Read Vute Tît 1 Bible Online

Tît 1 - Vute bible

Tît 1

¹Mɨ Pôl, mɨ nò du nɨ̀kɨ̧́ɨ̧ Mèèín ɓe nò tómé Yésù Krístùù, mɨ ɨ́ tɨin káàtà rè ru. Kùb ya tómwoó mɨ, mɨ gò ndɨ̀ŋnɨ nùb Mèín ya caré dù ɓe ə́ə́m, ŋgáb a ɗə̀ŋhȩ̀ Kìn àmɨrì, ŋgáb a dùcè ju ɗɨ́ɗɨ̧́ túùmnɨ jɨ̧ ŋgáb jəŋ Mèèín,

²ŋgáb a dùɓwéhè ɓe gíí vúm ɓa kwànɨ mè mɨ̀cɨ̧̀ɨ̧́. Mèín nò du kàŋnɨ kààŋ ɗàwáá yi ɓwáttɨ́ nɨ́m nànɨ mè kɨ́ Mèín ma ɗɔ̀ɔ́b nyààŋɓàyèwá.

³Ɓwâ yi du ɓwánne, ŋgə́ yi túumtɨ́ mè kɨ́ Kìn noò no. Kìn ŋgə́ yi naré mɨ ɓɔ̧ɔ̧, mɨ duce ɓéènɨ hȩ Mèín nò du tɨ́ɓə́r nɨ́mè ta mɨ ndɨ̀ŋte rè.

⁴Tît, wu nò duɓa mwin mó Mèèín, nɨ́me wu nò du ə́ə́m mwi̧í̧, káàtà rè mɨ tɨnna wu á. Mɨ yóóŋ Mèín nò du Táà ɓe Yésù Krístù nò du tɨ́ɓə́r nɨ́mè, ŋgáb túùmnà wu ndɨ̀ŋyàáŋ, ŋgáb a nà wu ju ɗóóŋ.

⁵Mɨ tɨ mbɨ́kkɨ́so mɨ wu Kɨ́rêt ku àm wu nyààŋcù nɨ́ɨ́b tɨ meré, wu a bɨ̀wúɓwê kɨ̀jííb ə́mní kwɨ́ì lâs no yɨ́ mɨ̀kwìn nùb ə́mní duré á. Lə́əmcum sóóŋ mɨ yi na wé.

⁶Kɨ̀jíri ə́mní nɨ nò kùb ɓa yètɨ̀niì dùr, ŋgə́ dùhá nɨ ɓe gwi mwi̧cáŋ.[1] Munɨ́b noò dù nùb ə́mní, ŋgáb dù ɓe jɨ̧, ŋgáb bɨ ŋgób ɓáŋhɨ́b dùr.

⁷Ɓetí nò ge mɨ̀kwìn nùb ə́mní góomhá nɨ́ íí ə́r Mèèín ya, àm kɨ́ á du nɨ́ ɗúwa kùb kwà nɨ́m yɨ̀tíí ŋgéé só ru. Ŋgə́ nɨ ɓɔ̧ ɓáŋhîn dùr, ŋgə́ nɨ nò óktee njù̧ kə́sə́ə́ dùr. Ŋgə́ nɨ mbirú dùr, ŋgə́ nɨ ɓe njɔ̧̀ ɓə́ndîn dùgɨ̀ njɔ̧̀ pɨ̀mní dùr.

⁸Nùb go ŋgə́ péniì, ŋgə́ gàmɓà nùb kɨ́ sàksàk, ŋgə́ a ɗû nɨ́m du nyɔ̧né. Ŋgə́ dù nò na sóŋní, ŋgə́ dù nò ɗɨ́ɗɨ̧́. Ŋgə́ dù nò ók ɓe Mèèín, ŋgə́ a dù nò bɨ múb síhé.

⁹Ŋgə́ dùɓà ɓaín ɓe Kìn du nànɨ gíí, duɓwéece ɗóhîn ɓe tɔ̀hí. Ŋgə́ ɨ́ dù u̧, ŋgə́ ɓa dùnɨ nò taamna kùb njɔ̧̀ ɓe tɔ̀ɔ́ àmɨrì ŋgə́ du nàniì á, ŋgə́ a túùmnàɓwê nùb du tɔ̀ɔ́ kɨ́ ə́ə̀mnɨ ɗàwáá kum ŋgábè.

¹⁰Ɓetí nɨ̀vɨ́tɨ̀b ví̧i̧ á bɨ ŋgób ɓáŋhɨ́b, ŋgáb á bɨ kùb mbáàŋnɨ ɓe nyindí fàsɨ̀bì ŋgábè ɓɔ̧ne. Nùb kɨ́ duɓa ví̧i̧ nùb kù mvókín Jwîf bɨ ɓandɨkɨ́ síí ɓóò ɓe àm ə́mní rɨ á.

¹¹Á ɗúnɨ wu ɗèìn ŋgáb ɓɔ̧, ɓetí ŋgáb á ɓáàŋkɨ́nɨ ə́ə́m gbàŋ bɨ ví̧i̧, ŋgáb á cè tɔ̀ɔ̀nɨ nɨ́m du ɗúwa kùb tɔ̀ɔ̀te, àm ŋgáb a pɨ̀mnè mònéè.

¹²Nò Kɨ́réèt kwe nɨ̀mɨr, ŋgáb du pénɨ hȩ tɨ́kìn Mèèín yi ɨ́ ta u̧ ru, ŋgə́ ya taá ɨnè: «Nùb Kɨ́réèt yaámhá bɨ ɓwâ lâs tɨ́kàŋkáàŋ á, nyèém njɔ̧̀ ɓáŋhɨ́bí, nyɨnyáàb du bɨ́ lə́ə̀mhó̧ɗóònɨ àm cɔɔ̀ŋ.»

¹³Nɨ́m ŋgə́ tace kɨ́ nɨ àmɨɨr á. Àm kɨ́ á du ɗúnɨ wu yètɨ̀ɓà ŋgáb cei, àm ŋgáb a dù ɓe ə́ə́m hàrák,

¹⁴ɗà ŋgáb a mbɨ̂ tùú àám kàŋnì Jwîf ɓoò, ɓe ɓíhɨ̀b nùb ya mbɨ́k bɨ́ jɨ̀r àmɨrìí du nànɨ rɨ.

¹⁵Nùb du bɨ́ ɗɨ́ɗɨ̧́ Mèèín íhín ndɨ, nɨ́ɨ́b lâs á nà ŋgáb ɗɨ́ɗɨ̧́. Nùb duce bɨ́ ɗɨ́ɗɨ̧́ Mèèín íhín ɗàwá, duɓwée bɨ́ ə́ə̀mnɨ Yésù ɗàà rɨ, nɨ́m duna ŋgáb ɗɨ́ɗɨ̧́ɨ̧́ nɨ ɗàà, ɓetí kɨ̀cáàb ŋgábè ɓe njɔ̧̀ càá nɨ́mí ŋgábè bɨ ɗɨ́ɗɨ̧́ ɗàɓwêcéwa.

¹⁶Ŋgáb á tànɨ vúm ɗəəŋtɨ́ Mèín, ɨ́dù nɨ́ɨ́b ndɨ̧ɨ̧́ ŋgábè á cè bɨ́ nyin. Ŋgáb duɓa bɨ mbɨ́b á, ŋgáb á ŋgób ɓáŋhɨ́b. Sàmàìn ŋgáb ndɨŋɓacéye nɨ́m du nyɔ̧né ɗàà.