ́ɨ́b nyɔ̧ɔ̧́ kùb ndɨŋndé, kùb á pə́ɓwênɨ laŋtɨ̧ɨ̧́, dùgɨ̀ kɨ́b du sàmàìn kùb pə́ ɓè mu̧u̧ ɗàwáá, tɨ̀ bɨ yoó mè.