Read Vute Tît 2 Bible Online

Tît 2 - Vute bible

Tît 2

¹Ɨ́dù kɨ́ woò Tît, tɔɔnam nɨ̀vɨ́tɨ̀b nɨ́m du ɗɨ́ɗɨ̧́ɨ̧́.

²Tanam túkwɨ́í ŋgáb bɨ̀ múb síhé, ŋgáb dù nùb kùb jəŋndé, ŋgáb dù ɓe kɨ̀cáàb, ŋgáb ə́ə̀ŋɓà kpéín ɓe ə́ə́m hàráá, ŋgáb dù ɓe ɗûnɨ́m, ɓe jíhɨ́r.

³Tanaɓwéem nɨ̀gub kɨ̀jííb ŋgáb dù ju hȩ nùb ɗɨ́ɗɨ̧́. Ŋgáb bɨ ɓe susuùŋ dùr, ŋgáb bɨ mbɔ́ɔ́ súmé dùr; ŋgáb dù nùb na sóóŋ nyɔ̧ɔ̧́,

⁴àm ŋgáb a tɔ̀ɔ̀nà mɨkóómɨb hȩ ŋgáb fɨ́tɨ ɗúnɨ ŋgwásɨ̀b ɓoò ɓe munɨ́b ɓoò.

⁵Hȩ ŋgáb fɨ́tɨ dùnɨ ɓe kɨ̀cáàb ŋgáb a dù járkɨ́táá, hȩ ŋgáb fɨ́tɨ dùnɨ nɨ̀gub gə́tɨ gùmní du ɓe ɗɨ́m nyɔ̧ɔ̧́, duce jə̀ŋnɨ ŋgwásɨ̀b ɓoò. Nɨ̀vɨ́tɨ̀b tɨ̀ nyinɓáŋhȩ bɨ́ ɓe ɨ́r Mèèín.

⁶Tanaɓwéem wàánjííb ŋgáb dù ɓe kɨ̀cáàb.

⁷Wu nɨ̀mɨr ɓwê, nɨ́ɨ́b ndɨ̧ɨ̧́ woò lâs no, á ɗúnɨ wu dùɓà túúm nyɔ̧ɔ̧́. Tɔ̀ɔ́ wu du nàniì dùɓà njɔ̧̀ mwi̧ ɓe jɨ̧ cúk.

⁸Nyinɓam nyindí àmɨɨr du sàmàìn kùb yomndé ɗàà rɨ, sə̀ré a bì nùb wo ɓi̧ní, àm ŋgáb du bɨ́ kwàwá nɨ́m ŋgáb nyinɓáŋhȩ ɓe ɨ́r nɨ́mè nyindí kɨ́ noò.

⁹Tanam mbɔ́klɨ́b ŋgáb jə̀ŋ tá ɓo mbɔ́klí, ŋgáb a ndɨ̀ŋ nɨ́m nyaŋ nùb kɨ́ sumíì, ŋgáb bɨ mɨ̀sə̧̀ə̧́ ɓe ŋgáb ndɨ̀ŋ,

¹⁰ŋgáb cè bɨ́ tá ɓo mbɔ́klí kɨ́ nɨ́m kù yɨ̂r. Ɗúɓacéye ɓwâ lâs ŋgáb túmnɨ̀ ɗɨ́m nyɔ̧ɔ̧́ ɓe jɨ̧ á, àm tɔ̀ɔ́ du ɓe ɨ́r Mèín nò du tɨ́ɓə́r nɨ́mè a dù dɨmné.

¹¹Ɓetí Mèín túumtɨ́ ndɨ̀ŋnyàáŋ no nɨ̀vɨ́tɨ̀b lâs fɨ́tɨ ɓáínɨ ɓe kíí.

¹²Ndɨ̀ŋnyàáŋ kɨ́ á nɨ́m túùmnànɨ hȩ nɨ́m fɨ́tɨ mbɨ́knɨ ju ɓáŋhîn ɓe ɗûnɨ́m nɨ́ɨ́b ɗɔ̀bɨ́nné, àm ju nɨ́mè ɗɔ̀ɔ́b lè noò a dù ɓe kɨ̀cáàb, a dù ɗɨ́ɗɨ̧́, ɓe jɨ̧ Mèèín tíí.

¹³U̧ á du ɗúnɨ nɨ́m móŋkɨ́ ye mɨ̀tùú nɨ́m du sə̀ŋnɨ gíí yaà, ye Yésù Krístù nò duɓa Mèín nɨ́mè ɓe tɨ́ɓə́r nɨ́mè ɓa túùmnɨ mgbíí noò rɨ.

¹⁴Ŋgə́ yi kaikíí síí nóò ɓe ɨ́r nɨ́mè, àm céínhó̧kɨ́ nɨ́m ɓáŋhɨ́b lâs no ɗà ŋgə́ a ndɨ̀ŋ nɨ́m sèì gbàŋ járkɨ́ták ók ɓe ŋgə́ mwi̧, duce ɗúɓànɨ ndɨ̀ŋnɨ nɨ́ɨ́b nyɔ̧né.

¹⁵Nɨ́m du ɗúnɨ wu tɔ̀ɔ̀nà nɨ̀vɨ́tɨ̀bì á kí. Ɓe sɨr wó sóò, wu a tààmnà ŋgáb njɔ̧̀, wu a yètɨ̀ɓwê ŋgáb. Wu mbɨ́kwa nò kù pə́tə̀ə̀ŋkɨ́ wu.