Read Vute 2 Tìmòtê 3 Bible Online

2 Tìmòtê 3 - Vute bible

2 Tìmòtê 3

¹Ɗəəŋɓam ɨnayâna, jíìb cáŋhɨ̀rí no, mvókín bɨ kù ɓa dùɓànɨ ɓí á.

²Kí du nɨ̀vɨ́tɨ̀b ɓa dùnɨ ɓe mgbó á, ŋgáb a ɗû mòné. Ŋgáb ɓa dùnɨ ɓe â síhé, ɓe wútèé síhé á. Ŋgáb ɓa nyìnɓáàŋnɨ ɓe ɨ́r Mèèín á, ŋgáb a ndɨ̀ŋnà tá bi ɓe yà bí ŋgwé ɓáŋhîn. Ŋgáb tɨ̀ bɨ nyɔ̧ɔ̧́ kùb ndɨŋ ŋgábè ɗə̀ə̀ŋcùr, nɨ́m ók ɓe Mèèín, ŋgáb tɨ̀ bɨ jə̀ŋ.

³Ŋgáb kwá du nùb njɔ̧̀ ɓɔ̧ɔ̧ ɗàwáá, mwàm íhín ɗàà, nùb nyinɓáŋhȩ ɓe ɨ́r kùbè, njɔ̧̀ ɓɔ̧ɔ̧ ɓə́ndîn, njɔ̧̀ tamnì, nùb ɓəndɨ nɨ́m du nyɔ̧né.

⁴Ŋgáb kwá viite kúúr, ŋgáb kwá ndɨŋ nɨ́m hȩ nùb ŋgób ŋgáré ɗàwáá, ŋgáb a dùɓà ɓe wútèé síhé; ŋgáb kwá ɗú nɨ́ɨ́b ɗɔ̀bɨ́nné ŋgáb a mbɨ̂ bɨ́ Mèín.

⁵Ŋgáb ɓa túùmhó̧nɨ laŋtɨ̧ɨ̧́ vúm á jə̀ŋɓànɨ Mèín á, ɨ́dù ŋgáb bɨ ɓe nyòm ə́mní ŋgábè sumí ɗàà. Həkɓa wu nùb kɨ́.

⁶Nùb kù mvókín ŋgábè noò á lə́tèènɨ yúkbìn, ŋgáb a ɗàmndê nɨ̀gub njɔ̧̀ gó̧o̧, duɓa ɓe cum, du ɓe ə́ə́m tamnì ɗàà, duce ndɨ̀ŋtèènɨ nɨ́ɨ́b lâs njɔ̧̀ ŋgábè ɗúré rɨ ndɔ̀k ɓoò no.

⁷Nɨ̀gub kɨ́ kùb á ŋgáb tɔ̀ɔ̀nɨ ɓwâ lâs, ɨ́dù ye mwi̧ ŋgáb kwàháyèwá nyòm ŋgáb ɗəŋhɨ Kìn àmɨrì Mèèín.

⁸Hȩ Jànês ɓe Jàmbɨrê ya ɓə́hɨ ɓe Mòyîs rɨ, u̧ á ɓwê nùb kɨ́ du ɓə́ə̀nɨ ɓe Kìn àmɨrì. Ŋgáb du bɨ nùb kɨ̀cáàb hàrák ɗàwáá, ə́ə́m ŋgábè du nɨ́ nɨ́m kù éínɨ ɗàà rɨ á.

⁹Ɨ́dù mɨ̀ɓə́ə̀ ŋgábè kɨ́ tɨ̀ nɨ cóo gɨ̀r, ɓetí nùb lâs ɓa bɨ cínɨ kɨ̀cáàb ɓáŋhîn ŋgábè kɨ́ á, hȩ ya ndɨŋɓwée ɓe Jànês ɓe Jàmbɨrê rɨ.

¹⁰Ɨ́dù kɨ́ woò, wu yi óktɨ́ tɔ̀ɔ́ móò, wu ɗəəŋtɨ́ ɗɨ́m móò ɓe kɨ̀cáàb moò, wu ɗəəŋtɨ́ ə́ə́m móò, jíhɨ́r, ɗûnɨ́m ɓe mɨ̀súktéín mɨ du ɓe kíí,

¹¹wu ɗəəŋtɨ́ jábɨ́r kùb túumna mɨ ɓe ɨ́r ə́mní, ɓe jábɨ́r mɨ yi pə́ré. Wu ɗəəŋtɨ́ nɨ́m yi féínna mɨ Àŋtìyôs, Ìkòníyòm ɓe Lîstɨ̀rə̀, ɓe vùùm jábɨ́r mɨ kwa ɓe ɨ́r ə́mní. Ɨ́dù Kéké yi kpɔ́ɔ́ mɨ ɓe nɨ́ɨ́b kɨ́ lâs.

¹²Ɓàcéyè, nùb lâs du ɗúnɨ jə̀ŋnɨ Mèín ɓe ɨ́r ju ɓaín ɓe Yésù Krístùù kwá pə́lɨ́ŋhá bɨ́ jábɨ́r.

¹³Ɨ́dù tɨ́kàŋkáàŋ njɔ̧̀ ɓáŋhɨ́b kɨ́ kwá gɨhá bɨ́ tíí ɓe ndɨ̧̀ɨ̧́ ɓáŋhɨ́nne. Ŋgáb kwá mbáŋhɨ nɨ̀vɨ́tɨ̀b, ŋgáb a mbáàŋcùɓwê síí.

¹⁴Kɨ́ woò, tɔ̀ɔ́ wu yi ók, wu ɨ́ ə́ə̀mɓà ɓe gíí rɨ, gə́tɨɓa wu kpéín; wu ɗəəŋtɨ́ nùb yi tɔhe wé.

¹⁵Yàá wó mutíí, wu ɗəəŋtɨ́ nɨ́ɨ́b du tɨín Káàtà Mèèín noò. Nɨ́ɨ́b kɨ́ á sàmàìn na wu kɨ̀cáàb wu kwa jɨ̀r wu ɓáí nóò, ɓe ə́ə́m wu ə́mne Yésù Krístùù.

¹⁶Nɨ́ɨ́b du tɨín Káàtà Mèèín noò du nɨ fìí Mèèín ɓɔ̧ne á. Ɓe nɨ́ɨ́b kɨ́ á kùb du tɔ̀ɔ̀nɨ àmɨɨr, kùb a yètè nɨ̀vɨ́tè, kùb a ɗə́ŋhȩ̀ nɨ́m du kumí, kùb a túùmnà nɨ̀vɨ́tè ju ɗɨ́ɗɨ̧́ɨ̧́ ru,

¹⁷àm nò ók ɓe Mèèín a dùɓà nyaŋhîn ɓe nɨ́ɨ́b lâs du ŋgə́ ɗúnànɨ ɓe ɨ́r ə́r lâs du nyɔ̧né.