Read Vute Gbàŋ Èbɨ̀rə́ə̀ 12 Bible Online

Gbàŋ Èbɨ̀rə́ə̀ 12 - Vute bible

Gbàŋ Èbɨ̀rə́ə̀ 12

¹Nɨ́m á ná rò mɨ̀kwìn kàm mɨ̀náméé no. Nɨ́m mbɨ́knáɓwê nɨ́ɨ́b lâs du nɨ́m hàrɨ̀nɨ gìnɨ tíí. Nɨ́m mbɨ́kná cum du nɨ́m ɓálɨ̀nɨ péín ndè péín ndè rè. Lùú kùb ta nɨ́m lùtɨ rè, nɨ́m nòmnáɓàhácɨ̀ lùnɨ há̧á̧ cáŋhɨ̀rí.

²Nɨ́m góòmnáhá nɨ íí ɓe Yésù, ŋgə́ ɨ́ du ndɨ̀ŋnɨ nɨ̀vɨ́tè dù ɓe ə́ə́m, ŋgə́ a ndɨ̀ŋ ə́ə́m kɨ́ dùɓà ɗɨ́ɗɨ̧́ nɨ́m yɨ̀tíí no ɗàà ru. Ŋgə́ ya ə́əmtɨ́ kúnɨ bɨ̧̀ɨ̧́, ŋgə́ sə̀ré ókwa, ɓetí ŋgə́ ya pə́cií nɨ́ mɨ̀tɔ̀k ŋgə́ yi ɓa óknɨ ɓe ɨ́r cwá kíì. Ŋgə́ á cè nɨ́ ɗàrò du̧ú̧ ŋgáár lam Mèèín no.

³Nyí duú, nyí a lə́ə̀mhâ Yésù, ŋgə́ nò ya jíhɨ ɓɨ̀ndí cɨcóòm ya ɓənndɨ ŋgéé. Nɨ ɗúwa nyí mbɨ́k njɔ̧̀ gók nyí.

⁴Ɓetí lɨɨŋ nyí du lɨ̀ŋnɨ ɓe cumí, nyí nɨ lɨ̀ŋháyèwá há̧á̧ nyí ɨ́ kàìkî mè nyínè.

⁵Nyí ɨláŋtɨ́ nɨ́ nyindí Mèín nyinna nyí hȩ ŋgə́ nyinnace munɨ́b noò, tààmnànɨ nyí njɔ̧̀ no rè à? Ŋgə́ tahaá ɨnè ye: «Mwin móò, jábɨ́r Kéké túmnɨ wé, pə́əm jábɨ́r kɨ́ hȩ jábɨ́r hàráá. Ɓwâ ŋgə́ duce wu yètɨ̀niì, wu wu ɓáŋhîn ô.

⁶Ɓetí Kéké á túùmnɨ nò ŋgə́ du ɗúniì jábɨ́r, nò ŋgə́ du ánɨ hȩ mwin nóò rɨ, ŋgə́ á ɓándè ŋgə́.»

⁷Jábɨ́r nyí du pénɨ kɨ́, ánáam jábɨ́r kɨ́ a dù hȩ Tá nyínè ɨ́ du nyí ɓándɨ̀nɨ ru, ɓetí jábɨ́r túmnɨ ɨnayâna Mèín átɨ́ nyí hȩ munɨ́b noò yáá na á. Mwin kù á ku tá du ɓándɨ̀nɨ ɗàwáá à?

⁸Nyí ɨ́ dù nɨ́ ɓándîn hȩ munɨ́b ŋgə́ nɨ̀mɨ́rí lâs ɗàà, nyí ma du nɨ munɨ́b màŋnì á.

⁹Nɨ́m pə́náyè táàb nɨ́mè ɗɔ̀bín hò̧: ŋgáb á nɨ́m ɓándɨ̀nɨ, nɨ́m á cè ŋgáb jə̀ŋnɨ. Ɗúɓwéeha nɨ nɨ́m jə̀ŋ Tá nɨ́mè du ɓɨllɨnne á ye, nɨ́m a kwà mè.

¹⁰Táàb nɨ́mè ɗɔ̀bín hò̧neè á nɨ́m ɓándɨ̀nɨ mvókín ti ŋgób, ɗóhîn ɓe nɨ́m ŋgáb pə́ du hàráá. Ɨ́dù Mèín á nɨ́m ɓándɨ̀nɨ ɓe ɨ́r nɨ́m du nyɔ̧né, àm nɨ́m a dùɓwê sarîn hȩ ŋgéé.

¹¹Ɓwâ kùb du nɨ́m ɓándɨ̀niì, nɨ́m á ánɨ kí hȩ nɨ́m nɨ́m ók ɓáŋhîn no kwe, ɨ́ ndôŋ mɨ̀tù. Ɨ́dù nùb ya jíhe bɨ́ ɓɨ́ɓándeé á bɨ́ sèìnɨ nùb ɗɨ́ɗɨ̧́, ŋgáb a kwà bɨ́ ju ɗóóŋ.

¹²Hȩ dùnɨ u̧nèé, taamnáam gə́gə́ə́b!

¹³Gɨnáɓam gùr jɨ̀r ɗɨ́ɗɨ̧́ du làktàk lɨ no, àm nò du cə̀ŋnɨ cə̧né tɨ̀ muklɨré, gurùb ŋgéé ɗə́ə̀ŋbɨ̂ŋtɨ.

¹⁴Mánáam dùnɨ ju ɗóóŋ ɓe nùb lâs, nyí a dù ju Mèín ɗúré. Duú u̧ ɗàà, nò kwá pə́ Kékéé nɨ ɗàà.

¹⁵Gə́tɨnáam, nò kù nɨ ndɨ̀ŋnyàáŋ Mèèín mvûr. Nò kù cè nɨ́ hȩ yɔ̀ duna nɨ́ nɨ̀vɨ́tɨ̀b hȩ mvùtù rɨ dùr.

¹⁶Nò kù nɨ ŋguùŋ du nànɨ sə̀réé ndɨ̀ŋ, nò kù cè nɨ́ sàkɨ̂ɨ́ ndɨ̀ŋ ɓe nɨ́m jíri, hȩ Èsáyù ya sə́rɨkɨ́ ju kɨ̀jírií noò ɓe ɨ́r cɔɔ̀ŋ ndɨ.

¹⁷Nyí nɨ̀miib nyí ɗəəŋtɨ́ cùrì ɗoróó á ŋgə́ ya ɗú gàmnɨ faám tá noò, ɨ́dù tá noò ɨ́ mvû nɨ́ ŋgə́ nànɨ. Ŋgə́ ya máháá ŋgə́ a kɨ́íce ɨnayâna tá noò cə́ndɨ̀ ɓɔ̧, ɨ́dù tá noò ɨ́ mvúhâ nɨ́.

¹⁸Ɓwâ nyí ya ŋgɨɨré Mèín nóò, ya nɨ́ hȩ kùb ŋgɨɨréce ɓe Sìnàyíì nɨ́m kùb fɨ́tɨ dì̧nɨ̀nɨ di̧nɨ́nne no sé. Wa kàm kù yi nɨ́ ɗàà, sɨ́mnɨ̀r kàm kù yi nɨ́ ɗàà, nàá kàm kù yi nɨ́ nàɓwênɨ ɗàà.

¹⁹Nyí ya nɨ́ wùúm tóóŋ kù ókwa, dùgɨ̀ kúu kù. Nùb Ísràyéèl ya ók wùúm kíì, ŋgáb ɨ́ tà kùb vúm nɨ́m kù nyìnnàcɨ̀wá.

²⁰Ɓetí yaá ta̧á̧ ɨnè: «Nò ɗeiwúɓa gurùb ɓeè hò̧neè, dùgɨ̀ nyə̀m, kùb a lóòŋkwíìkî ŋgə́.» Yi nɨ́ sàmàìn ŋgáb jíhe ɓíì kíì ɗàà.

²¹Nɨ́ɨ́b ŋgáb ya pə́kom kɨ́ yaá nàɓànɨ vùù, á Mòyîs yi ta: «Vùù á ɓà mɨ bìnɨ. Mɨ á bɨ́ndɨ̀nɨ.»

²²Ɨ́dù kɨ́ nyínè, nyí ŋgɨɨsoó há̧á̧ gín ɓe Sìyóòŋ, gín kwɨ́í Mèín nò du nànɨ mèè. Kwɨ́í kɨ́ du Yèrúsàlèm ɓɨllɨnne á, yɨ́ kùŋkùŋ dùgallɨbi du mɨ̀tùú.

²³Nyí ŋgɨɨréé nɨ́ kpáín nùb ə́mní yàyɨ̀rí ók ɓe Mèèín no, ŋgáb nùb ɨ́r ɓoò du tɨín ɓɨllin ndè. Nyí ŋgɨɨréé nɨ́ Mèín nò du ŋgùnnɨ nùb ɗɔ̀bɨ́nné lâs no. Nyí ŋgɨɨréé nɨ́ kpáín nùb Mèín ya á no íhín nùb ɗɨ́ɗɨ̧́ rɨ́ no.

²⁴Nyí ŋgɨɨréé nɨ́ Yésù no, ŋgə́ nò gewona nɨ̀vɨ́tɨ̀b jin nyàŋ hehí. Tɨ́m noò yi súú àm nɨ́m a dù sarɨ́nne. Nɨ́m tɨ́m no kɨ́ ndɨŋndé ndóŋtɨ́ kɨ́ Àbéèl.

²⁵Gə́tɨnáam nyí nɨ nò du nyí nyìnnànɨ ɗàrɨ́ tó ɗèìnnàr. Ɗɔ̀bín hò̧ Mòyîs ya taá nùb Ísràyéèl ŋgáb gə́tìi, ŋgáb ɨ́ dù bɨ́ ókwa, ɗà ŋgáb ɨ́ ɓábmè ɓe jábɨ́r, ɗóògɨ̀ nɨ́m à? Kɨ́ nɨ́mè, ɓɨllin á Mèín du nɨ́ nɨ́m nyìnsówònànɨ ru. Nɨ́m ɨ́ ɓàndɨ̀nà ŋgə́ njum, nɨ́m ɓa ɓábmènɨ ɓe jábɨ́r á.

²⁶Kúu Mèèín ya ndɨŋyeé ɗɔ̀ɔ́b jɨ̀ɨ̀tɨ. Ŋgə́ ɓwáínakwaháá nɨ́m mwáín, ŋgə́ ɨ́ tà ɨnè: «Mɨ ya ndɨŋyeé ɗɔ̀ɔ́b jɨ̀ɨ̀tɨ, mɨ ɓa ndɨ̀ŋkwànɨ ŋgə́ jɨ̀hɨ̀ kɨ́ gwì bɨrɨ́bí á, ɨ́dù ɓe ɓɨɨr cúk cɨ̀.»

²⁷«Kɨ́ gwì bɨrɨ́bí» rè ta ɨnayâna nɨ́ɨ́b Mèín ya nyaaŋndé lâs ɓa jɨ̀ɨ̀nɨ na á, ɗà a lɔ̧́kî, àm kɨ́ duce jɨhîn jɨ̀ɨ̀re a mèé yáá na á.

²⁸Kɨ́ nɨ́mè, nɨ́m kwatɨ́ nɨ́ ŋgɔ̧́ɔ̧̀ du nɨ́ cə́ndîn cə́ndɨ̀nɨ ɗàwáá. Hȩ dùnɨ u̧nèé, nɨ́m sáktɨ̀ná Mèín, nɨ́m a ə́nnà ŋgə́ ɓe jɨ̧ cúk, ɓe gíí sumí ɓwê hȩ nyaŋ ŋgə́ sumíì.

²⁹Mèín nɨ́mè du nɨ hȩ wa du yíìkɨ́nɨ nɨ́ɨ́b lâs á.