Read Vute Fìlèmôŋ 1 Bible Online

Fìlèmôŋ 1 - Vute bible

Fìlèmôŋ 1

¹Mɨ Pôl, mɨ nò kùb ya kɨ́klé nìrì ɓe ɨ́r Yésù Krístùù rè, mɨ ɨ́ tɨin káàtà rè ru, nɨ́me Tìmòtê mwin yàá moò péín ə́mní. Nɨ́m tɨnna wu á, Fìlèmôŋ, wu nò du ɓwàjìrí nɨ́mè, wu ɨ́ dùkwà kùŋ nɨ́mè ə́ré.

²Nɨ́m tɨnnaɓwée mɨ̀kwìn nùb ə́mní du ɓáànɨ wo yóò á, dùgɨ̀ Àpìyâ mȩȩ́gwi nɨ́mè péín ə́mní, ɓe Àrkɨ̂b nò nɨ́me ŋgáb du lɨ̀ɨ̀ŋɓáànɨ cúú.

³Nɨ́m yóóŋ Mèín nò du Táà ɓe Krístù nò du Kéké nɨ́mè, ŋgáb nà nyí faám, ŋgáb a nà nyí ju ɗóóŋ.

⁴Fìlèmôŋ moò, ɓwâ lâs mɨ du Mèín yóŋniì, mɨ á wu lə́ə̀mnɨ, mɨ á cè ɗómnɨ Mèín mɨ du éínàniì kùsùk.

⁵Ɓetí mɨ á óknɨ hȩ kùb du nyìnnɨ àm ɗûnɨ́m wu ɗú nùb gbàŋ Mèèín lâs, dùgɨ̀ ə́mnèé wu ə́mnɨ Yésù nò du Kékéé.

⁶Mɨ yóóŋ Mèín ndɨ̀ŋ ə́ə́m wu du ɓe kí, du ndɨ̀ŋnɨ wu dù ɓaín ɓe nɨ́mè, ndɨ̀ŋ ɨnayâna wu ɗə̀ə̀ŋnyààŋɓà nyɔ̧ɔ̧́ nɨ́m du kwànɨ mè nɨ́mè no ɓe ɨ́r ju ɓaín nɨ́m du ɓe Krístù rè mîn.

⁷Mwin yàá moò, ɗûnɨ́m wu du ɓe kíí taamcunaá nùb gbàŋ Mèèín njɔ̧̀. Nɨ́m wu ndɨŋ kɨ́ naɓatɨ́ mɨ mɨ̀tù, njɔ̧̀ tamɓwéetɨ́ mɨ.

⁸Àm kɨ́ á, dugɨ hȩ Krístù na mɨ nyòm mɨ ta wu ndɨ̀ŋ nɨ́m mɨ ɗúré,

⁹á mîn mɨ ɓwèì wu ɓoré ɓe ɨ́r ɗûnɨ́m wu du ɓe kíí. Mɨ Pôl, túkúr du nìrì ɗàrò ɓe ɨ́r Yésù Krístùù rè,

¹⁰mɨ ɓwei wu ɓoré rè ɓe ɨ́r Ònèsíìm á. Ŋgə́ settɨ́ mwin móò ɓe ɨ́r Krístùù yɨ́ mɨ du nìrì hò̧ rè.

¹¹Ɓwâ kù, ŋgə́ ya nɨ́ wu nɨ́m kù kpɔ́knɨ ɗàà, ɨ́dù ɗàrò ŋgə́ á kpɔ́knɨ nɨ́me wu.

¹²Ɗàrò, mɨ tómcusonaá wu ŋgə́, ŋgə́ sum mó ɓɔ̧ne á.

¹³Ɓwâ mɨ duye nìrì ɓe ɨ́r tàá Kìn Nyɔ̧né rè, tɨ á sàmàìn mɨ gə́tɨɓa ŋgə́ ɓe mɨ hò̧ àm ŋgə́ a kpɔ̂ mé, hȩ wu du hò̧ ɗàwáá.

¹⁴Ɨ́dù, mɨ ɨ́ dù mɨ́ ɗúwa ndɨ̀ŋnɨ nɨ́m kù u̧ ɓè wu du ə́ə̀mwáá. Mɨ ɗúwa wu kpɔ́ɔ̀nɨ wu ndɨ̀ŋ mɨ nyɔ̧ɔ̧́, mɨ ɗú mɨ́ wu ndɨ̀ŋɓà hȩ wu nɨ̀mɨr wu lə́əmndé á.

¹⁵Mèín yè tií ndɨŋ nɨ́ nyíne ŋgə́ gɔ̀ɔ̀hó̧yè mvókín ti ŋgób, ɗà ŋgə́ a tì cùwògì wu kwànɨ, nyíne ŋgə́ a tì dù kɨ́ gwìí mwi̧í̧ ru kè.

¹⁶Ɓetí ɗàrò, ŋgə́ nɨ́ mbɔ́ɔ́ sam sé cɨ̀, ŋgə́ ndóŋɓacéyecií nɨ́ mbɔ́ɔ́, ŋgə́ mwin yàá nɨ́mè ɗûnɨ́mí á. Mɨ á ŋgə́ ɗúɓànɨ cei, ɨ́dù mɨ lə́mne wu ɓa ŋgə́ ɗúnɨ a ndôŋ kɨ́ mɨ ɗú ŋgéé á, dùgɨ̀ kɨ́ ŋgə́ du mbɔ́klí, dùgɨ̀ kɨ́ ŋgə́ du mwin yàá nɨ́mè ɓe ɨ́r Krístùù.

¹⁷Duú ɓè wu ɗəəŋmeɓa ɨnayâna mɨ mwin yàá woò péín ə́mní á, gam ŋgə́ hȩ wu gam mɨ nɨ̀mɨr.

¹⁸Ŋgə́ ɓáàŋkɨ́gɨ̀ wu nɨ́m kù, wu dùgɨ̀ ŋgə́ tùnɨ nyamandì kù, mɨ ɨ́ ɓa gòmnɨ ru.

¹⁹Yɨ́ àm nyamandìì rè, mɨ nɨ̀mɨr ɨ́ tɨinɓa ru, nɨ́m mɨ taré á rè: Mɨ Pôl, mɨ ɓa gòmnɨ á. (Wu ɗəəŋɓatɨ́ ɨnayâna nyamandì mo wu sei nò ə́mní rè á wo só, nyamandì kɨ́ du mè woò á.)

²⁰Yée, mwin yàá moò, ɓe ɨ́r ɗûnɨ́m wu ɗú Kékéé, ə́əmna mɨ ɓoré kɨ́. Ɓe ɨ́r ju ɓaín nɨ́m du ɓe Krístùù, taamna mɨ njɔ̧̀.

²¹Mvókín mɨ du wu tɨ̀nnànɨ rè no, mɨ á ɓe gíí ɨnayâna wu ɓa ndɨ̀ŋnɨ nɨ́m mɨ ɓwei wu kɨ́ á. (Mɨ ɗəəŋtɨ́ wu ɓa ndɨ̀ŋɓàcéyènɨ a ndôŋ u̧ á.)

²²Nyaaŋkɨ́naɓwéehá wu mɨ yɨ́ gúnè, ɓetí mɨ á ɓe gíí ɨnayâna Mèín ɓa óknɨ mɨ̀yú̧ nyínè á, ŋgə́ a ndɨ̀ŋ kùb mbɨ́kcùnà nyí mɨ.

²³Èpàfɨ̀râs nɨ́me ŋgə́ du nìrì hò̧ ɓe ɨ́r Yésù Krístùù rè nyindɨsoó wu.

²⁴Máàrk, Àrìstârk, Dèmâs ɓe Lúkàs, nùb nɨ́me ŋgáb du éíɓáàniì nyindɨsoɓwéetɨ́ wu.

²⁵Mɨ yóóŋ Yésù Krístù nò du Kékéé, ŋgə́ fàm nyí.