Read Vute Tît 3 Bible Online

Tît 3 - Vute bible

Tît 3

¹Lə́əmcunam nùb ə́mní ɨnayâna ɗú ŋgáb jə̀ŋ nùb ge tií á, ŋgáb ndɨ̀ŋ nɨ́m nùb kɨ́ ta ŋgáb ndɨ̀ŋte, ŋgáb a dùɓwê kə́sə́k ndɨ̀ŋnɨ nɨ́ɨ́b lâs du nyɔ̧né.

²Ŋgáb ɓe ɨ́r nò kù nyìnɓáàŋwá, ŋgáb dù ɓe ɗɨ́m kerîn, ŋgáb a dù njɔ̧̀ nyɔ̧ɔ̧́, ŋgáb a túùmlɨ̂ŋ njɔ̧̀ ɓwéin ɓe nùb lâs.

³Ɓetí nɨ́m yaá ɓwê u̧, kɨ̀cáàb ŋgwȩ́ȩ́ ɗàà, jɨ̧ só ɗàà, ɓwâ lâs kumí tə̧ə̧́. Nɨ́m yɨɨ́m ɓwê mbɔ́klɨ́b mɨ̀lə́m ɓáŋhɨ́b ɓe nyɔ̧ɔ̧́ ɗɔ̀bɨ́nné á. Ə́r nɨ́mè yaá ɓáŋnjɔ̧̀ ɓe hàŋfì. Nɨ́m yaá ɓə̀ndɨ̀nɨ nɨ̀vɨ́tɨ̀b, ŋgáb a ɓəndɨɓwéece nɨ́m.

⁴Ɨ́dù Mèín nò du tɨ́ɓə́r nɨ́mè yi túumnaá nɨ̀vɨ́tɨ̀b nyàŋnjɔ̧̀ noò.

⁵Ŋgə́ yi ɓátií nɨ́m. Yi nɨ́ ɓe àm nɨ́m ya ndɨŋɓɔ̧́ nɨ́ɨ́b mɨ́nnɨ́bí sé, yi du nɨ àm ŋgə́ yi ók nɨ́m mwàmí á. Ŋgə́ ya ɓátií nɨ́m ɓe kɔ fin hehí Nyéhè Sarîn du nɨ́m nànɨ mè heé nó kwe.

⁶Ɓetí, ɓe ɨ́r Yésù Krístù nò du tɨ́ɓə́r nɨ́mè, Mèín ya naɓatɨ́ nɨ́m Nyéhè Sarîn,

⁷àm ɓe ndɨ̀ŋnyàáŋ ŋgéé, nɨ́m a sèì nùb ɗɨ́ɗɨ̧́ Mèèín tíí, nɨ́m a kwàcè mè mɨ̀cɨ̧̀ nɨ́m du móŋkɨ́ɓàniì.

⁸Nyindí gírí du ɗúnɨ nɨ̀vɨ́tɨ̀b lâs ə́ə̀mte á kí. Mɨ á ɗúnɨ wu ə́ə̀ŋɓà kpéín nyindí kɨ́ ya, àm nùb ə́mne Mèèín a kɨ́kléɓà njɔ̧̀ ndɨ̀ŋnɨ nɨ́ɨ́b nyɔ̧ɔ̧́ ɓe jɨ̧ cúk. Nɨ́m nyɔ̧ɔ̧́ fɨ́tɨ kpɔ́knɨ nɨ̀vɨ́tɨ̀bì á kí.

⁹Ɨ́dù, həkɓa wu mɨ̀sə̧̀ə̧́ bɨ mí nó ɗàà, àám du góòmnɨ fànnèé ɨ́ì tákɨ̀rɨ́bí, mɨ̀ndárɨ̀b ɓe lɨɨŋ ɓe ɨ́r ɓíhì. Nɨ́ɨ́b kɨ́ lâs du bɨ nɨ́ɨ́b saai bɨ̀ɨ̀r kù no ɗàwáá á.

¹⁰Nò du gèrénɨ gɔ̀ mvókín nɨ̀vɨ́tɨ̀bì rɨ, tanam ŋgə́ kɨ́ yàyɨ̀rí, wu a tànà ŋgə́ kɨ́ gwì bɨrɨ́bí. Kɨ́ gwì taarɨ́bí wu a ákî ŋgə́ kpánȩ́ȩ́.

¹¹Mɨ lə́mne wu ɗəəŋtɨ́ ɨnayâna kúúŋ nùb u̧ kíì du bɨ nùb mbɨ́k bɨ́ ju ɗɨ́ɗɨ̧́ɨ̧́ á, cuum ŋgábè á cè bɨ́ túùmnɨ ɨnayâna ŋgáb á bɨ kumí tə̧ə̧́.

¹²Ɓwâ mɨ ɓa wu tómsònànɨ Àrtèmâs, kɨ́ kù Tìcîk lɨ, máam mɨ kwàsònɨ Nìkòpòlîs, ɓetí ku á mɨ ɓa mɨ́ lùgènɨ mbɨ̀ɨ̀ŋ ndu.

¹³Jènâs gamnalɨ́ŋ kùb àm yɨ́ ŋgù̧ní rɨ, ɓe Àpòlôs, ɓwâ ŋgáb ɓa ə́llénɨ gùrí, kpɔ́k ŋgáb. Nɨ ɗúwa nɨ́m kù tùŋ ŋgáb.

¹⁴Á ɗúnɨ nùb ə́mní nɨ́mè máɓwê ndɨ̀ŋnɨ ə́rɨ́b nyɔ̧ɔ̧́ àm kpɔ́k nɨ̀vɨ́tɨ̀bì; ɓe ndɨ̧̀ɨ̧́ u̧nè kɨ́ ə́rɨ́b ŋgábè tɨ̀ bɨ sam lɔ̧̂.

¹⁵Nùb nɨ́me ŋgáb du hò̧neè lâs nyindɨsoó wu. Nyindɨm mwin yàá bɨ ə́mní lâs. Mèín fàm nyí lâs.