Read Vute 1 Tìmòtê 6 Bible Online

1 Tìmòtê 6 - Vute bible

1 Tìmòtê 6

¹Nùb du mbɔ́klɨ́bí lâs pə́ɓà tá ɓo mbɔ́klí ɗóhîn ɓe nùb kùb jəŋndé, àm nò kù tɨ̀ nyinɓáŋhɨ ɓe ɨ́r Mèèín, dùgɨ̀ ɓe ɨ́r tɔ̀ɔ́ nɨ́mè.

²Nùb tá ɓo mbɔ́klí duce nùb ə́mní rɨ nɨ tá ɓo mbɔ́klí kɨ́ pə́jààŋkɨ̂r àm ŋgáb du bɨ́ mwin yàá ɓo ə́mní. Ɗúɓacéye ŋgáb ə́nnà ŋgáb mîn á, ɓetí nùb du kwàhó̧nɨ nyɔ̧ɔ̧́ ə́r ŋgábè kɨ́ nokwe du mwin yàá bɨ ə́mní Mèín ɗúré á. Nɨ́m du ɗúnɨ wu tɔ̀ɔ̀tɨ wu a ɓéhèé á kí.

³Nò kù ɨ́ dù nànɨ tɔ̀ɔ́ kum, ŋgə́ ɨ́ dù nɨ́ ə́ə̀mnɨ Kìn àmɨrì Yésù Krístù nò du Kéké nɨ́mè, dùgɨ̀ tɔ̀ɔ́ du ɗóhîn ɓe ə́ə́m nɨ́mè ɗàà,

⁴ŋgə́ wútɨɓa síí sam á, ŋgə́ nɨ nɨ́m kù ɗə̀ə̀ŋwá. Ŋgə́ nɨ́ kɨ̀cáàb hàrák ɗàà, sé mɨ̀sə̧̀ə̧́ ɓe mɨ̀ndárɨ̀b ɓe ɨ́r sɨ̀ɨ̀ŋ nyindíí. Ɓè á ɓi̧í̧, mɨ̀ndárɨ̀b, nyèìn, lə́ə̀mɓáŋhȩ̀ȩ́ ɓe ɨ́r kùùŋ ŋgwé yá ɗàwáá,

⁵ɓe mɨ̀sə̧̀ə̧́ cɔ̧́ɔ̧ cɔ̧́re mvókín nùb ŋgwé ŋgáré ɗàwá, du bɨ́ àmɨɨr ɗə̀ə̀ŋcɨ̀wáá du gònɨ. Ŋgáb á bɨ́ lə́ə̀mnɨ tùú jɨ̀r Mèèín du nɨ yɨ́ kùb sai ɓe njɔdìì á.

⁶Á mè u̧, tùú jɨ̀r Mèèín duna nɨ̀vɨ́tè njɔdì jíri á, ɓè ŋgə́ ók mɨ̀tù ɓe kɨ́ du ŋgéé ŋgáréè.

⁷Ɓetí nɨ́m ya nɨ́ ɗɔ̀bín hò̧ nɨ́m kù ŋgáré gèwòwá, nɨ́m tɨ̀ nɨ nɨ́m kù ŋgáré gècùcê.

⁸Nɨ́m ɨ́ dù nɨ́ ɓe cɔŋ, ɓe júk, ɗóotɨ́ nɨ́ á.

⁹Ɨ́dù nùb du ɗúnɨ kwànɨ njɔdìì á gùrénɨ kɨhɨri, ŋgáb bií bɨ́ ndɔ̀k ɓáŋhɨ́b du ɓáàŋkɨ́kɔ́ɔ̀nɨ nɨ̀vɨ́tè ŋgə́ a lɔ̧̂ kə́sə́ə́ no.

¹⁰Ɓetí ɗûnɨ́m mònéè á gèwònɨ kúúŋ ɓáŋhɨ́bí lâs. Nùb kù yi ɗúú vúm dùɓà ɓe mòné, ŋgáb ɨ́ fòb bɨ́ jɨ̀r ə́mní, ɗà ɨ́ ɓállè nɨ́ mè ɓoò ɓe yíìnɨ́m.

¹¹Ɨ́dù kɨ́ wu nò Mèèín, hək wu nɨ́ɨ́b kɨ́ lâs. Máhá wu dùnɨ ju ɗɨ́ɗɨ̧́, ju ɓaín ɓe Mèèín, sə̧̀ə̧́ gíí ɓe Mèèín, ju ɗûnɨ́mí, wu a dù ɓe jíhɨ́r, wu a dùkwà ɓe ɗɨ́m kerîn.

¹²Lɨŋɓam lɨɨŋ ə́mní mîn, wu a kwà mè mɨ̀cɨ̧̀, ɓetí Mèín ya ɓétɨ́ wu ɓe ɨ́r mè kíì ɓwâ wu ya wáahó̧ɓa nyààŋ kàm nyindí ə́mní wo ɓɔ̧ɔ̧ mɨ̀kwìn nùb yi du mɨ̀náméé tíí rɨ.

¹³Ɓe ɨ́r Mèín nò du nànɨ nɨ́ɨ́b lâs mèè, ɓe ɨ́r Yésù Krístù nò ya wáahó̧ɓa nyààŋ kàm nyindí ə́mní no ɓɔ̧ɔ̧ Póŋsə́ Pìlât tíí, mɨ tanaá wu ɨnè:

¹⁴Jəŋɓam nɨ́m mɨ ta wu ndɨ̀ŋte hàrák, há̧á̧ hȩ Yésù Krístù nò du Kéké nɨ́mè kwá cuworé, àm nùb kù tɨ̀ yetɨ wé.

¹⁵Mèín, ŋgə́ mwi̧, ŋgə́ nò du kɨ́ɨ́nɨ nɨ́ɨ́b lâs. Ŋgə́ nò du Mvèìn ndóŋ kùb mvènnɨ́bí, ŋgə́ nò nyɔ̧ɔ̧́ lâs ɗoŋwo yá kwe, Kéké kùb kékébí, ŋgə́ ɨ́ du nò ɓa ndɨ̀ŋnɨ Krístù cùwò ɓwâ ya du ɓwánne ru.

¹⁶Ŋgə́ nɨ́ kúnɨ kú̧u̧ ɗàà, mwa yɨ́ ŋgə́ du dùniì sàmàìn nò kù ŋgóoblésoré ɗàà. Nò kù nɨ ŋgə́ pə́kɨ́yèwá, nò kù sàmàìn pə́ce nɨ́ ŋgéé ɗàà. Nyòm mɨ̀cɨ̧̀ ɓe dɨmɨɨr ók ɓe ŋgə́! Àmèn.

¹⁷Tanaɓam nùb du ɓe njɔdì ɗɔ̀bɨ́nné ŋgáb bɨ síí wútɨ̀r; tanam ŋgáb, ŋgáb bɨ njɔ̧̀ ŋgábè njɔdɨ̀b du nànɨ nɨ́m kù ɗàwáá ya kɨ̂, ŋgáb sə̀ŋbɨ̂ŋ gíí ɓe Mèín nò du nɨ́m nànɨ njɔdì nɨ́m ók mɨ̀tù ɓe kíí.

¹⁸Tanam ŋgáb ŋgáb ndɨ̀ŋ nyɔ̧ɔ̧́, njɔdì ŋgábè dù ndɨ̧̀ɨ̧́ nyɔ̧né, ŋgáb dù sàksàk, ŋgáb a dù kə́sə́k kpɔ́knɨ nɨ̀vɨ́tɨ̀b.

¹⁹Ɓe ndɨ̧̀ɨ̧́ u̧nè kɨ́, njɔdì nyɔ̧ɔ̧́, duce yə̀ŋniì á ŋgáb du ɓáànɨ ɓe ɨ́r cɨ́m yȩné, àm ŋgáb a kwà mè àmɨrì ru.

²⁰Tìmòtê ti móò, gə́tɨɓam Kìn Nyɔ̧ɔ̧́ Mèín naré wu ɓɔ̧ɔ̧ ɗàrɨ́. Həkɓa wu tàtùùb ɓe àám kàŋnì, dùgɨ̀ kɨ̀cáàb nɨ̀vɨ́tɨ̀b du bɨ́ lə́ə̀mnɨ á nɨ́ àmɨɨr lɨ.

²¹Nùb kù ya fobtɨ́ bɨ́ jɨ̀r Mèèín àm ŋgáb ya ta vúm á bɨ́ ɓe kɨ̀cáàb kíì. Mɨ yóóŋ Mèín ŋgə́ fàm nyí.