Read Vute Gbàŋ Èbɨ̀rə́ə̀ 1 Bible Online

Gbàŋ Èbɨ̀rə́ə̀ 1 - Vute bible

Gbàŋ Èbɨ̀rə́ə̀ 1

¹Ɓwâ ya tíí kúríí, Mèín ya nyinnakom tákɨ̀rɨ́b Jwîf ɓoò nyindí tɨ́kɨ̀nɨ́bí ɓɔ̧ɔ̧. Jɨ̀ ŋgə́ ya nyinnalɨ́ŋ ŋgábè yaá nyiín nyin.

²Ɗàrò, jíìb cáŋhɨ̀rí nɨ́m dukɨ́cɨ nó rè, ŋgə́ nyinwonaá nɨ́m Mwin nóò nɨ̀mɨ́rí ɓɔ̧ɔ̧. Ɓe ŋgə́ á Mèín yi nyaŋhȩ nɨ́ɨ́b lâs lu, ŋgə́ ɨ́ duce nò Mèín yi ca nɨ́ɨ́b lâs ók ɓe kíí ru.

³Nyéhè mgbíí Mèèín á ŋgə́ só; ŋgə́ duɓa ɓɨ̀m Mèín nò du Tá noò á. Ɓe nyòm kìn ŋgéé, ŋgə́ á gə́tɨ̀nɨ nɨ́ɨ́b lâs. Ŋgə́ ndɨŋtɨ́ Mèín tɨ́íkɨ́nà nɨ̀vɨ́tɨ̀b cum, cùr kɨ́ no ŋgə́ ɨ́ wúì ɓɨllin, dùrénɨ ŋgáár lam Mèín nò du ɓe nyòme lâs no.

⁴Mwin Mèèín ndóŋtɨ́ dùgallɨb, àm kɨ́ á Mèín nace ŋgə́ ɨ́r ndóŋ kɨ́ dùgallɨbi ru.

⁵Ɓetí ye mwi̧, Mèín nɨ́ tàkɨ́nàyèwá dùgal kù ɨnè: «Wu mwin móò á, yànɨ mwáín mɨ Tá woò á.» Ŋgə́ cè nɨ́ ye mwi̧ tàkɨ́yèwá ɓe ɨ́r dùgal kù ɨnè: «Mɨ ɓa dùnɨ Tá noò á, ŋgə́ a dùcè mwin móò.»

⁶Ɨ́dù ɓwâ Mèín yi ɓa tómsówònɨ Mwin nó ŋgwéé ɗɔ̀bɨ́nné, ŋgə́ yi taá ɨnè: «Á ɗúnɨ dùgallɨb Mèèín lâs ɗóm ŋgə́.»

⁷Nɨ́m Mèín nyin ɓe ɨ́r dùgallɨbi á ɨnè: «Mèín ndɨŋtɨ́ dùgallɨb noò dù kəŋmbə́r, dùgallɨb no ə́ré ɨ́ dùcê hȩ yúum waá.»

⁸Ɨ́dù ɓe ɨ́r Mwin Mèèín, Mèín ya wáatɨ́ ɨnè: «Wu Mèín á, ju mvènnì woò kwá nɨ cɔ̧̂. Wu mvèìn ɗɨ́ɗɨ̧́ du ŋgáŋnɨ gbàŋ woò yaà á.

⁹Wu á ɗúnɨ nɨ́m du ɗɨ́ɗɨ̧́ɨ̧́, wu a jì nɨ́m du ɓáŋhɨ́nne, àm kɨ́ á Mèín wóò ya ca wu, ɓe wúrèé ŋgə́ wúrɨna wu gbáam, ŋgə́ ɨ́ mbɨ̂ nɨ́ nùb nyíne ŋgáb yi du cúú rè.»

¹⁰Mèín yi takwatɨ́ ɨnè: «Kéké, wu ɨ́ du nò yàá yàllì ya nyaŋhȩ ɗɔ̀bí, ɓɨɨr ɓwê ŋgáár ə́ré woò á.

¹¹Nɨ́ɨ́b kɨ́ lâs ɓa cɔ̧́nɨ á, ɨ́dù kɨ́ woò wu a mè. Ɓɨɨr ɓe ɗɔ̀ɔ́b ɓa kwéènɨ hȩ júúb fìn á.

¹²Wu ɓa ŋgáb ɓwábkɨ́nɨ hȩ júk á, wu a cə́ndɨ̀kî ŋgáb. Ɨ́dù kɨ́ woò, wu á há wu nɨ́m mwi̧, mè woò kwá nɨ cɔ̧̂.»

¹³Mèín ya nɨ́ dùgallɨb no kù ɨnè tàkɨ́nàyèwá: «Gom dùnɨ mo ŋgáár lame, mɨ ɓa ndɨ̀ŋnɨ wu ɗèìkɨ́ nùb wo ɓi̧ní á» na.

¹⁴Dùgallɨb ma cè bɨ́ na bɨ? Ŋgáb du bɨ nyéhɨ̀b du bɨ́ ə́nnànɨ Mèèín á. Mèín á ŋgáb tómnɨ ŋgáb gɨ̀ kpɔ́knɨ nùb du nùb ɓa ɓáínɨ ɓánne.