Read Vute Gbàŋ Èbɨ̀rə́ə̀ 10 Bible Online

Gbàŋ Èbɨ̀rə́ə̀ 10 - Vute bible

Gbàŋ Èbɨ̀rə́ə̀ 10

¹Ɓíì Mòyíìs nɨ túùmɓànɨ àmɨɨr hàrák ɗàà, ŋgə́ túumhó̧ɗóo nɨ nyɔ̧ɔ̧́ Mèín kwá na nɨ̀vɨ́tɨ̀bì á. Ɓíì kɨ́ á tànɨ kùb nàlɨ́ŋhá satɨgà mwi̧ kɨ́ dáín mɨ̀ dáín ùwí no ɗàà. Àm kɨ́ á du sàmàìn ŋgə́ ndɨŋ nùb du ŋgɨ̀ɨ̀rénɨ Mèín noò dùɓà ɗɨ́ɗɨ̧́ nɨ́m yɨ̀tíí só ɗàwá ɗàà ru.

²Dù u̧ ɗàà, nùb du ə́rɨ́b satɨgàà kɨ́ ə́nniì, cuum ŋgábè yè á cɨ̀ tɨ́in kɨ́ gwìí mwi̧í̧. Ŋgáb yè bɨ́ dùkwàcɨ̀nɨ ju ŋgáb a tà vúm du bɨ nùb ŋgwìn Mèèín bɨré á na nɨ ɗàà, kùb yè bɨ́ satɨgà kù nàɓàcéyènɨ ɗàà.

³Ɓe tàá àmɨrìí, satɨgààb du bɨ àm lə́əmcuna nɨ̀vɨ́tɨ̀b cuum ŋgáb du ndɨ̀ŋnɨ dáín mɨ̀ dáín ndè á.

⁴Ɓetí sàmàìn tɨ́m ndèèìn kè, dùgɨ̀ kɨ́ jírí ákɨ́ɓacéye cum ye mwi̧ ɓà rɨ ɗàà.

⁵Àm kɨ́ á Krístù, ŋgə́ ɓànɨ gònɨ ɗɔ̀bín, ŋgə́ ya tana Mèín ɨnè: «Wu wu ɗúwa satɨgààb, dùgɨ̀ múúb, ɨ́dù wu nyaaŋnaá mɨ síí.

⁶Àm woò nɨ ɓe nyèém kùb yíhe kpàktàì múbí yaà ɗàà, dùgɨ̀ satɨgà kùb na ɓe ɨ́r tɨ́ɨ́r cumbi rɨ.

⁷Á mɨ tanagi wu ɨnè: ‹Mɨ á rè. Mɨ go ndɨ̀ŋnɨ nɨ́m wu ɗúré á. Nɨ́m du tɨín ɓe ɨ́r moò káàtà Mèèín noò á kí.› »

⁸Krístù tayayeé ɨnè: «Wu wu ɗúwa satɨgààb, dùgɨ̀ múúb. Dùgɨ̀ nyèém kùb yíhe kpàktàì múbí yaà, dùgɨ̀ satɨgà kùb na ɓe ɨ́r tɨ́ɨ́r cumbi rɨ. Àm woò nɨ ɓe nɨ́ɨ́b kɨ́ ɗàà.» U̧ kɨ́ ɓíì Mòyíìs á tànɨ kùb ndɨ̀ŋ nɨ́ɨ́b kɨ́ lâs.

⁹Ŋgə́ ɨ́ tàkwà ɨnè: «Mɨ á rè. Mɨ go ndɨ̀ŋnɨ nɨ́m wu ɗúré á.» Kí du Krístù ákíí satɨgààb fìn, ɗà ŋgə́ ɨ́ cə́ndɨ̀kî ɓe kɨ́ noò yáá na á.

¹⁰Ɓetí ŋgə́ nakíí síí ŋgə́ nɨ̀mɨrí kɨ́ gwìí mwi̧í̧ àm tɨ́íkɨ́na nɨ́m cum nɨ́mè. Kí du Krístù ndɨŋntɨ́ nɨ́m Mèín ɗúré fó̧ hàrák yáá na á.

¹¹Nò na satɨgàà lâs á ə́ə̀ŋnɨ còóm ye lâs éínɨ ə́r nó satɨgàà. Satɨgààb mwi̧ duɓa sàmàìn ákɨ́na kùb cum ɗàwáá kɨ́ á cè ŋgə́ nalɨ́ŋhá ru.

¹²Ɨ́dù kɨ́ Krístùù, ŋgə́ naɗóotɨ́ satɨgà mwi̧cáŋ ɓe ɨ́r tɨ́rèé cumbi, ɗà ŋgə́ ɨ́ dùrê ŋgáár lam Mèèín no. Nɨ́m satɨgàà ŋgéé kɨ́ du ndɨ̀ŋniì nɨ cɔ̧́nɨ cɔ̧́ɔ̧ ɗàà.

¹³Ɗàrò ŋgə́ á móŋnɨ Mèín ndɨ̀ŋ ŋgə́ kpók nùb no ɓi̧ní ŋgwé ɗàà.

¹⁴Ɓe nyər mwi̧ ɗóò ŋgə́ naré, ŋgə́ ndɨŋtɨ́ nùb Mèín kotɨhó̧kɨ́ cumí dù ɗɨ́ɗɨ̧́ kɨ́ gwìí mwi̧í̧.

¹⁵Nyéhè Sarîn tanaá nɨ́m ɨnayâna àm kɨ́ àmɨɨr á. Tíí yàyè ŋgə́ wáatɨ́ ɨnè:

¹⁶Kéké taá ɨnè: «Cùr jíìb kíì, jin nyàáŋ mɨ ɓacɨ mɨ́ kwéínɨ ɓe ŋgábè á ɨnè: Mɨ ɓa tɨ̀nndénɨ ɓíhɨ̀b moò ŋgábè njɔ̧̀ɔ̧ á, mɨ á kɨ́klê ɓíhɨ̀b mo kɨ́ kɨ̀cáàb ŋgábè no.»

¹⁷Ŋgə́ ɨ́ tàkwà ɨnè: «Mɨ tɨ̀ mɨ njɔ̧̀ cum ŋgábè ɓe kum ŋgábè ya kɨ́kcɨ̀r.»

¹⁸Ɓwâ cum ducɨ nɨ́ tɨ́in ndɨ, kùb bɨ mácɨ̀nɨ nànɨ nyər ɓe ɨ́r tɨ́ɨ́r cum kíì ɗàà.

¹⁹Hȩ dùnɨ u̧nèé, mwin yàá bɨ ə́mní, ɓe tɨ́m Yésùù sú rè, nɨ́m ɗəəŋtɨ́ nɨ́m á lə́mèɓànɨ yɨ́ duɓa sarɨ́nne.

²⁰Ŋgə́ njáínndóŋnaá nɨ́m jɨ̀r heé du nànɨ mèè sànjà júú Dúú Jíri Mèèín ndɨ no, kí ta ŋgə́ njáínndóŋnaá nɨ́m jɨ̀r kɨ́ síí ŋgə́ nɨ̀mɨrí no yáá na á.

²¹Nɨ́m á ɓe nɨ̀gáŋ satɨgàà. Gbàŋ Mèèín no, ŋgə́ ɨ́ du ŋgwé ru.

²²Satɨgà kɨ́ sehó̧kɨ́naá nɨ́m nɨ́ɨ́b lâs nɨ́mè njɔ̧̀ tɨ du ndɨ̀ŋnɨ ŋgwìn Mèèín bɨ̀ nɨ́mè, ŋgə́ kɔɔhó̧ɓwéetɨ́ nɨ́m mvúm sarɨ́nne no. Hȩ dùnɨ u̧nèé, nɨ́m ŋgɨ̀ɨ̀réná Mèín no ɓe njɔ̧̀ hàrák, nɨ́m a dùnáɓwê ɓe gíí ə́ə́m nɨ́mè no.

²³Gíí nɨ́mè sumí nɨ́m du ɓéènɨ rè, nɨ́m gə́tɨ̀náɓà gíí kɨ́ kpéín, ɓetí nɨ́m ɗəəŋtɨ́ Mèín á nɨ jə̀ŋnɨ ɓwáár noò.

²⁴Nɨ́m dùná ju nò rè góomtɨ́ kùùŋ íí ya, nò rè a gómnè kùùŋ íí ya. Nò lâs a tààmnà kùùŋ njɔ̧̀, ndɨ̀ŋnɨ nò kɨ́ dù ɓe ɗûnɨ́m, ŋgə́ a ndɨ̀ŋɓwê nɨ́m du nyɔ̧né.

²⁵Nɨ́m nɨ ɓáhɨ́r nɨ́mè mbɨ́knâr hȩ nùb kù du bɨ́ ɓe ɗɨ́m ŋgáb ducɨ bɨ́ yɨ́ ɓáhɨ́rí gòcɨ̀r lɨ. Ɗúú nɨ́ nɨ́m gɨ̀ná tíí ɓe kpɔ̂ɔ́ kùŋ mwin yàá á, ɓetí nyí péé ye Kéké ɓa cùwòniì ŋgóobtɨ́ nɨ́.

²⁶Nɨ́m ɨ́ dù nɨ́ gɨ̀háyènɨ tíí còmnɨ ɓe ɗûnɨ́m nɨ́m nɨ̀mibi, u̧ kɨ́ nɨ́m tɨ ɗəəŋcií àmɨɨr lâs, nɨ́m ɗə̀ə̀ŋnáɓà nɨ ɨnayâna satɨgà kù ɓa kwa nɨ́m ákɨ́nànɨ cumí nɨ ɗàcɨ̀wá.

²⁷Nɨ́m ɓa nɨ́m mènànɨ ɓèé á mô̧ó̧ ɓe vùù cúk nɨ́m ɓa nɨ́m féínnàniì. Nɨ́m ɓa nɨ́m féínnànɨ kɨ́ du ŋgwìn Mèèín ɓe wa kàm ɓa yíìkɨ́nɨ nùb ɓəndɨ Mèèín ndè á.

²⁸Ɓwâ nɨ̀vɨ́tè ɓei ɓíì Mòyíìs rɨ, mɨ̀námé bɨrɨ́b, kɨ́ kù taarɨ́b ɨ́ ə́mnè àm kɨ́, ɓè mu̧u̧ kùb a kwíìkî nò kɨ́.

²⁹Nò pə́təəŋkɨ́ Mwin Mèèín, jábɨ́r ŋgéé ɓa ndóŋnɨ kɨ́ nò ɓei ɓíì Mòyíìs á, nyí u̧ pə́wa à? Ɓetí ŋgə́ nɨ jə̀ŋnɨ tɨ́m jin nyàáŋ yi satɨhó̧kɨ́ ŋgə́ cumíì ɗàà, ŋgə́ á nɨ àndɨ̀nɨ Nyéhè Sarîn du ndɨ̀ŋnɨ nɨ́m ɗə̀ŋhɨ̀ nyàŋnjɔ̧̀ Mèèín.

³⁰Nɨ́m ɗəəŋɓatɨ́ mîn nò yi ta: «Mɨ ɨ́ ɓa nyí lɔ̧̀nɨ ru. Mɨ ɓa ɓáàbnɨ nɨ́ɨ́b kùb yi ndɨŋ nyínè á» na rè. Ŋgə́ yi takwatɨ́ ɨnè: «Kéké kwá ŋgwin gbàŋ noò.»

³¹Á ɓà ɓáŋhîn ŋgwìn Mèín nò du nànɨ kùb mèè bɨ̀ nɨ̀vɨ́tè yoo!

³²Lə́əmcunáye nɨ́m ya ndóŋ ɓe nyí ɓwâ mwa Mèèín ya ɓəəna nyínè. Cùr kɨ́ no ɓè mu̧u̧ nyí ya pə́ɓatɨ́ jábɨ́r cei, nyí ɨ́ nòmɓà ŋgúúŋ jábɨ́r kɨ́ no.

³³Yaá ɓwâ kù kùb a àndè nyí, kùb a túmnè nyí jábɨ́r mɨ̀kùnín. Ɓwâ kù cè nyí yaá kə́sə́k gàmnànɨ nùb kùb ndɨŋ u̧nèé àm.

³⁴Àm nùb kù yi du nìrìì yaá nyí yínɨ só. Ɓwâ kùb ya ga nɨ́ɨ́b nyínè, nyí ɨ́ ə́mnè ɓe mɨ̀tù cúk mə̀mnɨ nɨ́ɨ́b kɨ́, ɓetí nyí yi ɗəəŋtɨ́ vúm yaá ɓe njɔdì kàm nyɔ̧ɔ̧́ duce nɨ́ cɔ̧́ɔ̧ cɔ̧́re.

³⁵Hȩ dùnɨ u̧nèé, səŋnáhá nɨ gíí, nyí ɓahá nɨ́ kwànɨ lɔ̀ɔ́ ɓe ɨ́r gíí kíì á.

³⁶Á nyí ɗúnànɨ jíhɨ́r, àm nyí a ndɨ̀ŋ nɨ́m Mèín ɗúré, nyí a kwàɓwéhè nɨ́m ŋgə́ ɓwáína nyínè.

³⁷Káàtà Mèèín á wáàɓàcéyènɨ ɨnè: «Hò̧ mvin ti ŋgób, ŋgóbti ɓàì, nò du ɗúnɨ gòte a féìn. Teé ŋgób ŋgə́ a féìn.

³⁸Nò du mó íhín ɗɨ́ɗɨ̧́ɨ̧́ kwá du ɓe mè ɓe ɨ́r ə́ə́m ŋgéé, ɨ́dù ŋgə́ ɨ́ ɓàndɨ̀cù nɨ́ cùrì, mɨ a ákî mɨ́ ŋgə́ njɔ̧̀ ya.»

³⁹Nɨ́m nɨ kpáín nùb du bɨ́ ɓàndɨ̀cùnɨ cùrì a lɔ̧̂ɔ̧́ rɨ no ɗàà. Nɨ́m á nɨ ə́ə̀mnɨ Mèín, nɨ́m ɓace nɨ́ ɓáínɨ á.