Read Vute 2 Tìmòtê 4 Bible Online

2 Tìmòtê 4 - Vute bible

2 Tìmòtê 4

¹Ɓe ɨ́r Mèèín, ɓe ɨ́r Yésù Krístù nò ɓa cùwònɨ ŋgùnnɨ nùb jáŋ ɓe nɨ̀kwíbí, ŋgə́ nò ɓa gònɨ ŋgáŋnɨ hȩ mvèèìn, mɨ tanaá wu ɨnè:

²Ɓéhɨm Kìn Mèèín. Taɓam Kìn kɨ́, dùgɨ̀ nyaaŋkí̧i̧, dùgɨ̀ nyaaŋkí̧i̧ ɗàà. Nɨ́m nɨ̀vɨ́tɨ̀b ndɨŋ ɓáŋhɨ́nne, nyinndə́əm ŋgáb no, yetɨɓam ŋgáb ɓe ɨ́r cum ŋgábè. Ɨ́dù wu a tààmnà ŋgáb njɔ̧̀, wu a tɔ̀hè ŋgáb ɓe jíhɨ́r cúk.

³Ɓetí ɓa dùnɨ ɓwâ kù nɨ̀vɨ́tɨ̀b a dùcì bɨ́ ɗúwa óknɨ tɔ̀ɔ́ àmɨɨr á. Ŋgáb ɓa bɨ ndɨ̀ŋnɨ nɨ́m mɨ̀lə́m ŋgáb nɨ̀mibi ɗúré á, ŋgáb a ɓáàréwò gín ɓó síhé tá tɔ̀hí bɨ kàŋnì ɓa ŋgáb tànànɨ nɨ́m nyaŋ ŋgáb tó̧né.

⁴Ŋgáb ɓa mvúnɨ óknɨ Kìn àmɨɨr á, ŋgáb a ókbɨ̂ŋ bɨ́ àám kàŋnì.

⁵Ɨ́dù kɨ́ woò, bɨm múb síhé nɨ́ɨ́b lâs no. Jíhɨm jábɨ́r, éíhá wu ə́r tàá Kìn Nyɔ̧né woò. Éíhá wu ə́r Mèín ɗob wé hàrák.

⁶Kɨ́ moò cè, ɓwâ kùb ɓa mɨ gɔ̀kkɨ́nɨ hȩ satɨgàà ɗóotɨ́, ɓwâ cwéé moò ɗóotɨ́.

⁷Mɨ lɨŋɓatɨ́ lɨɨŋ ə́mní mîn, mɨ gií há̧á̧ cáŋhɨ̀rí, mɨ gə́tií ə́ə́m móò.

⁸Ɗàrò lɔ̀ɔ́ mɨ ɓei suu á mɨ móŋnɨ, lɔ̀ɔ́ kɨ́ du lɔ̀ɔ́ ju ɗɨ́ɗɨ̧́ɨ̧́, Kéké nò du tɨ́ŋgù̧ú̧ ɗɨ́ɗɨ̧́ɨ̧́ ɓa mɨ nànɨ ye ŋgù̧ní rɨ á. Ŋgə́ tɨ̀ nɨ nàhó̧ɗóòwá mɨ mwi̧, ŋgə́ ɓa nàɓwênɨ nùb tɨ du ŋgə́ móŋkɨ́ɓànɨ ye ŋgə́ ɓa gòniì á.

⁹Máhá wu gòkɔ́ɔ̀nɨ mɨ kwànɨ.

¹⁰Ɓetí Dèmâs mbɨ́kkɨ́soó nɨ́ mɨ àm ŋgə́ du nɨ́ ɗúnɨ mè ɗàá hò̧neè, ŋgə́ gií nɨ́ Tèsàlònîk. Kɨ̀rèsâŋ gií nɨ́ Gàlàtî, Tît ɨ́ gɨ̀cê nɨ́ Dàlmàsî.

¹¹Sé Lúkàs ɨ́ me ɓe mɨ hò̧; gom ɓe Máàrk, ɓetí ŋgə́ ɓa mɨ kpɔ́knɨ ɓe ə́r á.

¹²Mɨ tómtɨ́ mɨ́ Tìcîk gɨ̀ Èfês.

¹³Ɓwâ wu ɓa gòniì, áwona mɨ júk ndoŋnɨri moò mɨ mbɨ́kkɨ́so Tɨ̀ròwâs, Kààrpúùs yó rɨ. Gewoɓwéhɨm ɓuùŋ káàtàbì, tíí yàɓàyè kɨ́ kwaá rɨ.

¹⁴Tɨ́wùr ɨ́r du Àlèksândɨ̀rə̀ rɨ ndɨŋɓatɨ́ mɨ ɓáŋhîn. Kéké kwá na ŋgə́ lɔ̀ɔ́ ɗóhe ɓe nɨ́m ŋgə́ ndɨŋ kíì.

¹⁵Gə́tɨɓwéhɨm wu ɓe ŋgə́, ɓetí ŋgə́ á nɨ́ sə́ndɨ̀ɓànɨ àm nɨ́mè ɓɔ̧ne cei.

¹⁶Ɓwâ mɨ yi ə́əŋyaye ŋgù̧ní, kààŋnɨ síhé, nò kù ya nɨ́ mo cùrì ə́ə̀ŋndéwa, nùb lâs yi luú mɨ. Mɨ yóóŋ Mèín, ŋgə́ nɨ́ nɨ́m ŋgáb ndɨŋ kɨ́ ɓɔ̧ɔ̧ árə̂r.

¹⁷Ɨ́dù Kéké yaá ɓe mɨ, ŋgə́ ɨ́ tààmnà mɨ njɔ̧̀, á mɨ kwa nyòm mɨ ɓéhɨ Kìn noò, mɨ ɨ́ ndɨ̀ŋ nùb du Jwîf séé lâs ók Kìn kɨ́, á mɨ ɓáíhó̧ cwéé rè.

¹⁸Kéké kwá céínhó̧ mɨ ɓáŋhɨ́b lâs no, ŋgə́ kwá ndɨŋ mɨ lə́ no hamnin, ɓátɨ̀nɨ mɨ. Mgbíí dù ɓe ŋgə́ tɨ́k kɨ̀ tɨ́k. Àmèn!

¹⁹Nyindɨm Pɨ̀rìsîl ɓe Àkìlâs, dùgɨ̀ nùb Ònèsìfóòr yóò.

²⁰Èrâstə̀ metɨ́ nɨ́ Kòréèntə̀, mɨ mbɨ́kkɨ́soceé mɨ́ Tɨ̀ròfîm Mìlê, ɓetí ŋgə́ á yábnɨ.

²¹Máhá wu gònɨ ɓwâ mbɨ̀ɨ̀ŋ du féínyèwá rè. ƏÈbùlûs, Pùdáàŋs, Lìnûs, Kùlòdíyà ɨ́ mwin yàá bɨ ə́mní kù lâs nyindɨsoó wu.

²²Kéké dù ɓe wu. Faám Mèèín dù ɓe nyí.