Read Vute 2 Tìmòtê 1 Bible Online

2 Tìmòtê 1 - Vute bible

2 Tìmòtê 1

¹Mɨ Pôl, nò Mèín ɗú dù nò tómé Yésù Krístùù, àm ta kìn mèè ŋgə́ ya ɓwáí ɓe ɨ́r ju ɓaín ɓe Yésù Krístùù, mɨ ɨ́ tɨin káàtà rè ru.

²Mɨ tɨnna mwin ti móò Tìmòtê á. Mɨ yóóŋ Mèín nò du Táà ɓe Yésù Krístù nò du Kéké nɨ́mè ŋgáb nà wu faám ɓe ju ɗóóŋ, ŋgáb ók wu mwàm.

³Mɨ sáktií Mèín nò mɨ du éínànɨ ɓe njɔ̧̀ ɗàá fàb hȩ tákɨ̀rɨ́b moò ya ndɨŋndé. Mɨ á sáktɨ̀nɨ Mèín cɨ́m ɓe mvii cúk. Ɓwâ lâs mɨ du ŋgə́ yóŋniì, mɨ á wu lə́ə̀mnɨ.

⁴Mɨ á lə́ə̀mcùnɨ hȩ wu ya kɨ́í ɓwâ nɨ́me wu ya du gɔ̀ɔ̀niì. Mɨ á cè ɗúɓànɨ wu pə́cùnɨ, àm mɨ a dù yúklîn ɓe mɨ̀tùú.

⁵Mɨ á lə́ə̀mcùnɨ ə́ə́m àmɨrì wu du ɓe kíí. Ə́ə́m kɨ́, yàkɨ̀r wóò Lòyîs ɓe yà wóò ƏÈnîs ya ɨ́ duyaye ɓe kí ru. Mɨ ɗəəŋtɨ́ wu á ɓwê ɓe ə́ə́m kɨ́.

⁶Àm kɨ́ á mɨ lə́əmcuna wu ɨnè: nyər Mèín yi na wu ɓwâ mɨ ya kɨ́kwú wu ŋgáár ŋgwéé rɨ, gə́tɨɓam nyər kɨ́ jáŋ.

⁷Ɓetí Nyéhè Mèín yi na nɨ́m ndè nɨ Nyéhè nɨ́m du vùvúbì sé, Nyéhè kɨ́ naɓacéye nɨ nɨ́m kɨ̀ɓá̧á̧, ɗûnɨ́m ɓe bìí múb síhé á.

⁸Wu wu sə̀ré ô ə́ə̀ŋnànɨ Kéké nɨ́mè mɨ̀námé; wu wu sə̀ré ókɓwêcée àm mɨ du nìrì. Ɓe ɨ́r Kìn Nyɔ̧né, pə́ɓwéhɨm jábɨ́r hȩ mɨ du péniì ɓe nyòm Mèín na wé.

⁹Ŋgə́ yi ɨ́ ɓátɨ nɨ́m ndu, ŋgə́ ɨ́ ɓê nɨ́m, nɨ́m dù gbàŋ noò. Yi nɨ́ ɓe àm nɨ́m yi ndɨŋ nɨ́ɨ́b nyɔ̧né sé, ɨ́dù yi du nɨ ɓe ndɨ̀ŋnyàáŋ noò á, ɗóhîn ɓe ɓwáár ŋgə́ ya ɓwállé. Ŋgə́ yi ə́əmnaɓa nɨ nɨ́m ndɨ̀ŋnyàáŋ ɓe ɨ́r Yésù Krístùù kɨ́ yàwòó yàllì á.

¹⁰Ɗàrò, ŋgə́ túumnagií nɨ́m ɓwáár kɨ́ ɓe fin Yésù Krístù tɨ́céín nɨ́mè. Ɓetí Yésù Krístù cáaŋkíí nyòm cwéé. Ɓe nyòm Kìn Nyɔ̧né á cè ŋgə́ túumna nɨ́m mè mɨ̀cɨ̧̀ ru.

¹¹Ɓe ɨ́r Kìn Nyɔ̧né kɨ́ á Mèín ya ca mɨ, mɨ dù tɨ́kìn, nò tómé ɓe tá tɔ̀hí ru.

¹²Ɓe àm kɨ́ á cè mɨ du pénɨ jábɨ́r lè ru. Ɨ́dù mɨ mɨ ónɨ sə̀ré ɗàà, ɓetí mɨ ɗəəŋtɨ́ nò mɨ du sə̀ŋnɨ gíí ɓe kíí. Ɓetí mɨ ɗəəŋtɨ́ ŋgə́ á ɓe nyòm gə́tɨ nɨ́m ŋgə́ ya ə́əmna mé há̧á̧ ye ŋgwìn jírií.

¹³Áam hȩ túúm àm àmɨɨr mɨ ya tana wé. Ə́ə́m wu ə́mne Yésùù ɓe ɗûú wu ɗú kùŋ mwin yàá rɨ, ə́əŋɓam kpéín nɨ́ɨ́b kɨ́ no ɓe nyòm Yésù Krístù du nàniì.

¹⁴Gə́tɨm tɔ̀ɔ́ nyɔ̧ɔ̧́ kùb yi na wu ɓe ɨ́r Nyéhè Sarîn du nɨ́mè só rè rɨ.

¹⁵Hȩ wu ɗəŋhȩ ɗàrɨ́, nùb ɗɔ̀ɔ́b Àsíì lâs lumbɨ́ɨ́ bɨ́ mɨ, Fìjêl ɓe Hèèrmòjên á kpáín kɨ́ no.

¹⁶Mɨ yóóŋ Mèín, ŋgə́ túùmnà nùb Ònèsìfóòr yóò nyàŋnjɔ̧̀ noò, ɓetí Ònèsìfóòr yaá mɨ tààmnàlɨ́ŋnɨ njɔ̧̀, ŋgə́ ya nɨ́ ónɨ sə̀ré àm mɨ du nìrì ɗàà.

¹⁷Ɓwâ ŋgə́ yi féínɓacéye Róòm, ŋgə́ yi máɓatɨ́ mɨ há̧á̧ ŋgə́ ɨ́ gì mɨ kwànɨ.

¹⁸Mɨ yóŋtɨ́ Yésù nò du Kékéé ɓwèì Mèín túùmnà ŋgə́ nyàŋnjɔ̧̀ noò ye cáŋhɨ̀rí. Wu ɗəəŋɓatɨ́ mîn kpɔ̂ ŋgə́ kpɔ́k mɨ mɨ a cè Èféès.