Read Vute 2 Tìmòtê 2 Bible Online

2 Tìmòtê 2 - Vute bible

2 Tìmòtê 2

¹Kɨ́ woò cè, mwin ti móò, máhá wu ɗûnɨ́m Yésù Krístùù tààmnà wu njɔ̧̀.

²Nɨ́m wu ya ók mɨ tànɨ mɨ̀námé ví̧i̧ acè ɗàá rɨ, tanam nùb wu pə́ du ɓe jɨ̧, duce sàmàìn tɔɔndóŋnaɓwéece nùb tíí àm kɨ́ jɨ́k lɨ.

³Hȩ wu dùnɨ nò tu Yésù Krístù ɓe jɨ̧ cúk hȩ sójàà, pə́ɓwéhɨm jábɨ́r hȩ nùb kù yi pə́ré.

⁴Sójà ɗú nànɨ nò kɨ́k ŋgéé mɨ̀tùú nɨ mbɨ́knɨ ə́r sójàà noò ŋgə́ a gì ə́rɨ́b saibi ɗàà.

⁵Nò lu lùhí gamhá nɨ́ lɔ̀ɔ́ nóò ɓè ŋgə́ jəŋ ɓíhɨ̀b lùú kíì.

⁶Tɨ́ɗèìn tɨ ndáŋ ɗȩ̀hí̧ ɨ́ du nò áyaye nɨ́m fó̧ mwa̧né ru.

⁷Lə́əmye nɨ́m mɨ tana wu rè, ɓàcéyè Kéké ɓa wu nànɨ nyòm wu ók njàb kíì á.

⁸Lə́əmcuye Yésù Krístù, Mèín ya səəmcuhó̧ó̧ ŋgə́ mvókín nɨ̀kwíbí, ŋgə́ yaám nò Dàvíìt yóò á. Kìn Nyɔ̧ɔ̧́ mɨ du ɓéènɨ rè wáaɓatɨ́ u̧.

⁹Àm mɨ du tànɨ Kìn Nyɔ̧ɔ̧́ kíì á mɨ du pénɨ jábɨ́r há̧á̧ mɨ duɓacéye nàmȩ́ȩ́ hȩ nò ndɨŋ ɓáŋhîn kù rè ru, nɨ́m mwi̧ Kìn Mèèín nɨ nàmȩ́ȩ́ ɗàà.

¹⁰Àm kɨ́ á mɨ du jíìnɨ jábɨ́r, àm nùb Mèín ya caré a dù nyɔ̧ɔ̧́, ŋgáb a kwà ɓə́r Yésù Krístù du nàniì, ŋgáb a lə́ɓwê mgbíí Mèèín no kɨ́ gwìí mwi̧í̧ ru.

¹¹Nyindí du àmɨrìí á rè: «Nɨ́m ɨ́ kû ɓe ŋgə́, nɨ́m kwá kwaɓwée mè ɓe ŋgə́.

¹²Nɨ́m ɨ́ ə́ə̀ŋɓà kpéín, nɨ́m kwá ŋgáŋɓwée ɓe ŋgə́. Nɨ́m ɨ́ mvúlèhè ŋgə́, ŋgə́ kwá mvúleeɓwéece nɨ́m.

¹³Nɨ́m ɨ́ dù nɨ́ ɓe jɨ̧ ɗàà, kɨ́ ŋgéé ŋgə́ á nɨ́ ɓe jɨ̧, ɓetí sàmàìn ŋgə́ ndɨŋ mɨ̀sə̧̀ə̧́ ɓe nɨ́m ŋgə́ nɨ̀mɨr taré ɗàà.»

¹⁴Vuuŋcunam nùb lâs àm kɨ́, wu a tànàɓà ŋgáb ɓe ɨ́r Mèèín, ŋgáb mbɨ́k mɨ̀sə̧̀ə̧́ ɓe ɨ́r sɨ̀ɨ̀ŋ nyindíí. Mɨ̀sə̧̀ə̧́ kɨ́ nɨ mí nó ɗàà, sé láàŋkîí nùb du ŋgáb ókniì.

¹⁵Lɨɨŋɓam dùnɨ fɨ́tîn ɓe nò Mèín kúumndé, fɨ́tîn ɓe nò ə́ré du nɨ́ óknɨ sə̀ré ɓe ə́r nóò ɗàwáá, fɨ́tîn ɓe nò du tàɓànɨ Kìn àmɨrì hàráá.

¹⁶Həkɓa wu mɨ̀sə̧̀ə̧́ mí nó ɗàwáá ɓe tàtùùb, ɓetí nùb du nɨ́m kɨ́ ndɨ̀ŋniì tɨ̀ gɨhá bɨ́ tíí ɓe ndɨ̀ŋɓáàŋ.

¹⁷Tɔ̀ɔ́ ŋgáb du nàniì du hȩ ɓàì wùr á. Ìmènê ɓe Fìlêt á kpáín nùb kíì no.

¹⁸Ŋgáb á bɨ tɔ̀ɔ̀nɨ nɨ́m du nɨ́ àmɨɨr ɗàwáá, ŋgáb a tà nɨ̀kwííb ya səəmcucií bɨ́. Tɔ̀ɔ́ kàŋnì ŋgábè kɨ́ á ɓàndɨ̀kɨ́nɨ ə́ə́m nɨ̀vɨ́tɨ̀b ví̧ne.

¹⁹Nɨ́m mwi̧ sɨ̀ne Mèín ya cɨ́ɨmndé á ɓà bɨ tamnì. Nɨ́m duce sìn bɨ kɨ́ ya tɨnné á rè: «Kéké ɗəəŋtɨ́ nùb noò.» Á ɓwê ya tɨín ɨnè: «Nùb wáaɓa vúm ók ɓe Kéké á na rɨ mbɨ́k ndɨ̧̀ɨ̧́ ɓáŋhɨ́nne.»

²⁰Dúú dɨmɨri no, nɨ súwááb ɓe nɔɔ̀b kùb nyaŋhɨ ɓe gôl sé á kùb du kwàɗóònɨ, kùb á kwàɓwênɨ kɨ́ lu̧ú̧, (hȩ kɨr) ɓe kɨ́ kùb ma ɓe mèè. Kɨ́b kù á ku kɨ́b ye dɨmɨri, kɨ́b kù cè kɨ́b ye lâs.

²¹Nò kù ɨ́ sàtè síí ɓe ɨ́r nɨ́ɨ́b ɓáŋhɨ́b mɨ du tànɨ rè, Mèín ɓa ŋgə́ ɗòbnɨ ə́r dɨmɨri á, ɓetí nò kɨ́ ókɓa nɨ ɓe tá no ə́ré á, ŋgə́ duna nɨ ŋgə́ nɨ́m jíri á, ŋgə́ á kə́sə́k kùb ɗòb ŋgə́ kúúŋ ə́rɨ́b nyɔ̧ɔ̧́ lâs.

²²Ákɨ́ɓa wu àm wàánjɨ́llí sum yá; máhá wu dùnɨ ju ɗɨ́ɗɨ̧́, ju ɓaín ɓe Mèèín, ju ɗûnɨ́mí ɓe ju ɗóóŋ, ɓáhîn ɓe nùb du yóŋɓànɨ Mèín sum mwi̧ rɨ.

²³Ɨ́dù həkɓa wu mɨ̀sə̧̀ə̧́ yɨŋmɨri mí nó ɗàà rɨ, wu ɗəəŋtɨ́ á cáàŋlɨ́ŋnɨ ɓe mɨ̀ndárɨ̀b.

²⁴Nò ə́nna Kékéé nɨ nò ndai mɨ̀ndárèé sé, á ɗúnɨ ŋgə́ dù njɔ̧̀ ɓwéin ɓe nùb lâs, ŋgə́ a jíhè nɨ́ɨ́b lâs fɨ́tɨ ŋgə́ nànɨ yəré sumíì, ŋgə́ a dù sàmàìn na tɔ̀hí.

²⁵Nùb du ndɨ̀ŋnɨ mɨ̀sə̧̀ə̧́ ɓe ŋgə́ rɨ, ŋgə́ a tɔ̀ɔ̀nàɓà ŋgáb nɨ́m còò, Mèín yè ɓa ŋgáb nànɨ nyòm ŋgáb ɓandɨ sum, ŋgáb a ɗə̀ŋhȩ̀ Kìn àmɨɨr kè.

²⁶Ŋgáb ɓa lə́cùnɨ kɨ̀cáblì á, Sátàìn tɨ ndɨŋkom ŋgáb jə̀ŋ ɗûnɨ́m nóò rɨ, ŋgáb a ɓáíhô̧ ndɔ̀k noò no.