Read Vute Gbàŋ Èbɨ̀rə́ə̀ 11 Bible Online

Gbàŋ Èbɨ̀rə́ə̀ 11 - Vute bible

Gbàŋ Èbɨ̀rə́ə̀ 11

¹Ə́mnèé Mèèín du ɓwâ nɨ̀vɨ́tè ɗəəŋɓa no njɔ̧̀ɔ̧ ɨnayâna gíí ní du sə̀ŋnɨ rè, nɨ́m kɨ́ ɓa ndɨ̀ŋmènɨ á, nɨ́m ní du pénɨ ɗàwá rè, nɨ́m kɨ́ á mè ku yáá na rɨ á.

²Mèín ya á nɨ́ nùb ya tíí kɨ́ nùb ɗɨ́ɗɨ̧́ ɓe ə́ə́m ŋgábè á.

³Ə́ə́m nɨ́m ə́mne Mèèín á ndɨ̀ŋnɨ nɨ́m ɗə̀ə̀ŋɓà ɨnayâna Mèín ya nyaŋhɨ nɨ́ɨ́b lâs ɓe nyindí no ɓɔ̧ne á. Nɨ́ɨ́b nɨ́m du péniì, Mèín ya nyaŋhɨ ŋgáb ɗòŋwòó kɨ́b nɨ́m du pénɨ ɗàwáá ya á.

⁴Ɓe ə́ə́m á Àbêl ya na Mèín satɨgà nyɔ̧ɔ̧́ ndóŋ kɨ́ Kàyə̧̂ ru. Ɓe ə́ə́m ŋgéé kɨ́ á Mèín yi á ŋgə́ nò ɗɨ́ɗɨ̧́ ru, ɓetí Mèín nɨ̀mɨr yi ə́əmtɨ́ nyər ŋgéé. Àbêl yi kúú. Ɨ́dù dugɨ nɨ́ u̧, ɓe àm ə́ə́m ya ŋgéé kíì, ŋgə́ á nɨ nyìnháyènɨ.

⁵Ɓe ə́ə́m á Énòk ya féín Mèèín tíí, ŋgə́ kú̧u̧ kúwa ru. Kùb ya bɨ́ fín ŋgéé pə́wa ɓetí Mèín ya áwúkíí nɨ́ ŋgə́ ɓɨllin. Káàtà Mèèín wáatɨ́ ɨnayâna Énòk ya nyaŋ nɨ Mèín sumí á ŋgə́ ɨ́ áwúkî nɨ́ ŋgə́ ɓɨllin ndu.

⁶Nò kù sàmàìn nyaŋ Mèín sumí ɓè nò kɨ́ du ɓe ə́ə́m ɗàwáá ɗàà. Nò du ŋgɨ̀ɨ̀rénɨ Mèín noò, á ɗúnɨ nò kɨ́ ɗə̀ŋhɨ̀ ɨnayâna Mèín á ku, ŋgə́ á cè nùb du mánɨ ŋgə́ ə́ə̀mniì nànɨ lɔ̀ɔ́.

⁷Ɓe ə́ə́m á Nòwê yi ók sóóŋ Mèín yi na ɓe ɨ́r nɨ́ɨ́b yi ɓa ndóŋnɨ, yi du sàmàìn ŋgə́ pə́tamndé ɗàwáá ru. Ŋgə́ ɨ́ jə̀ŋ nɨ́ sóóŋ kɨ́, á ŋgə́ ya swei Árɨ̀cə̀ ŋgə́ ɓe gbàŋ noò lâs yi ɓáíhó̧ nó kwe. Ɓe ndɨ̧̀ɨ̧́ u̧nè kɨ́, ŋgə́ yi túumtɨ́ ɨnayâna nùb ɗɔ̀bɨ́nné ndɨŋtɨ́ ɓáŋhîn. Ɓe ə́ə́m ŋgéé kɨ́ á Mèín yi á ŋgə́ nò ɗɨ́ɗɨ̧́ ru.

⁸Ɓe ə́ə́m á Àbɨ̀ràhâm yi jəŋ ɓə́r Mèín yi ɓé ŋgéé ru. Ŋgə́ ɨ́ ə́llê gìnɨ ti Mèín ya ɓwáína ŋgéé no. Ŋgə́ ya ə́llé gùr kɨ́ u̧, ŋgə́ ɗə̀ə̀ŋwá yɨ́ ŋgə́ du gìniì.

⁹Ɓe ə́ə́m á Àbɨ̀ràhâm ya gi dùnɨ ti Mèín ya ɓwáína ŋgə́ kɨ́ no hȩ nɨ̀gúr lu. Ŋgə́ ɓe Ìsâk ɓe Yákòb ya gwínteekom njáŋnèé. Mèín ya ɓwáínaɓwéetɨ́ Ìsâk ɓe Yákòb ɓwáár mwi̧ kɨ́.

¹⁰Àbɨ̀ràhâm yaá móŋnɨ kúr yi du sàmàìn kùb ɓətɨkɨ́ré ɗàwáá. Mèín ɨ́ nyaŋhȩ hȩ kúr kɨ́ ɓa dùniì ru, ŋgə́ nɨ̀mɨr ɨ́ óŋce ru.

¹¹Ɓe ə́ə́m á Àbɨ̀ràhâm yi sei tá muní, u̧ kɨ́ ŋgə́ ya nɨ́ ɓe dáín fein muní ɗàcɨ̀wá. Sárà nɨ̀mɨr yɨɨ́mcè nɨ́ mámmgbu̧ á. Ɨ́dù Àbɨ̀ràhâm yi ɗəəŋtɨ́ nɨ́ ɨnayâna Mèín á nɨ jə̀ŋnɨ ɓwáár noò.

¹²U̧ á yi ndɨŋ, Àbɨ̀ràhâm yi dukɨ́cɨ nɨ́ ju cwéé, yi kwame nyȩrɨ́b kwin ndúrùm, sàmàìn kùb fainndé ɗàà hȩ káŋyerɨ̀b ɓɨllɨnne, hȩ sasé gín mɨ̀kwehɨ̀rí ɓwê ru.

¹³Nùb kɨ́ lâs, ŋgáb kúú ɓe ə́ə́m sumí. Ŋgáb ya bɨ́ kwàwá nyɔ̧ɔ̧́ Mèín ya ɓwáína ŋgáb kɨ́, ɨ́dù ŋgáb yi pə́soháá nyər kɨ́ cóo. Ŋgáb ɨ́ yà ókkɨ́ɓànɨ mɨ̀tù, á ŋgáb taɓa wááŋ ɨnayâna vúm bɨ nɨ̀gwííb á, vúm ndóŋ bɨ́ ndó̧o̧ á yáá.

¹⁴Nyindí ŋgáb ya nyin u̧ kɨ́ á túùmɓànɨ laŋtɨ̧ɨ̧́ ɨnayâna ŋgáb má ti kù á.

¹⁵Yaá ɓàhá sàmàìn ŋgáb gɨcu yɨ́ ŋgáb yi éíworé, ɨ́dù ti kɨ́ yi nɨ́ ŋgáb sumí yícùnɨ ɗàà.

¹⁶Ɓe tàá àmɨrìí, ŋgáb yaá ɗúnɨ ti duɓa nyɔ̧ɔ̧́ rɨ, kí ta ti du ɓɨllɨnne na á. Àm kɨ́ á Mèín du nɨ́ óknɨ sə̀ré kùb ɓé ní Mèín ŋgábè na ɗàà ru, ɓetí ŋgə́ óŋkɨ́naá ŋgáb kúr.

¹⁷Àbɨ̀ràhâm yi ə́əmtɨ́ Mèín. Mèín ɨ́ ɗû pénɨ nɨ́m Àbɨ̀ràhâm ɓa ndɨ̀ŋniì, ŋgə́ ɨ́ tà ŋgə́ nàkɨ́ ní mwin nóò Ìsâk satɨgà no. Àbɨ̀ràhâm ɨ́ ə́mnè nàkɨ́nɨ kpòk muní no kɨ́, u̧ kɨ́ Mèín ya ɓwáínacií nɨ́ ŋgə́ ɓwáár.

¹⁸Mèín ya tanaá Àbɨ̀ràhâm ɨnè: «Ìsâk ɨ́ du nò kwá feinna wu nyȩ yàyɨ̀rí ru.»

¹⁹Àbɨ̀ràhâm yaá tànɨ no sumí ɨnayâna nɨ̀vɨ́tè kúgɨ̀ kú̧u̧, Mèín á ɓe nyòm səəmcuhó̧ ŋgə́ mvókín nɨ̀kwíbí. U̧nè á Mèín ya nacu Àbɨ̀ràhâm mwin nóò hȩ ŋgə́ tɨ səəmcuhó̧ ŋgə́ cwéé rɨ u̧.

²⁰Ɓe ə́ə́m á Ìsâk ya fam Yákòb ɓe Èsáyù ɓe ɨ́r nɨ́m ɓa ndɨ̀ŋnɨ cɨ́m yȩné ru.

²¹Ɓe ə́ə́m á Yákòb, ŋgə́ ɓànɨ kúnɨ, ŋgə́ yi fam munɨ́b Yòsə́ə̀b lu. Ŋgə́ ya tɨɨmséé túb nóò ya, ŋgə́ ɨ́ ɗôm Mèín.

²²Ɓe ə́ə́m á Yòsə̂b, ŋgə́ ɓànɨ kúnɨ, ŋgə́ ya nyin ɓe ɨ́r ə́rèé nùb Ísràyéèl yi ɓa éíkɨ́nɨ ti Èjíìbtə̀ noò, ŋgə́ ɨ́ tàkɨ́sòɓwê nɨ́m kùb ɓa ndɨ̀ŋnɨ ɓe fíín nóò ru.

²³Ɓe ə́ə́m á tá Mòyíìs ɓe yà nóò ya yoote ŋgə́ há̧á̧ njumi taarɨ́b cùr fin ŋgéé ru. Ŋgáb yi péé mwin vúmè á ɓà nyɔ̧ɔ̧́, ŋgáb ɨ́ dù bɨ́ vùù lùwá ɓèìnɨ ɓíì mvèìn jíri Èjíìbtə̀.

²⁴Ɓe ə́ə́m á Mòyîs, ɓwâ ŋgə́ ya hamndé, ŋgə́ ɨ́ mvû kùb tà mwin Fàràwóòŋ ɨ́ fein ní ru.[5]

²⁵Ŋgə́ yi ə́əmtɨ́ pə́ɓáànɨ jábɨ́r ɓe nùb gbàŋ Mèèín, ɨ́ ndôŋ kɨ́ ŋgə́ du ju mɨ̀tùú ŋgə́ a cè cumí tə̧né.

²⁶Kɨ́ Mòyíìs, nɨ́m yi dunaɓa ŋgə́ nɨ́m dɨmɨri ndóŋ njɔdì Èjíìbtə̀ á kùb àndɨ̀bɨ̂ŋ ní hȩ kùb ɓa àndɨ̀nɨ Mèsî rɨ u̧, ɓetí íí noò yaácɨ̀ nɨ lɔ̀ɔ́ ŋgə́ yi ɓa kwànɨ cɨ́m yȩné ya.

²⁷Ɓe ə́ə́m á Mòyîs yi éíhó̧kɨ́ ti Èjíìbtə̀ no, ŋgə́ lùwá vùù mvèìn jíri yi ɓa ní bìniì, ŋgə́ ɨ́ gì ru. Ŋgə́ yi sabléé mvèìn jírií ŋgáré hȩ ŋgə́ á nɨ́ pénɨ Mèín nò kùb du bɨ́ pénɨ ɗàwáá rɨ u̧.

²⁸Ɓe ə́ə́m á Mòyîs yi kəb jùrúb Páskàà, ŋgə́ ɨ́ tàkwà kùb sàtèè tɨ́m ɓavɨ̀rì àm dùgal kwíhɨ nɨ̀rì Mèín yi tómworé tɨ̀ kwíikɨ́ munɨ́b ŋgwéé nùb Ísràyéèl lu.

²⁹Ɓe ə́ə́m á nùb Ísràyéèl ya pe Mɨ̀kwehɨ̀r jandîn hȩ ŋgáb ndóŋce ɗɔ̀ɔ́b cɨ́ŋnií rò. Nùb Èjíìbtə̀ ya ɗúú ndóŋɓwênɨ u̧, ɨ́dù mvúm ɨ́ hàìn nɨ́ ŋgáb.

³⁰Ɓe ə́ə́m á nùb Ísràyéèl ya fai leè Yèríkòò há̧á̧ jíì tɨ́ɓaám ɗà leè kɨ́ ɨ́ lùŋnè ru.

³¹Ɓe ə́ə́m á Ràhâb, nɨ̀gwi sàkèè ya du nɨ́ kúɓáàwá ɓe nùb ya du Mèín jə̀ŋwáá ru. Ɓetí ɓe nyàŋnjɔ̧̀ noò, ŋgə́ ya yootɨ́ nɨ́ nùb ɓɨ̀ɓàblí.

³²Mɨ nyìngwàcɨ̀yè ní? Mvókín ɨ́ du nɨ́ ɗàà, mɨ yè nyinnaá nyí àm Gèdèyóòŋ, Bàrâk, Sàmsôŋ, Jèftéè, Dàvíìt, Sàmíyèl ɓe tɨ́kɨ̀nɨ́b Mèèín.

³³Ɓe ə́ə́m á ŋgáb ya ɓei ti bɨ kù su ru. Ŋgáb ya ndɨŋtɨ́ nɨ́ɨ́b ɗɨ́ɗɨ̧́, á ŋgáb ya kwa nɨ́m Mèín ya ɓwállé. Ŋgáb ya ɗeintɨ́ kpáàb ɓɔ̧.

³⁴Ŋgáb ya lɨ́ɨmtɨ́ wa kàtɨ́b, ŋgáb ya ɓáíhó̧tɨ́ úwìnɨ́m tú̧ú̧ no. Ŋgáb ya guú yə́b, ɗà ŋgáb ɨ́ wáàŋcù. Ŋgáb yaá njɔ̧̀ ŋgaín, á ŋgáb ya ɓei nùb ya gainwo ŋgábè su ru.

³⁵Ɓe ə́ə́m á nɨ̀gub ya pə́ kùb sə̀ə̀mcùnànɨ ŋgáb munɨ́b ɓoò ru. Nɨ̀gwáàb kù, kùb ya túumɓatɨ́ ŋgáb jábɨ́r hȩ ŋgáb ɓa kúnɨ rɨ u̧, ŋgáb ɨ́ mvû kùb ɓátɨ̀ vúm, àm sə̀ə̀mcùhô̧ sèrɨ̀nnè vúmè a dùɓà nyɔ̧né.

³⁶Nùb kù yi jíitɨ́ nyèìn ɓe jɨ̀ɨ̀m. Kùb yi kóttɨ́ nùb kù ɓe lí tú̧ú̧, kɨ́klénɨ ŋgáb nìrì.

³⁷Kùb yi lóoŋkwíikíí nùb kù ɓe sɨɨ, nùb kù cè kùb ɨ́ téínndê ŋgáb tə̧ə̧́ bɨrɨ́b ɓe sɨ̀k. Kùb yi kwíitɨ́ nùb kù ɓe jì̧í̧. Nùb kù yaá lə́rə́nɨ kwa ndèɗúú, kɨ́ kù kwa jírí só, lùùtèènɨ. Ŋgáb yaá tii kɨ̀ tii, kùb yaá ŋgáb túùmnɨ jábɨ́r ɓe àm ə́mní, kùb yaá ŋgáb jóktɨ̀nɨ.

³⁸U̧ kɨ́ nùb ɗɨ́ɗɨ̧́ ɗóhe ɓe ŋgábè yi bɨ́ ɗàɓàwá. Ŋgáb yaá lùùgènɨ ŋgwàì ndɨ̀ŋnì, kɨ́ kù ɓəbì. Ŋgáb yaá njó̧ò̧tèèrénɨ mgbàŋnìn, dùgɨ̀ ŋgwiín.

³⁹Vùùm nùb kíì lâs, Mèín ya á nɨ́ ŋgáb nùb ɗɨ́ɗɨ̧́ ɓe ɨ́r ə́ə́m ŋgáb yi du ɓe kíí á. U̧ kɨ́ ŋgáb yi bɨ́ kwàwá nɨ́m Mèín yi ɓwállé.

⁴⁰Ɓetí Mèín ya nɨ́ ɗúwa ŋgáb sèì no tíí nùb ɗɨ́ɗɨ̧́ ŋgáb kɨ̀ ŋgáb, nɨ́m no ɗàà. Mèín ya nyaaŋkɨ́nacií nɨ́m nɨ́m duɓa nyɔ̧né.